Umuyobozi w’ikigo cy’amashuri abanza yigize umupfu arokoka igitero cy’intagondwa za Al Shabaab ku modoka itwara abagenzi( bus) cyahitanye abagenzi 28 batashoboye kuvuga ikorowani ku wa gatandatu mu majyaruguru ya Kenya.

Ikinyamakuru The Independent kivuga Douglas Ochwodho, yari atashye iwe kwizihiza impera z’umwaka ubwo imodoka yari arimo yaterwaga n’intagondwa z’Abayisiramu zo mu mutwe w’iterabwoba wa Al Shabaab.

Ochwodho hamwe n’abandi bagenzi batari abayisiramu bategetswe gusohoka mu modoka yari ibatwaye ku mugoroba w’ejo hashize.

Yabwiye ikinyamakuru The Independent ko abatarashoboye kuvuga ikorowani batandukanyijwe n’abandi bagenzi.

Babaryamishije hasi bubitse imitwe, abarwanyi babiri ba Al Shabaab batangira kubamishamo urusasu umwe ahereye iburyo, undi ibumoso bagera kuri Ochwodho, nawe wari uryamye atanyeganyega.

Ochwodho avuga ko bamugeze hejuru bakajijinganya niba hari umwe muri bo wamurashe isasu, ubundi bakagenda batamwishe.

Avuga ko nyuma y’aho, abarwanyi ba Al Shabab bagendeye, yahise atega ikamyo akajya gutabaza mu mujyi wa Mandera aho ikigo ayoboye kiri.

Uyu mwalimu uyoboye abandi ari kuvurirwa mu bitaro bya Nairobi kubera ihahamuka. Umuvandimwe we avuga ko amaraso y’abandi bari kwicwa yamutarukiye akamukwira umubiri wose bigatuma bakeka ko yapfuye.

Ati” bamugezeho bagira ngo barangije kumwica nawe akomeza kuryama atanyeganyega yipfushije.”

Iyo modoka yari ivuye I Nairobi yari itwaye abagenzi 60, yanze guhagarara ubwo abarwanyi ba Al Shabaab bayihagarikaga, bayirashe urufaya rw’amasasu babona nabwo ntihagaze bayitera grenade.

Abagenzi 28 batasaga nk’Abasomali kandi ntibashobore kuvuga indangakwemera y’Abayisiramu, Shahada, barishwe .

Polisi ya Kenya ivuga ko haguye abagore 19 n’abagore 9 muri bo 17 bari abarimu bagiye mu biruhuko.