00:00:00 IGIHE NETWORK KN KINYARWANDA EN ENGLISH FR FRANCAIS

Monusco yahaye icumbi Mai Mai na FDLR mu kigo cyayo

Yanditswe na Bukuru JC
Kuya 10 June 2022 saa 10:58
Yasuwe :

Umutwe wa Monusco wahaye icyicaro abarwanyi ba FDLR na Mai Mai Nyatura mu birindiro byawo biri i Shangi ku wa 7 Kamena 2022, aho 17 bahungiye muri icyo kigo bihisha imirwano ya M23.

M23 ihanganye n’igisirikare cya Congo, FARDC. Amakuru yizewe agera kuri IGIHE ni uko abarwanyi 17 ba FDLR na Nyatura bahungiye mu kigo cya Monusco kiri i Shangi ndetse bari banakirimo ku wa 8 Kamena nyuma yo kumererwa nabi n’umutwe wa M23 mu mirwano yabereye i Rutshuru na Masisi.

Amakuru yizewe avuga ko igisirikare cya Congo, FARDC, ari cyo cyafashije iyi mitwe kugera kuri Monusco ariko ko byakozwe mu ibanga rikomeye.

Umwe mu bantu bizewe bahaye IGIHE amakuru yatangaje ati “Twasabwe kwirinda kubwira bagenzi bacu ibyabaye, mu kwirinda ko amakuru yasakara.”

Yakomeje avuga ko Monusco yabanje kugisha inama ubuyobozi bwayo, bwemera ko abo barwanyi bashyikirizwa FARDC ariko mu ibanga. Ingabo za Loni zabashyikirije Gen. Maj Chirimwami ukuriye ubutumwa bwo kugarura amahoro mu Burasirazuba bwa Congo buzwi nka Sokola2.

Hari andi makuru avuga ko hari abandi barwanyi ba FDLR na Nyatura bagera kuri 20 bahungishijwe bagashyikirizwa FARDC mu bice bya Rumangabo.

Aba barwanyi bahawe icumbi na Monusco mu gihe mu nshingano zayo ziyibesheje muri RDC harimo no kurwanya imitwe y’iterabwoba yayogoje Uburasirazuba bwa RDC.

Ni mu gihe kandi bimaze iminsi bivugwa ko Monusco yemeye gufatanya na FARDC mu rugamba rwo kurwanya umutwe wa M23 kandi ibizi neza ko igisirikare cya Congo cyunze ubumwe n’indi mitwe y’iterabwoba irimo FDLR.

Monusco imaze igihe inengwa kubera imikorere yayo idahwitse, yagaragaye mu buryo ikoresha irwanya imitwe yitwaje intwaro.

Urugero rwa hafi ni uburyo mu 2013 yagize uruhare mu guhashya umutwe wa M23 ariko ikirengagiza indi mitwe nyuma yaho irimo nka FDLR, RUD - Urunana, FPP na CNRD/FLN.

Hari n’indi mitwe nka ADF Nalu ibarizwa muri Ituri na Beni, ubu ahubwo ifitanye umubano mwiza n’abarwanyi ba Mai Mai.

Guverinoma y’u Rwanda iherutse kugirana ibiganiro n’abahagarariye ibihugu byabo mu gihugu, ibagezaho ibibazo bya Repubulika Iharanira Demokarasi ya Congo birimo imyitwarire y’ingabo zoherejweyo kubungabunga amahoro, Monusco.

Minisitiri w’Ububanyi n’Amahanga, Dr Vincent Biruta, mu kiganiro n’abanyamakuru kuri uyu wa Kabiri tariki 31 Gicurasi 2022, yavuze ko ingabo za RDC zirimo gukorana na FDLR mu mugambi wo kuyifasha kugera hafi y’u Rwanda ngo ijye iruhungabanyiriza umutekano.

Ati “FARDC, ni ingabo za DRC, uyu munsi amakuru dufite ni uko bafatanyije na FDLR, baza kurwana, babahaye impuzankano, akaba ari bo bashyira imbere ariko urumva FARDC ifite gahunda yayo, FDLR ifite gahunda yayo, ni ukugira ngo bagere ku mupaka w’u Rwanda noneho babashe kujya bakora ibikorwa byabo by’iterabwoba mu Rwanda".

Yakomeje agira ati "Bararwanana, ubungubu baravanze rwose wagira ngo ni igisirikare kimwe, inama barazikora bagahuza gahunda y’ibyo bagiye gukora, ni ibintu bizwi. Ariko noneho bakazana na Monusco ikaza ngo ije gushyigikira FARDC".

Mu nshingano za Monusco harimo kurwanya imitwe yitwaje intwaro yose ariko yo ngo yahisemo kurwanya M23 yonyine, ifatanyije n’ingabo za RDC.

Minisitiri Dr Biruta yavuze ko babonanye n’abahagarariye ibihugu byabo mu Rwanda bakababwira icyo kibazo cyane cyane icy’ingabo za Loni (Monusco), aho ingabo zajyanyweyo zigiye kugarura umutekano mu burasirazuba bwa RDC no kurwanya iriya mirtwe yitwaza intwaro, zihitamo abo zirwanya ndetse zikagira n’abo zikorana na bo.

Ati "Kuko iyo ukoranye na FARDC uziko irimo FDLR, uba wahisemo gukorana na FDLR. Ngira ngo ejob undi mwarabibonye aho abasirikare bavuga ko bafashwe, bariya bashimuswe ku mupaka, bagiye ngo kubabaza, baboshye, hari ingabo za FARDC, hari n’ingabo za Monusco. Ubwo rero twababazaga, iyo ingabo za Monusco zigiye mu bikorwa nka biriya, bakareba umuntu uri ku ngoyi, nayo ikaba mu babaza ibibazo, biriya nibyo batumwe hariya?”

Monusco imaze igihe yarahisemo kwiyunga n'imitwe yitwaje intwaro ibarizwa mu Burasirazuba bwa Congo aho guhagurukira kuyirwanya

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .