Impinduka ku buryo Tanzania ifata Covid-19 nyuma y’igitutu

Yanditswe na Bukuru JC
Kuya 25 Gashyantare 2021 saa 09:01
Yasuwe :
0 0

Nyuma y’igihe Tanzania ivuga ko nta Covid-19 iri mu gihugu ndetse bamwe mu bayobozi bakumvikana banenga zimwe mu ngamba zashyizweho zo kurwanya icyo cyorezo ku Isi, kuri ubu amazi si ya yandi kuko ingamba z’ubwirinzi zatangiye kubahirizwa hirya no hino mu gihugu.

Ni umwanzuro ufashwe nyuma y’intabaza zagiye zitangwa n’imiryango itandukanye irimo Kiliziya Gatolika, Ambasade ya Amerika n’abandi, bagaragaza ko Covid-19 mu gihugu ihari nubwo Leta ibihisha.

Guhera muri Mata umwaka ushize Tanzania yahagaritse gutangaza imibare y’abandura, ivuga ko ubukana iyo ndwara ihabwa ntabwo ifite.

Mu minsi mike ishize, benshi mu bayobozi bakomeye muri Tanzania bagiye bapfa mu buryo budasobanutse ndetse bikekwa ko bahitanywe na Covid-19. Umwe muri bo ni Visi Perezida wa Zanzibar, Seif Sharif Hamad, Uwari Umunyamabanga mu biro bya Perezida, John Kijazi na Benno Ndulu wahoze ari Guverineri wa Banki ya Tanzania.

Tariki 21 Gashyantare, Umuryango Mpuzamahanga wita ku Buzima (OMS), wasabye Tanzania gufata ingamba zikomeye mu guhangana na virusi. Icyo gihe Umuyobozi Mukuru wa OMS, Tedros Adhanom Ghebreyesus, yavuze ko ibya Covid-19 muri Tanzania biteye inkeke.

Guhera ubwo, Minisiteri ishinzwe Ubuzima yasohoye itangazo rikangurira abanya-Tanzania kwirinda bakaraba intoki kenshi kandi bambara udupfukamunwa.

Guverinoma ya Tanzania kandi yashishikarije abaturage kwifashisha ibyatsi gakondo mu kwirinda birimo kwiyuka, nubwo bitari mu nama zatanzwe na OMS.

Hashyizweho ikigo gishinzwe gupima Covid-19 muri Pariki ya Serengeti, mu gihe ikigo gishinzwe imodoka zitwara abantu n’ibintu, Dar Rapid Transit Agency (DART) cyasohoye amabwiriza mashya asaba abagenzi bakoresha imodoka mu Mujyi wa Dar es Salaam ko bagomba kwambara udupfukamunwa.

Ntabwo Perezida John Magufuli aremera ko mu gihugu hari Covid-19 icyakora aherutse kuvuga ko indwara z’ubuhumekero ziyongereye. Ubwo yari yitabiriye umuhango wo gushyingura Kijazi wari ari Umunyamabanga mu biro bye, Magufuli yagize ati “Izi ndwara z’ubuhumekero twarazinesheje umwaka ushize, tuzongera tuzineshe ku bufasha bw’Imana.”

Magufuli yahise atangaza iminsi itatu y’amasengesho, asaba abantu kwambara udupfukamunwa ariko twakorewe muri Tanzania. Icyo gihe yavuze ko igihugu kitazigera gishyiraho Guma mu Rugo.

Umuyobozi w’ishyaka ritavuga rumwe n’ubutegetsi, ACT Wazalendo, Zitto Kabwe yabwiye Quartz Africa ko ingamba Leta yashyizeho zidahagije mu gihe abasuzumwa atari benshi.

Kabwe kandi yavuze ko ikibazo gikomeye ari ukuba Guverinoma imaze igihe idatangaza imibare y’abanduye, ibintu asanga bidafasha mu guhashya icyorezo.

Umuganga w’indwara z’ubuhumekero mu Mujyi wa Dar es Salaam, Dr Deus Kitapondya, yavuze ko abakora mu nzego z’ubuzima nta mabwiriza ahamye bafite y’uburyo bwo kwitwara imbere y’abarwayi ndetse no gusobanurira ababagana uburyo bwo kwirinda icyo cyorezo.

Ibikorwa byo gupima Covid-19 muri Tanzania byasubukuwe ndetse abaturage bashishikarizwa kwambara udupfukamunwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .