Leta ya Kenya n’iya Seychelles bari mu igeragezwa ry’ikoranabuhanga ryitezweho kongera uburinzi bw’umutekano wo mu mazi, mu bihugu byo muri Afurika y’Uburasirazuba.

Ikinyamakuru The East African kivuga ko iri koranabuhanga riri kugeragezwa n’ikigo cyo muri Kenya gishinzwe ubutabazi bwo mu mazi, n’Umuryango Ushinzwe Gukumira ba rushimusi mu Nyanja y’u Buhinde ukorera muri Seychelles.

Iri gerageza rizamara umwaka iryo koranabuhanga ritangire gukoreshwa mu Kwakira kwa 2015.

Ba rushimusi bo muri Somaliya bahombeje abacuruzi batuma n'ibiciro bizamuka ku isoko

Iyi porogaramu yubatswe na Komisiyo y’Uburayi Ishinzwe Ubushakashatsi (JRC), itanga amashusho y’ubwato n’abagenzi, ikerekana n’icyerekezo cy’ubwato mu nyanja.

Aba babukoze bagize bati “Iyi porogaramu ishobora gutanga ishusho nyayo mu mazi y’inyanja y’Abahinde, ayo makuru agafasha buri gihugu cyegereye inyanja gucunga ku nkombe zacyo.

Kenya, Tanzania, Somalia, Djibouti, Mozambique, Seychelles, Comoros, Madagascar n’ Ibirwa bya Maurice biri mu bihugu bikunze kwibasirwa na ba Rushimusi bo mu mazi.

Mu 2011 ba rushimusi bo muri Somalia bafunze inzira z’ibicuruzwa mu mazi. Bari barafunze ingendo zo mu mazi ku ihembe rya Afurika, ikiguzi cy’ ibicuruzwa kirazamuka kuko abakora ingendo zo mu mazi bahinduye inzira, bongeraho n’amafaranga menshi y’uburinzi n’ubwishingizi bwabyo.

Icyegeranyo cya Banki y’Isi cyagaragaje ubushimusi ko ubujura bwo mu mazi bushobora guhombya Isi miliyari zigera kuri 18 z’amadolari.