Haravugwa ko hari imirambo yabonetse mu bishwanyagurike by’isoko rya Westgate i Nairobi muri Kenya, yatewe na Al Shabab.

BBC dukesha iyi nkuru iravuga ko umudepite wo muri Kenya yavuze ko bishoboka ko imwe mu mirambo yabonetse mu nzu y’ubucuruzi ya Westgate, yaba ari iya zimwe mu nyeshyamba zagabye igitero cyishe abantu 67 mu kwezi gushize.

Ndung’u Gethenji uyoboye akanama gakora iperereza kuri icyo gitero, yavuze ko imbunda z’ubwoko bwa AK-47, zakoreshejwe n’izo nyeshyamba zasanzwe ziri hafi y’iyo mirambo.

Amashusho yo kuri video y’imbere muri iryo duka, yerekana ko hari inyeshyamba enye, ariko ubutegetsi buvuga ko abo bagabye igitero bageze kuri 15.

Mu iperereza BBC yakoze, bivugwa ko umwe muri abo bakekwaho kuba baragabye igitero, ari umuntu w’imyaka 23 uturuka muri Norvège, Hassan Abdi Dhuhulow.

Uwo musore yahunze Somaliya afite imyaka icyenda, yimukira muri Norvège n’umuryango we, ariko asubira muri Somaliya amaze gukura.