Kenya: William Ruto yasabye abakoresha kutirukana abakozi kubera COVID-19

Yanditswe na Twarabanye Venuste
Kuya 9 Mata 2020 saa 09:39
Yasuwe :
0 0

Visi Perezida wa Kenya William Ruto kuri uyu wa Kane yasabye abakoresha mu rwego rw’abikorera kutirukana abakozi babo kubera icyorezo cya COVID-19 giterwa n’agakoko ka Coronavirus.

Ruto yabibwiye itangazamakuru mu kiganiro cyabereye iwe mu rugo, asaba abayozi b’ibigo by’abikorera, guhindura imikorere abakozi bakajya bakora basimburana ariko bakaguma mu kazi.

Visi Perezida Ruto yanasabye Abanya-Kenya kudakerensa icyorezo cya COVID -19 bagakurikiza amabwiriza bahabwa na Guverinoma.

Ati “Turashaka guhamagarira abikorera ko bagira impuhwe no kumva, by’umwihariko abakoresha gukora impinduka zikenewe zigamije gufasha abakozi no kutagira abirukanwa.”

The Citizen yatangaje ko yongeyeho ngo “Abahinzi bazakomeza gusohoka babyaze umusaruro iyi mvura dukomeje kugira, bahinge ibiribwa byinshi bishoboka.”

Ruto yanakomoje ku ngufu Guverinoma iri gushyira mu kurinda abaganga kugira ngo bakore imirimo yabo batekanye.

Kenya yafashe ahantu hatandukanye ihagira aho kwita ku barwayi ba Coronavirus n’abari mu kato harimo n’ibitanda 600 biri muri Kaminuza yitiriwe Kenyatta. Ruto yanavuze ko basabye Minisiteri y’Uburezi kureba ibigo bicumbikira abana bishobora gukoreshwa, ku bashyizwe mu kato. Biteganyijwe ko Komisiyo y’Umurimo izongera abakozi muri iki cyumweru barimo abaganga 1000 mu rwego rwo kongera imbaraga.

Kenya yikorera ibikoresho bikoreshwa mu guhangana na Coronavirus binyuze muri Laboratwari z’Ikigo cy’Igihugu cy’Ubushakashatsi (KEMSA).

Kuri uyu wa 9 Mata 2020 muri Kenya hagaragaye abandi barwayi batanu ba coronavirus byatumye abayanduye bagera ku 184. Barindwi barapfuye naho 12 barakize.

Visi Perezida wa Kenya William Ruto yasabye abakoresha kutirukana abakozi kubera COVID-19

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .