Indwara y’ubwoba n’urwikekwe ituma Museveni abona intasi ahantu hose

Yanditswe na Albert Rudatsimburwa
Kuya 14 Kanama 2020 saa 10:14
Yasuwe :
0 0

Itangazamakuru rya Uganda ntirihwema gusohora inkuru ivuga ku ntasi z’u Rwanda. Kuri iyi nshuro, ni abanya-Uganda bafite inkomoko mu Rwanda cyangwa abashakanye n’abanyarwanda barimo kwitwa intasi nk’uko biri mu nkuru ya New Vision ifite umutwe ugira uti “Abapolisi bakuru n’abasirikare bashobora guhanishwa kwicwa kubera ubutasi”, yatangajwe kuwa 11 Kanama 2020.

Abo bitwa abasirikare bakuru ni Lt Phillip Ankunda, Pte Samuel Ndwane n’abandi batatu batawe muri yombi muri Gicurasi, bashinjwa ibyaha birimo ibyo guha amakuru ajyanye n’umutekano abantu nabo ngo barahindukira ayo makuru bayaha inzego z’iperereza z’u Rwanda.

Mu gihe cy’imyaka irenga ibiri ishize, abayobozi ba Uganda bagiye bata muri yombi abanyarwanda babashinja ubutasi. Icyakora nta na rimwe ibi birego byigeze byemezwa n’urukiko urwo ari rwo rwose.

Lt Ankunda, Pte Ndwane na bagenzi babo batawe muri yombi mu mezi atatu ashize, muri Gicurasi, bafungirwa ahantu batemerewe kuvugana n’abantu ku cyicaro cy’urwego rushinzwe ubutasi bwa gisirikare (CMI).

CMI yemeye ko yabafunze ari uko abagize imiryango yabo babashakishije bagaheba, bakitabaza itangazamakuru ngo ribakorere ubuvugizi bamenye irengero ry’abantu babo.

Nk’uko buri gihe bigenda ku bantu bashinjwa ibyaha birimo gukorera ubutasi u Rwanda, CMI ntabwo ibageza mu nkiko cyangwa ngo ibemerere kubonana n’abunganizi mu by’amategeko, ibi bikaba bitera kwibaza niba koko iba ifite ibimenyetso nyakuri bibashinja.

Iyaba CMI ifite ikimenyetso icyo ari cyo cyose, ntiyakabaye yica Itegeko Nshinga rya Uganda, ngo ifunge abasirikare bato amezi arenga atatu nta kubageza mu rukiko.

Itegeko Nshinga rya Uganda riteganya ko ukekwaho icyaha agezwa mu rukiko bitarenze amasaha 48 afashwe.

Ikirenze ibi, CMI ifite ubushobozi bwo guta abantu muri yombi ariko Itegeko Nshinga ntiriyemerera gufunga abakekwaho ibyaha, gusa ibi kutabyubahiriza byabaye umuco kuri yo.

Si ubwa mbere CMI ifashe abantu ikabamarana igihe nka kiriya mu buryo bunyuranyije n’amategeko kugira ngo ibakorere iyicarubozo cyangwa ibashyireho igitutu bari muri gereza zayo bityo ibashe kubahimbira ibirego cyangwa se kimwe igihinduremo ikindi nk’uko byagenze ku munyarwanda Rene Rutagungira.

Akenshi kandi haba harimo guhinduranya ibimenyetso ngo igereke urusyo ku bakekwa nk’uko byagenze kuri Claude Iyakaremye na Augustin Rutayisire.

Kuwa 25 Werurwe 2018, Iyakaremye yafashwe ku manywa y’ihangu i Kampala na CMI, ashinjwa kuba intasi y’u Rwanda. Ageze mu maboko y’uru rwego, habuze ibimenyetso bishimangira ibyo yaregwaga maze rurahindura ruvuga ko yafatanywe intwaro ya AK-47.

Mu bari aho imodoka zitegerwa nta n’umwe wigeze abonana Iyakaremye intwaro n’imwe. Ahubwo bose bavuga ko bari bamuzi nk’umumotari.

Muri Gicurasi 2018, Emmanuel Rwamucyo na Augustin Rutayisire bafatiwe i Mbarara bajya kuri banki. Amafaranga yabo [$40,000] barayambuwe, barafungwa, bakorerwa iyicarubozo ku mpamvu idasobanutse. Ibyo bashinjwaga byakomezaga guhinduka biva ku gukekwaho ubujura, ubutasi no gutunga imbunda nyuma ababafashe babihinduramo ko basanze imbunda ya AK-47 inyuma mu modoka yabo.

Lt Ankunda, Pte Ndwane na bagenzi babo nta gushidikanya ko bazira politiki ya Perezida Museveni yo guhoza ku nkeke abanyarwanda muri Uganda, kuri ubu yamaze kwaguka ikagera no ku banya-Uganda bafite inkomoko mu Rwanda cyangwa abafite aho bahurira na rwo.

Amakuru aturuka i Kampala avuga ko aba basirikare n’abapolisi bakiri bato barimo kuzira ko batewe ishema n’inkomoko yabo ari yo u Rwanda kandi bumva nta mpamvu yo guhisha ko ari ho bakomoka.

Ibi rero bikaba bidahuye n’imico y’abayobozi bakuru ba Guverinoma ya Uganda, barimo abasirikare benshi bo mu mutwe w’ingabo udasanzwe (SFC) barinda Perezida, washyize imbere ubwoko bw’Abahima akaba yiteguye gusa kwemera

Ibi rero bikaba ntaho bitaniye n’imyitwarire y’abayobozi bakuru muri Guverinoma ya Uganda barimo n’abofisiye bo mu Mutwe w’Ingabo udasanzwe barinda Perezida, bihinduye Abahima ariko bakemera ko ari Abanyarwanda imbere y’inshuti zabo z’akadasohoka cyangwa bari ahiherereye.

Pte Ndwane by’umwihariko yaburiwe ku nyandiko ze kuri internet yakundaga kugaragazamo neza u Rwanda. Lt Ankunda yashakanye n’umugore w’umunyarwandakazi.

Hari kandi kuba barakomeje kuvugana n’abavandimwe babo mu Rwanda. Ubu bari muri gereza ya CMI aho bakorerwa iyicarubozo ngo bemere ko bakorera u Rwanda ubutasi.

Gusa ariko ikigaragara ni uko abanya-Uganda bafite inkomoko mu Rwanda cyangwa bafite aho bahurira na rwo bazitwa intasi mu gihe cyose bateruye ngo berekane ko banga u Rwanda yaba mu magambo no mu bikorwa.

Museveni abona intasi ahantu hose

Kuva Museveni yatangira gutera inkunga umutwe w’iterabwoba wa RNC ngo uhungabanye umutekano w’u Rwanda, abona intasi z’u Rwanda aho ari ho hose. Buri wese utemera politiki yo kurwanya u Rwanda, ako kanya yitwa intasi.

Icyongeyeho, uwo ari we wese uvuga neza u Rwanda aba ari intasi mu maso ya Museveni. Bityo, indwara yo guhorana ubwoba n’urwikekwe byo kurwanya u Rwanda, yageze no mu nzego ze z’umutekano nazo zihora zikanga intasi hose.

Ku bakozi ba CMI birahagije ko kuba wavugana ku Rwanda n’umunyarwanda cyangwa Umunya-Uganda ufite inkomoko mu Rwanda, cyangwa ukavuga ikindi cyose kitarwanya u Rwanda uhita witwa intasi yarwo igomba gutabwa muri yombi kandi igafungwa nta tegeko na rimwe ryubahirijwe.

Abafashwe muri ubu buryo bakorerwa iyicarubozo ry’inkazi kugira ngo bemere ko ari intasi hanyuma nabo [CMI] bagahamiriza umukoresha wabo [Museveni] ko atarwaye guhorana ubwoba n’urwikekwe ahubwo ibyo akeka ari byo. Ibi bikorwa bikaba bitwara akayabo k’ingengo y’imari.

Maj Gen Abel Kandiho, ubwe ukomoka kuri nyina wari impunzi y’umunyarwanda na Se wari ufite inkomoko mu Rwanda, mu myaka myinshi yongereye ubukana bw’iyi ndwara y’ubwoba n’urwikekwe Museveni aterwa no kurwanya u Rwanda.

Politiki ya Museveni yabaye nk’ikigo cy’ubucuruzi cyunguka, aho abakozi ba CMI bajya mu kazi hanze y’ibiro bishyurwa bigendanye n’umubare w’abanyarwanda bita intasi bafashe.

Icyaha cy’aba basirikare n’abapolisi bato ntabwo ari ubutasi, ni ukunanirwa kwitandukanya n’inkomoko yabo y’u Rwanda ngo bihuze n’ugushaka kw’ababashinja.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .