Ihurizo ku binjira muri Tanzania bashyirwa mu kato k’iminsi 14 biyishyurira byose

Yanditswe na Twarabanye Venuste
Kuya 25 Werurwe 2020 saa 11:36
Yasuwe :
0 0

Abinjira muri Tanzania bagomba kubahiriza amabwiriza yashyizweho na Guverinoma yo kwishyira mu kato k’iminsi 14 mbere y’uko bajya mu miryango yabo cyangwa mu zindi gahunda zibazanye mu gihugu, bavuze ko basanze hoteli bashyiriweho zirenze ubushobozi bwabo.

Perezida wa Tanzania, Dr John Magufuli, aherutse gutangaza ko abantu binjira muri icyo gihugu bagomba kujya mu kato k’iminsi 14 kandi bakimenyera byose mu rwego rwo kurwanya ikwirakwira rya Coronavirus.

Bamwe mu bageze muri icyo gihugu, banenze ubuyobozi kuba bwarabahitiyemo hoteli zo mu Mujyi w’Ubucuruzi, Dar es Salaam, bavuga ko zirengeje ubushobozi bwabo.

The Citizen yo muri Tanzania yanditse ko hari umwe mu bashyitsi, wagize ati “Hoteli zateganyirijwe abagenzi, zirimo Peacock Hotel, Rungwe Hotel, Dar Palace na Southern Sun kandi uko ubireba turi kuzanwa hano na Guverinoma cyangwa abayobozi mu nzego z’ubuzima.”

Yongeyeho ati “Urugero nk’icyumba gihendutse cyo muri Peacock ni $55, arenze ubushobozi bwanjye.”

Kimwe n’uwo icyo kinyamakuru cyanditse ko abo bantu bagaragaraga ko baguye mu kantu mu gihe barebanaga na bene wabo ariko badashobora kwegerana.

Ku Cyumweru tariki 22 Werurwe 2020 nibwo Perezida Magufuli yatangaje ko mu ngamba Tanzania yongeye mu bwirinzi ni uko abantu bose binjira muri gihugu barimo abenegihugu n’abandi baturutse ahagaragaye Coronavirus bagomba kujya mu kato k’iminsi 14 kandi bakitunga.

Perezida Magufuli yasabye abaturage kwirinda kugirira ingendo mu bihugu byagaragayemo icyo cyorezo.

Kugeza ubu muri Tanzania coronavirus imaze kugaragara ku bantu 12 barimo abenegihugu umunani n’abanyamahanga bane bose bari kwitabwaho n’abaganga. Inzego z’ubuzima zivuga ko bose bameze neza nta n’umwe urembye, nta n’uritaba Imana.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza