NEPAD yahinduwe ikigega cy’iterambere cya AU mu mavugurura ayobowe na Perezida Kagame

Yanditswe na Evariste Nsengimana
Kuya 9 Nyakanga 2019 saa 04:05
Yasuwe :
0 0

Komite Nyobozi y’Inama y’umuryango wa Afurika Yunze Ubumwe (AU), yemeje itegeko rishyiraho kandi rigena imikorere y’Ikigo cyawo gishinzwe iterambere (AUDA-NEPAD), kigomba guhita gisimbura Ihuriro ry’Ibihugu bya Afurika rigamije Ubufatanye mu Iterambere (NEPAD).

Uyu mwanzuro ni umwe mu myanzuro yafatiwe i Niamey muri Niger mu nama ya 35 ya komite nyobozi y’Umuryango wa Afurika Yunze Ubumwe yateranye ku wa 4-5 Nyakanga 2019.

AUDA-NEPAD yemejwe nk’ikigo kigenga kandi cyemewe n’amategeko, ibaye ikigo cya mbere cy’iterambere cya AU.

Umwanzuro wo guhindura NEPAD ikaba AUDA-NEPAD ni umwe mu yatangiwe mu ya Inama ya 31 isanzwe y’Umuryango wa Afurika yunze Ubumwe (AU), iherutse kubera i Nouakchott muri Mauritania mu 2018.

Nyuma yo gusoza inshingano zo kuyobora Umuryango wa Afurika Ubunze Ubumwe muri Gashyantare uyu mwaka, Perezida Kagame yahise ahabwa izo gukomeza kuyobora amavugurura ajyanye n’uburyo uyu muryango wakwihaza aho gutegereza inkunga z’amahanga.

Ayo mavugurira agamije kurushaho kunoza imikorere ya AU n’ibigo biyishamikiyeho kugira ngo birusheho gutanga umusaruro ubikura ku kurambiriza ku nkunga z’amahanga.

NEPAD ni gahunda ya AU igamije iterambere rya Afurika yemejwe mu nama ya AU y’Abakuru b’Ibihugu na za Guverinoma yabereye i Lusaka muri Zambia muri Nyakanga 2001. Gusa yagiye igorwa no kwibona neza mu mikorere y’Umuryango wa Afurika Yunze Ubumwe.

Umumaro wayo wari ujyanye neza n’intego z’icyerekezo cy’iterambere rya Afurika 2063, Afurika Yunze Ubumwe yihaye mu 2013, kijyanye n’ishyirwa mu bikorwa ry’imishinga Afurika ihanze amaso mu gihe kizaza, bigizwemo uruhare n’abikorera.

Inteko Rusange ya AU yabaye muri Nyakanga umwaka ushize yemeje ko hashyirwaho Ikigo cya Afurika yunze Ubumwe gishinzwe iterambere, nk’urwego rwa tekiniki rwa AU, rufite amategeko yihariye arugenga n’imiterere yarwo.

AUDA-NEPAD yahawe inshingano zo gutanga ubufasha no kugira inama ibihugu binyamuryango bya AU ku ngamba z’iterambere bifite, kongerera ubushobozi no kubifasha kuzishyira mu bikorwa, gusesengura ibikorwa byabyo no kubitera inkunga mu bijyanye no kongerera ubushobozi abafatanyabikorwa n’ibindi.

Umuyobozi Mukuru wa AUDA-NEPAD, Dr. Ibrahim Mayaki, yavuze ko icyo kigo kizagira akamaro gakomeye mu guhuza ibikorwa by’ibihugu bigize AU no kubikurikirana.

Ati “Ikigo kizagira akamaro gakomeye mu guhuriza hamwe ibikorwa bya AU binyuze mu gutanga inama n’ubufasha bwimbitse ku bihugu binyamuryango bya AU n’imiryango y’ubukungu igize akarere.”

Yavuze ko AUDA-NEPAD izanagira uruhare rukomeye mu kwihutisha ukwihuza ku bihugu bya Afurika n’ishyirwa mu bikorwa ry’isoko rusange rya Afrurika (AfCFTA).

Amavugurura Kagame yayoboye, yagaragaje ko kugira ngo AU yihaze mu ngengo y’imari hakwiriye umusoro wa 0.2 % ku bicuruzwa biva mu mahanga, buri gihugu kikayatanga buri mwaka.

Intego ni ukubona nibura miliyari 1.2 z’amadolari azajya afasha ibikorwa bya AU buri mwaka, igasezerera inkunga z’amahanga.

Muri Mutarama 2018 Perezida Kagame yari yasabye ko NEPAD isuzumwa kugira ngo irusheho gutanga umusaruro

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza