Museveni yise abaminisitiri be ba ‘Nyamwigendaho basinzirira mu kazi’

Yanditswe na Evariste Nsengimana
Kuya 8 Gashyantare 2019 saa 09:03
Yasuwe :
0 0

Perezida wa Uganda, Yoweri Kaguta Museveni, yagaragaje abagize guverinoma ye nk’abantu basinziriye, bikunda, batumva kandi ntibagire icyo bakora ku bibazo bibangamiye ishoramari mu gihugu cyabo.

Museveni yabibwiye abashoramari b’imbere mu gihugu n’abanyamahanga, mu biganiro bagiriye i Entebbe muri Perezidansi, bibaye ku nshuro ya gatandatu.

Byabaye kuri uyu wa Kane, bihuje abashoramari mu rwego rw’ubukerarugendo, ubuhinzi, ingufu, ubwikorezi, amabuye y’agaciro, ibiganiro byaranzwe no kugaragaza ibibangamira ishoramari muri Uganda.

Intumwa ya Leta ya Bangladesh muri Uganda, Muhamood Hudda, yavuze ko Minisiteri y’ubuhinzi muri Uganda, idakora ibishoboka mu kwimenyekanisha no kumenyekanisha ibikomoka ku buhinzi ku isoko mpuzamahanga.

Umuyobozi w’ikigo cy’ubwikorezi cya Saba Gifco, Ali Makki, yabwiye Museveni ko nk’ikamyo ya Uganda isoreshwa amadolari 200$ iyo igiye muri Kenya nyamara iyo muri Kenya igasoreshwa 80$ gusa igiye kwinjira muri Uganda.

Museveni yavuze ko abaminisitiri basinziriye nyuma y’uko Minisitiri w’Ubuhinzi, Christopher Kibanzanga, agaragaje ko urwego rw’ubuhinzi ruri gutera imbere bigizwemo uruhare n’abikorera, Guverinoma ikwiye kurufasha gusa mu bushakashatsi no kwagura ibikorwa.

Daily Monitor yanditse ko uyu muyobozi yashyizwe mu majwi ko Minisiteri ayobora idafasha abikorera gushinga ibigo mu buryo bashobora kubona inyungu.

Museveni yavuze ko mu biganiro nk’ibyo abaminisitiri bagira amahirwe yo guhura n’inzobere ariko ntibagire umusaruro babibyaza, bakirebera inyungu zabo gusa.

Ati “Benshi mu baminisitiri banjye barasinziriye, barikunda ndetse batekereza ku nyungu zabo gusa. Abaturage ba Uganda bazi uko bumva iyo babwiwe ibintu by’ukuri, ubwo nibwo buryo dukoresha mu kubaka iterambere, twigira kandi twumvira ku bandi.”

Mu kiganiro yagiranye n’abanyamakuru, bamubajije impamvu atirukana abaminisitiri basinziriye kandi ariwe wabishyiriyeho, Museveni yagize ati ‘Sibo gusa basinziriye n’abandi banya-Uganda barasinziriye’.

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza