00:00:00 IGIHE NETWORK KN KINYARWANDA EN ENGLISH FR FRANCAIS

MONUSCO yashinjwe uruhare mu gutuma FDLR yisuganya

Yanditswe na Musangwa Arthur
Kuya 31 July 2022 saa 01:23
Yasuwe :

Ingabo z’Umuryango w’Abibumbye ziri mu butumwa bwo kugarura Amahoro muri RDC, MONUSCO, zashinjwe ko zarebereye abarwanyi ba FDLR bari bamaze gushyirwa mu nkambi bagasubira mu mashyamba, none ibikorwa bibi byabo birakomeje.

Muri iki gihe Ingabo za Leta (FARDC) zikomeje guhangana n’Umutwe wa M23, zishinjwa ko zirimo gufatanya n’imitwe yitwaje intwaro irimo FDLR. Ni ibintu ngo biba MONUSCO irebera, ku buryo biyigira umufatanyacyaha.

Ni mu gihe ku rundi ruhande, abaturage bamaze iminsi bigaragambya basaba izi ngabo gutaha, kuko nta cyo zibamariye.

Ni ingabo n’abapolisi bamaze imyaka irenga 20 mu Burasirazuba bwa RDC, ariko bananiwe kugarura amahoro kubera ko hakomeje kugarizwa n’ibikorwa by’imitwe yitwaje intwaro.

Abaturage bamaze iminsi barariye karungu, basaba MONUSCO gutaha. Imyigaragambyo ikomeye yabereye mu bice bya Goma ndetse na Butembo - umujyi wa gatatu munini muri Kivu ya Ruguru, yahitanye abantu 15 barimo abapolisi babiri n’umusirikare umwe wa MONUSCO.

Umushumba wa Diyosezi ya Butembo-Beni, Musenyeri Sikuli Paluku Melchisédech, yanenze uburyo izi ngabo zakomeje gukurikirana ibibazo bitandukanye by’umutekano.

Yatanze urugero ku kibazo cya FDLR, aho hari abarwanyi benshi baje gushyira intwaro hasi, bamara imyaka itatu mu Nkambi ya Kanyabayonga icungwa na MONUSCO.

Mu Ugushyingo 2018 ngo baje kwimurirwa mu bihe byo hafi ya Goma ariko ngo ntibageze mu Rwanda. Ikinyamakuru Actualite.cd cyaje kwandika ko himuwe abarwanyi 352 ba FDLR.

Musenyeri Sikuli yavugiye kuri Radio Moto ya Kiliziya yo muri RDC ati "Iyo twumvise umukozi wa MONUSCO avuga ko nta Banyarwanda bakiri muri Congo, ni ikinyoma kubera ko ntibigeze badusubiza ikibazo cy’irengero ry’abarwanyi ba FDLR bari barahurijwe hamwe na Monusco i Kanyabayonga muri diyosezi yanjye."

"Mu gihe runaka ntibakivugwa, kandi nyuma yaho ubwicanyi bwariyongereye. Ikizwi neza ni uko batatashye mu Rwanda."

Kuri iyi ngingo avuga ko batatashye mu Rwanda kubera ko atahawe ikaze, mu gihe hari abarwanyi benshi ba FDLR bakiriwe mu gihugu muri uriya mwaka, mbere na nyuma yawo.

Yakomeje ati "Muri make bongeye gusakara muri diyosezi no mu nkengero zayo."

Musenyeri Sikuli asaba Leta ya Congo gusuzuma amasezerano yagiranye na MONUSCO, hakarebwa koko niba ikwiye kuba ikiri ku butaka bwa RDC.

Yavuze ko MONUSCO ikwiye kwibwiriza ikagenda, kuko ibi bikorwa byose nibimara kurenga abaturage, ingaruka zabyo zishobora kuba mbi kurushaho.

Yakomeje ati "Ni bo bakwiye gufata icyemezo. Basanze nta mwanya bagifite hano, kubera iki bahaguma? Bakwiye kuvuga bo ubwabo ngo reka dutange umwanya, tukareba uko bigenda. Ntibakwiye gutuma abaturage bagera aho hose. Ni ikintu cyakorwa hakurikijwe amasezerano, ubwumvikane hagati y’Umuryango w’Abibumbye na Leta yacu."

Yavuze ko mu myaka 20 bahamaze, aba basirikare b’Umuryango w’Abibumbye bananiwe kubahiriza inshingano zo kurinda abasivili.

Musenyeri Sikuli yakomeje ati "Niba nta mpinduka tubona se tubikomere amashyi? Ibyiza bakoze turabishima, ariko n’aho bananiwe dukwiye kugaruka ku kababaro dukomeza guhura nako, bitandukanye n’ubutumwa bwabo bwo kurinda abasivili. Abasivili bakomeje kwicwa."

Ubufatanye bwa FARDC na FDLR ni imwe mu ngingo zagarutsweho kandi mu kiganiro Perezida Paul Kagame yagiranye na RBA ku wa Mbere, tariki 4 Nyakanga 2022. Yavuze ko RDC ishyigikira FDLR ihungabanya umutekano w’u Rwanda.

Ati “Ntabwo ari byo, nta shingiro bifite ahubwo RDC ishyigikira FDLR kandi ikibabaje ni uko Monusco, ingabo za Loni ziri muri Congo zibizi. Ni na ko byagenze ijya kurasa ku butaka bw’u Rwanda. Hari ibyagiye biba kuva mu 2019 ubwo FDLR yinjiraga ku butaka bwacu mu Kinigi ariko ikaza guhashywa n’ingabo zacu, yari yaturutse muri RDC ndetse barahawe intwaro na RDC.”

U Rwanda ruheruka gushinja MONUSCO kurebera mu bikorwa bya FARDC na FDLR, ahubwo ikarenga igakorana n’urwo ruvange rw’ingabo.

Abaturage bakomeje gusaba MONUSCO kuva ku butaka bwa RDC
Muri Butembo bakoze ikiriyo cyo kunamira abaturage baguye mu myigaragambyo yamagana MONUSCO

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .