00:00:00 IGIHE NETWORK KN KINYARWANDA EN ENGLISH FR FRANCAIS

Kenyatta mu ikinamico! Nairobi yakubise igihwereye

Yanditswe na Musangwa Arthur
Kuya 7 Ukuboza 2022 saa 03:45
Yasuwe :

Amatsiko yari menshi cyane hategerejwe ikizava mu biganiro by’abanye-Congo, byari bimaze icyumweru bibera mu cyumba cya hotel Safari Park Hotel i Nairobi, aho imitwe yitwaje intwaro 53 yaganiraga na Guverinoma ya RDC ku muti w’amahoro arambye mu Burasirazuba bw’iki gihugu.

Ibi biganiro byari bihurije hamwe imitwe yitwaje intwaro ikorera mu ntara za Kivu y’Amajyaruguru, Kivu y’Amajyepfo, Ituri, Maniema na Tanganyika. M23 ntabwo yatumiwe nubwo ari yo igaragara cyane nk’ihangayikishije Leta ya Congo.

Amakuru avuga ko mu cyumba cy’ibiganiro hari hahuriyemo abantu bagera kuri 350, barimo abagera muri 50 bahagarariye imitwe yitwaje intwaro. Byayobowe n’umuhuza Uhuru Kenyatta wayoboye Kenya imyaka 10, Macharia Kamau wari uhagarariye Kenya na Prof Serge Tshibangu wari uhagarariye Perezida Tshisekedi.

Ni ibiganiro byatangiranye impaka n’urujijo ku babikurikiraniye hafi kuko mu babyitabiriye harimo abadafite inshingano zizwi cyangwa abo bahagarariye. Ni mu gihe Leta ya Congo yemeje ko abitabiriye bose bagenzuwe mbere y’ibiganiro.

Umutwe wa M23 wari ku isonga ya nyirabayazana w’ibiganiro ntabwo watumiwe, ni ibintu biteye urujijo ariko bikaba n’ikosa rikomeye kuko hibazwa ibyavugirwa mu biganiro M23 ishinjwamo na leta kandi yo idahari.

M23 yari imaze igihe mu mirwano n’ingabo za Congo, FARDC, ndetse yigaruriye ibice bitandukanye bya Kivu y’Amajyaruguru nka Bunagana, Kiwanja, Rutshuru n’ahandi. Icyakora, uyu mutwe waraye wemeye guhagarika imirwano no kuva mu bice wari wafashe.

Mu batumiwe mu biganiro bya Nairobi harimo imitwe yagaragaje ubufatanye na Leta. Raporo nyinshi zerekanye ko hari inama ya Pangi muri Walikare, yahuje Leta ya Congo n’imitwe nka FDLR, Maï-Maï, Nyatura n’iyindi, bemeranya ubufatanye mu kurwanya M23.

Umusesenguzi mu bya politiki, amategeko akaba n’umunyamakuru, Gatabazi Tite, asobanura ko mu gutumira abitabiriye ibiganiro habayemo ikibazo kuko iyo usesenguye abari babirimo kugeza ku munota wa nyuma ntawe urwanya leta wari uhari.

Ati “Nta muntu n’umwe wagiye muri iyi nama ya Nairobi wagaragaje ko arwanya leta. Bikaba bivuze ko Leta ya Congo yerekanye ibimenyetso byinshi kandi kenshi ko idashaka ko ibiganiro bigera ku ntego. Ku bw’ibyo, bashyize igitutu gikomeye ku muhuza kugira ngo adahura na M23, bituma mu batumiwe itabamo ahubwo hatumirwa abo leta yahisemo”.

Ibi ngo bisobanura impamvu kuva ku munota wa mbere leta ya Congo yarwanyije ko hari ibyemezo idashaka byava muri iyi nama, ihereye ku kugena abazayitabira.

Akaduruvayo mu biganiro

Ubwo ibiganiro bya Nairobi byari birimbanyije, ibyo Leta ya Congo yakoze bigaragaza ko yarimo ivangira cyangwa idindiza biriya biganiro.

Ku ikubitiro mu cyumweru gishize Itsinda rya Guverinoma ya Congo ryavuze ko ibikoresho byo gusemura ari ibyoherejwe n’u Rwanda batabishaka. Prof. Serge Tshibangu uhagarariye Leta ya Kinshasa yasabye ko uburyo bakoreshaga mu gusemura busenywa, ibyo bikoresho bigasimbuzwa ibindi biturutse i Kinshasa.

Leta ya Congo kandi yashumurije aba-Maï-Maï ngo bajye kwica Abanyamulenge. Ibi byari ukugira ngo abahagarariye Abanyamulenge bababazwe n’ibiri gukorerwa benewabo bityo barakare bave mu biganiro.

Gatabazi avuga ko ibi byabaye, Leta ikavuga ko ‘abanyamulenge banze ibiganiro, nyamara ari ubushotoranyi bwabaye kugira ngo itere iniyikirize mu biganiro’.

Icya gatatu Leta ya Congo yakoze mu biganiro ni ukubona intumwa yihariye ya Perezida Tshisekedi, Prof. Serge Tshibangu akoresha icyubahiro afite akajya mu biro ku muhuza akamubwira ngo bamuhe insimburamubyizi z’abitabiriye ibiganiro ngo azibahe, aho kubikora akayakubita umufuka bigateza intugunda mu biganiro.

Ibi byatumye Uhuru Kenyatta arakara avuga ko ‘abayatwaye bayasubiza ako kanya’. Mu busesenguzi, ibi ntabwo byari bigamije kwiba ariya madolari, ahubwo byari bigamije guteza akaduruvayo mu biganiro.

Ubwicanyi bwa Kishishe, ni bwo busa nk’aho ari ubwa mbere Leta ya Congo ibonye ku butaka bwayo kuva mu myaka yose abantu bicwa mu Burasirazuba bw’iki gihugu. Yarahagurutse irabwamagana [ni byiza], isaba iperereza ndetse inohereza Minisitiri w’Ubutabera i La Haye kujya kurega, ishyiraho icyunamo cy’iminsi itatu.

Gatabazi yavuze ko bitangaje kubona Guverinoma ya Congo ari yo yamagana ubwicanyi mu gihe raporo zose za Loni zerekana ko FARDC ziba, zigafata abagore ku ngufu, zikica, zigasenya ibikorwaremezo bafatanyije na FDLR, Nyatura na Mai Mai.

Ati “Kwirengagiza izo raporo zose n’ibyo bikorwa by’iyicarubozo by’ingabo za Congo, bagasimbukira ibya Kishishe birasa no gutera igihu ku itangazo ry’Umujyanama wihariye y’Umunyamabanga Mukuru wa Loni, Alice Wairimu Nderitu, wavuye muri RDC mu Ugushyingo 2022, akavuga ko harimo gukorwa Jenoside”.

Yakomeje avuga ko ibi Guverinoma ya Congo yabikoze kugira ngo abantu badakomeza kuvuga iby’iryo tangazo ahubwo bahugire ku bwicanyi bwa Kishishe.

Nairobi yakubise igihwereye

Ibiganiro bya Nairobi byavuyemo imyanzuro irimo guhagarika imirwano kw’imitwe yitwaje intwaro, gushyiraho itsinda rihuriweho na RDC, EAC n’imitwe yitwaje intwaro kugira ngo hakurikiranwe uburyo abarwanyi b’iyi mitwe bafunzwe nta byaha bashinjwa bashobora kurekurwa ndetse iyi mitwe ikarekura abana bari mu gisirikare bakakivamo.

Indi myanzuro yavuye mu biganiro bya Nairobi, yaciye benshi intege ndetse ab’inkwakuzi bahamya ko ibyaganiriwe ntaho bihuriye n’ikibazo gihari.

Gatabazi avuga ko kubona imyanzuro ya Nairobi bavugamo ngo abaturiye pariki ya Virunga bazakorerwe imishinga irengera ibidukikije kandi bagire uruhare rutaziguye muri yo, ari ikintu kitumvikana.

Abo muri Maniema basabiwe n’ibiganiro by’amahoro bya Nairobi ko bagira icyo bungukira mu nyungu ziva mu bikorwa by’ubucukuzi bw’amabuye y’agaciro.

Nta mwanzuro n’umwe ureba M23 wafashwe uretse ko Kenyatta yavuze ko ’ko afite icyizere cy’uko M23 izubahiriza ibyo yasabye mu biganiro bya Luanda, harimo guhagarika imirwano no kurekura uduce yafashe twa Rutshuru, Bunagana na Kiwanja kugira ngo abone kuganira nayo.

Ati “Nibubahiriza biriya byasabwe, bazitabira ibiganiro kandi bazagira uruhare mu rugendo rukomeza rwo gushaka amahoro”.

Umutwe wa M23 waraye wemeje ko witeguye guhagarika imirwano ndetse ukava mu duce umaze kwigarurira, nk’uko wabisabwe mu nama iheruka kubera i Luanda muri Angola, nubwo utayitumiwemo.

Mu minsi ya mbere y’iyi biganiro, abasesenguzi bavugaga ko Kenyatta arimo kwitwara nk’umuntu ufite izindi nyungu ashaka kurengera anyuze mu kwiyoroshya akagendera mu murongo wa Leta ya Congo, kurusha kwerura agakanda ahari ikibyimba, agamije umuti w’ikibazo cy’umutekano muke.

Ni inyungu benshi bahuza n’ubucuruzi abashoramari b’abanya-Kenya bafite muri RDC muri iki gihe kandi Kenyatta afitemo ukuboko, ku buryo kugira ngo busagambe agomba kubereka ko bari kumwe muri ibi bihe bashaka kwikoma u Rwanda.

Gatabazi avuga ko ibi bitera kwibaza uruhare rw’umuhuza Kenyatta nka Perezida wayoboye Kenya imyaka 10, uzi neza ikibazo cyo muri RDC neza cyane.

Ati “Kubona aba umuhuza byari akarusho kandi yari afitiwe icyizere ko ntawamubeshya cyangwa ngo amuyobye mu kibazo cy’Uburasirazuba bwa Congo. Kubona ajya muri RDC akagera i Goma, M23 iri hafi aho muri gahunda ye ntashyiremo guhura nabo byatumye abantu batangira gukemanga umusaruro uzava mu buhuza bwe”.

“Iyo urebye imyanzuro yavuze Nairobi, benshi bacitse intege bavuga ko ntacyo bagiteze mu buhuza bwa Kenyatta”.

Ikindi cyerekanye ko ibyo Kenyatta yakoze ari ikinamico ni ukwiha igihe kidashoboka cyo kugenzura ishyirwa mu bikorwa ry’imyanzuro, aho yihaye ko muri Mutarama na Gashyantare azagenzura uko ibyemejwe byubahirizwa.

Ku bw’ibyo, Uhuru Kenyatta ashobora gukekwa ko hari izindi nyungu ari kurengera ariko icyizewe ni uko ubuhuza bwe bushidikanywaho, agashinjwa kubogama. Ibi bituma atakarizwa icyizere.

Ibiganiro by'abanye-Congo i Nairobi byitabiriwe n'abadafite icyo bahagarariye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .