Ikibumbano cya Mahatma Ghandi cyateje impagarara muri Malawi

Yanditswe na Evariste Nsengimana
Kuya 16 Ukwakira 2018 saa 05:37
Yasuwe :
0 0

Abaturage basaga 3000 bo muri Malawi bamaze kwandika bamagana igikorwa cyo gushyira ikibumbano cya Mahatma Ghandi rwagati mu mujyi w’ubucuruzi wa Blantyre, bavuga ko ntacyo yafashije iki gihugu gihereye mu majyepfo ya Afurika.

Gandhi ni umunyabigwi ufatwa nk’intwari n’umubyeyi waharaniye ubwigenge bw’u Buhinde, igihugu giherereye muri Aziya.

Mu mezi abiri ashize nibwo imirimo yo kubaka ikibumbano cya Ghandi yatangijwe ku muhanda wamwitiriwe mu mujyi wa Blantyre muri Malawi.

Guverinoma ya Malawi yatangaje ko kubaka iki kibumbano biri mu masezerano azatuma u Buhinde bwubaka icyumba cy’inama cya miliyoni 10$ muri Blantyre.

Nk’uko AFP yabitangaje, itsinda rimwe ryagize riti “Gandhi nta kintu na kimwe yafashije Malawi mu rugamba rw’ubwigenge no kwibohora kwayo.”

"Twe twumva iki kibumbano kiri guhatirwa abaturage ba Malawi kandi ni igikorwa cy’amahanga kigamije kumenyekanisha isura yacyo kandi ku baturage ba Malawi.”

Banavuze ko Gandhi, bamufata nk’uwaranzwe n’ivangura kuko yarwanyije amategeko yari agamije guhagarika ivangura rya Apartheid muri Afurika y’Epfo.

Umwe mu bagize iryo tsinda, Wonderful Mkutche, yavuze ko batishimye uburyo bushya bw’ubukoloni icyo gihugu gishaka kubashyiraho.

Icyo bemera cy’abanyamahanga ngo ni ishoramari, ubufatanye, nabyo bikozwe mu buryo buboneye kandi bubahesha icyubahiro.

Umunyamabanga muri Minisiteri y’ububanyi n’amahanga ya Malawi, Isaac Munlo, yavuze ko uburyo byakozwemo nta kibazo bukwiye gutera.

Ati “Bikwiye kwemerwa ko Mahatma Gandhi yaharaniye indangagaciro zo kwicisha bugufi, arwanya ikibi ku baturage, aharanira uburenganzira bw’ikiremwamuntu no guteza imbere imibereho myiza y’abaturage.”

Yanavuze ko ari iby’agaciro kuvuga ko abaharaniye ukwibohora kwa Afurika, abarwanyije ubukoloni n’igitugu bose, Gandhi yababereye urugero rwiza.

Mu yandi magambo, Gandhi ngo ni urugero rwiza rw’uwaharaniye amahoro ya Afurika n’u Buhinde.

Umubano w’ibihugu byombi watangiye mu 1964. U Buhinde nibwo buha inkunga nyinshi Malawi.

Ikibumbano cya Mahatma Ghandi cyateje impagarara muri Malawi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza