Kutumvikana gushobora kudindiza amasezerano y’ubucuruzi hagati ya EAC n’u Bwongereza.

Yanditswe na Ndahayo Emmanuel
Kuya 25 Kanama 2020 saa 01:09
Yasuwe :
0 0

Ibihugu bigize Umuryango wa Afurika y’u Burasirazuba, EAC, bishobora guhomba amahirwe yo gusinyana amasezerano y’ubucuruzi n’igihugu cy’u Bwongereza, gisanzwe ari umufatanyabikorwa ukomeye w’aka karere.

Ibi biri guterwa n’uko ibihugu bigize uyu muryango bitari kumvikana ku gihe amasezerano agomba gushyirirwa mu bikorwa, aho ibihugu birimo Kenya n’u Rwanda byifuza ko ibintu byakwihutishwa mu gihe Uganda n’ibindi bigishaka guhabwa umwanya uhagije wo gusesengura ingingo bazajyana ku meza y’imishyikirano.

Ibi ariko ntibikuraho ko igihe kiri kuyoyoka kandi ibihugu bitarahuriza ku cyo bizajyana mu masezerano n’u Bwongereza; bwo buvuga ko agomba kuba ahuriweho n’Umuryango, aho kuba buri gihugu ukwacyo.

Amasezerano y’ubucuruzi asanzweho hagati ya EAC n’u Bwongereza azarangirana n’uyu mwaka, bivuze ko hasigaye amezi ane gusa yo kumvikana ku masezerano avuguruye.

Igiteye impungenge ni uko ibi bihugu bitari no gukoresha igihe gito bisigaranye neza, kuko mu minsi ishize, mu nama yo gutegura ibyo uyu Muryango uzerekana mu gihe cy’imishyikirano, ibihugu birimo u Burundi, Tanzania na Sudani y’Epfo bititabiriye, ni mu gihe ku ngengabihe isanzwe, akarere kakagombye kuba kararangije kumvikana mu mpera za Nzeri.

Nyuma yo kubona ko ibiganiro biri kugenda biguru ntege, Kenya n’u Rwanda byasabye kuganira n’u Bwongereza ukwabyo noneho ibindi bihugu bigize Akarere bikazashyirwa mu masezerano igihe bizaba byiteguye. Iki gitekerezo ariko cyakumiriwe n’igihugu cya Uganda.

Mu gihe aya masezerano akomeje kudindira, igihugu cya Kenya, cyifata nk’ikizabihomberamo kurusha ibindi, gishobora kwishakira uburyo gikomeza inzira y’ibiganiro n’u Bwongereza, mu gihe ibindi bihugu byakomeza gutwara ibintu gacye.

Kenya ni cyo gihugu cy’Akarere gikorana ubucuruzi buhambaye n’u Bwongereza. Nko mu mwaka ushize, iki gihugu cyohereje mu Bwongereza ibicuruzwa bifite agaciro ka miliyoni 393$, mu gihe cyakuyeyo ibifite agaciro ka miliyoni 349$.

Ku rundi ruhande, nk’igihugu cya Tanzania cyacuruje n’u Bwongereza ibicuruzwa bifite agaciro ka miliyoni 60$ gikurayo ibya miliyoni 170$ mu mwaka wa 2018. Mu gihe Uganda yohereje ibya miliyoni 10$ ikavanayo ibya miliyoni 81$.

Umunyamabanga Uhoraho Ushinzwe Ubucuruzi muri Kenya, Johnson Weru, yabwiye The East African ko “icyemezo kizaba gikubiyemo amahitamo yo gusaba uburenganzira bwo gukomeza amasezerano ku giti cyacu (variable geometry) kizafatwa mu minsi micye iri imbere”.

‘Variable geometry’ ni uburyo igihugu kimwe kiri mu muryango mugari n’ibindi, gihabwa uburenganzira bwo gukorana amasezerano y’ubucuruzi n’ibindi bihugu; ayo masezerano akaba akireba cyonyine, aho kuba akarere cyangwa umuryango kibarizwamo.

Muri Nyakanga, Perezida Uhuru Kenyatta wa Kenya yagiranye ibiganiro kuri telefoni na Minisitiri w’intebe w’u Bwongereza, Boris Johnson, bigamije kwemeza ko ibiganiro by’ubucuruzi hagati y’ibihugu byombi bizakomeza nyuma ya Brexit.

Mu gihe ibihugu by’Akarere byakomeza kwinangira, ngo Kenya ‘ishobora kwirengangiza ibiganiro bya EAC igakomeza yonyine mu rwego rwo kurengera inyungu z’abacuruzi bayo’ bashobora guhomba cyane igihe baramuka batakaje isoko rinini nk’u Bwongereza.

Ku ruhande rw’ubuyobozi bwa EAC, Umuyobozi Mukuru wa Gasutamo n’Ubucuruzi muri EAC, Kenneth Bagamuhunda, aherutse kuvuga ko ibiganiro bikomeje, n’ubwo atatangaje aho bigeze.

Ku ruhande rw’u Bwongereza, EAC nimara kumvikana, amasezerano azakorwa hakurikijwe imbata y’amasezerano hagati ya EAC n’Umuryango w’Ibihugu by’Ubumwe bw’u Burayi (EU), kuko “kuyahindura cyane byasaba gushyiraho amashya kandi byatwara imyaka myinshi [kugira ngo amasezerano yumvikanweho]”.

Ibihugu bya EAC ntibiri kumvikana ku masezerano bizagirana n'u Bwongereza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .