00:00:00 IGIHE NETWORK KN KINYARWANDA EN ENGLISH FR FRANCAIS

Kenya: Kohereza abapolisi muri Haiti byasubitswe

Yanditswe na Clairia Mutoni
Kuya 24 May 2024 saa 09:24
Yasuwe :

Igikorwa cyo kohereza abapolisi 200 ba mbere ba Kenya muri Haiti kugira ngo bafashe inzego z’umutekano zaho guhangana n’amabandi agenzura igice kinini cy’umurwa mukuru, Port-au-Prince, cyasubitswe tariki ya 21 Gicurasi 2024.

Bamwe mu bayobozi bo muri Leta Zunze Ubumwe za Amerika batangarije ibiro ntaramakuru Reuters ko byari biteganyijwe ko abapolisi ba Kenya bazaba bageze i Port-au-Prince tariki ya 23 Gicurasi, bigahurirana n’uruzinduko rwa Perezida William Ruto i Washington D.C.

Umwe mu bahoze muri Polisi ya Kenya yasobanuye ko aba bapolisi 200 bagombaga kwerekeza muri Haiti ku mugoroba wa tariki ya 21 Gicurasi, ariko bamenyeshejwe bitunguranye ko batakigiye, icyakoze basabwa guhora biteguye.

Undi muntu wahaye amakuru ibi biro ntaramakuru yatangaje ko yamenyeshejwe n’umwe mu bayobozi bo muri guverinoma ya Kenya ko i Port-au-Prince bataritegura neza kwakira abo bapolisi.

Kenya yemeye kuyobora ubwo butumwa muri Nyakanga 2023 ariko yabanje guhura n’inzitizi z’abatavuga rumwe na Leta kuri iki cyemezo, bitabaje inkiko, basaba ko zaburizamo igikorwa cyo kohereza aba polisi muri Haiti, ndetse n’ibikorwa by’urugomo byakozwe n’aya mabandi muri Port-au-Prince byatumye uwari Minisitiri w’Intebe, Ariel Henry, yegura.

Ubu butumwa buzaba bugizwe n’abashinzwe umutekano bazaturuka mu bihugu bitandukanye bagera ku 2500. Bugamije kurwanya amabandi yitwaje intwaro agenzura igice kinini cya Port-au-Prince, akunze kurangwa n’ubwicanyi, gushimuta ndetse n’ihohotera rishingiye ku gitsina.

Kenya yiyemeje kohereza abapolisi bagera ku 1000 muri ubu butumwa bwemejwe n’Umuryango w’Abibumbye, buterwa inkunga na Amerika.

Kenya yagombaga kohereza abapolisi 200 ba mbere muri Haiti tariki ya 21

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .