00:00:00 IGIHE NETWORK KN KINYARWANDA EN ENGLISH FR FRANCAIS

Misiri irashinjwa kuneka abitabiriye inama ya COP 27

Yanditswe na Ntabareshya Jean de Dieu
Kuya 15 Ugushyingo 2022 saa 06:19
Yasuwe :

Abitabiriye inama Mpuzamahanga yiga ku mihandagurikire y’ibihe no kubungabunga ibidukikije ya COP 27 iri kubera mu Misiri batangaje ko iki gihugu cyagerageje gukora ibikorwa byo kubaneka.

Ibi byatangajwe n’urwego rushinzwe umutekano mu Muryango w’Abibumbye, (UNDSS) ku wa Mbere tariki ya 14 Ugushyingo 2022 yerekana ko yakiriye ibirego bikomeye bishinja Misiri kugerageza kwinjira mu makuru y’ibanga y’abitabiriye iyi nama.

Urugero ni Minisiteri y’Ububanyi n’Amahanga y’u Budage, yatangake ko byari byitezweho ko abitabiriye iyi nama bazakora buri kimwe ariko bafite n’impungenge ku mutekano wabo.

Ubundi ahaberaga inama hacungirwaga umutekano na UNDSS na Polisi ya Misiri, kandi hari n’ibindi bice bitandukanye bicungwa n’ishami ry’umuryango w’Abibumbye n’abakozi ba Misiri bemejwe na Loni.

Umuyobozi wari uyoboye abanya Misiri muri iyi nama Wael Aboulmagd yatangaje ko ibivugwa ari ibihuha bidafite ishingiro kuko nta raporo n’imwe yigeze igaragaza ko hari umupolisi witwaye nabi mu gihe cy’inama.

Bivugwa ibirego bishinja Misiri kuneka abitabiriye inama byatangiye guhwihwizwa kuri Pavilion y’u Budage mu cyumweru gishize ngo birangajwe imbere na mushiki wa Abdel Fattah umunyapolitiki ufunzwe.

Ku ruhande rw’abitabiriye iyi nama bagaragaza ko bagiye babona uburyo Camera zabarebaga bigatuma bagira impungenge ko buri kimwe cyose kiri kunekwa na Guverinoma ya Misiri.

Umwe muri bo ni Liane Schalatek watangiye kuyitabira guhera mu 2008 ariko yabwiye igitangazamakuru cyo mu Budage ZDF ko kuri iyi nshuro abantu batari bisanzuye.

Ati “Ntabwo abantu bari batekanye nk’izindi zabanje.”

Hari umwe mu miryango iharanira uburenganzira bwa muntu muri Leta zunze ubumwe za Amerika watanze umuburo ubwo iyi nama yari iri kuba.

Uyu muryango waragagaje ko hari ibikorwa byo kuneka no gushakisha amakuru ku bitabiriye bikaragazwa no guha ibikoresho byabugenewe nka camera abakora akazi ko gutwara abantu muri uyu mujyi (taxi).

Hari kandi na porogaramu yo muri telefoni yafashaga abitabiriye inama kwiyandikisha ngo yasabaga uburenganzira telefoni bwo kugera kuri mikoro ya telefoni n’aho umuntu aherereye.

Iyi nama ya COP 27 yitabiriwe n’abayobozi batandukanye b’ibihugu, abagize za guverinoma, ibigo bikomeye ku Isi biri mu birebana no kubungabunga ibidukikije, abikorera n’abayobozi mu nzego zitandukanye mu Muryango w’Abibumbye.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .