Muri Sudani y’Epfo hongeye kugaragara imbasa

Yanditswe na Ishimwe Alain
Kuya 27 Ukwakira 2020 saa 02:18
Yasuwe :
0 0

Nyuma y’amezi abiri, Komisiyo ishinzwe gutanga ibyemezo mu Karere ka Afurika, Africa Regional Certification Commission (ARCC) itangaje ko Afurika yigaranzuye indwara y’Imbasa, Minisiteri y’Ubuzima muri Sudani y’Epfo yatangaje ko iyi ndwara yongeye kugaragara mu ntara eshanu zo muri iki gihugu.

Umukozi muri Minisitiri y’Ubuzima muri iki gihugu, Dr John Rumunu, yavuze ko ubu bwandu bushya bw’imbasa bwagaragaye bufite inkomoko ku rukingo (vaccine-derived polio) aho kuba kuri virusi ubwayo.

Ati “Iyi ndwara y’imbasa yadutse ikomoka ku rukingo ntabwo ari kuri virusi ya polio. Kugeza ubu dufite abanduye 15 bari mu ntara eshanu.”

Dr Rumunu yakomeje avuga ko mu rwego rwo guhashya iki cyorezo gikunda kwibasira abana bari munsi y’imyaya itanu, leta igiye gukaza gahunda yo gukingira abana.

Yagize ati “Mu gihugu hose hagomba gukingirwa abana barenga miliyoni 1.4, bikazakorwa mu ntara 45 zo muri leta 10. Ibi bikazakorwa mu byiciro bibiri guhera mu cyumweru cya mbere cy’ Ugushyingo.”

Indwara y’imbasa iterwa na virusi kandi yandura. Iyo uyirwaye atavuwe neza, ashobora gukurizamo ubumuga bushobora no kumuhitana. Iyi ndwara ikunze kwibasira abana bari munsi y’imyaka itanu, aho yakunze kugaragara cyane mu bihugu bya Afurika birimo Nigeria, Cameroun, Centrafrique na Sudani y’Epfo.

Muri iki gihugu hongeye kugaragara abantu bafite iyi ndwara mu gihe hari hashize igihe gito Ishami ry’Umuryango w’Abibumbye ryita ku Buzima (OMS, ritangaje ko yahacitse burundu.

Indwara y'imbasa ishobora gutere ubumuga butandukanye iyo itavuwe neza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .