00:00:00 IGIHE NETWORK KN KINYARWANDA EN ENGLISH FR FRANCAIS

Igihuru gishobora kubyara igihunyira muri Congo Kinshasa: Abavuga Ikinyarwanda bari guhigishwa uruhindu

Yanditswe na Musangwa Arthur
Kuya 18 June 2022 saa 07:18
Yasuwe :

Amagambo y’urwango n’ibikorwa byo guhiga, gucunaguza, guhohotera no kwica abavuga Ikinyarwanda muri Repubulika Iharanira Demokarasi ya Congo (RDC), bikomeje gukaza umurego. Nyuma y’aho M23 na FARDC byubuye imirwano, byahumiye ku mirari ku buryo hatagize igikorwa bishobora kubyara ’Jenoside’.

Muri iyi minsi iyo ukurikiye imbwirwaruhame z’abayobozi batandukanye muri politiki n’inzego z’umutekano za RDC, ntuburamo imvugo z’urwango n’ubutumwa bisembura abaturage ngo bange bagenzi babo b’abanye-Congo bavuga Ikinyarwanda ndetse n’u Rwanda muri rusange.

Icyita rusange ni uko ngo bashyigikira uwo bita umwanzi ari we M23 ihanganye n’igisirikare cya FARDC. Izi mvugo zihembera ubwicanyi mu isura ya Jenoside ntizihwema gukurikirwa n’ibikorwa bibi ari yo mpamvu abatari bake bakomeje kubirwanya no kuburira ababifite mu nshingano ngo bagire icyo bakora ngo ’hato ibyabaye mu Rwanda bitimukira muri RDC’.

Hambere aha umupolisi mukuru yarihanukiriye asaba abaturage gufata umuhoro bakarwanya ’abanzi’ babo. Ati"…Buri wese nashake umupanga cyangwa ikindi cyakwica umuntu, iyi ntambara nibe iya rubanda..."

Uwavuga ko ubu uwitwa ’Umututsi’ cyangwa usa nabo afite ibyago muri RDC ntiyaba abeshye. Ku mbuga nkoranyambaga, guhiga abatutsi bose ni yo ntero, ikibabaje cyane ni uko himitswe umuco wo kudahana ku babikora.

Ejobundi uwitwa Jules Kalubi Munyere ubarizwa mu rubyiruko rw’ishyaka UDPS rya Perezida Tshisekedi ari ahitwa “Parlement Debout”, yareruye ahamagarira abaturage kwica abatutsi no guhiga uwo ari we wese ufite izuru rirerire.

Aya magambo yibutsa neza ayakoreshwaga na radiyo rutwitsi, RTLM mu Rwanda, hari abasanga nakomeza azabyara indi jenoside mu Karere k’Ibiyaga bigari nk’iyabaye mu 1994.

Hari uwitwa Makolomabele ati "Nilotiques’ [abavamahanga] nta mwanya bafite mu ba Bantous, buri mu bantous agomba kwica nibura ’nilotique’ umwe mu buzima bwe. Aya magambo asa neza n’ayakoreshejwe na Leon Mugesera avuga ko ’abatutsi bazasubizwa iyo baturutse’.

Umwe mu baturage ati "Umutekano wacu ntabwo umeze neza batuziza u Rwanda, batuziza M23 kandi tutayizi, tudakorana, tutari abanyarwanda, turi abanye-Congo kimwe n’abandi".

Yongeyeho ati "Dufite abasirikare ba FARDC b’abanyamulenge b’Abatutsi bafatanyije na FARDC kurwanya M23 ariko abaturage tukabigiramo ingaruka tugafungwa, kugeza ubu hari ahantu utanyura".

Amagambo yo kubwira abavuga Ikinyarwanda ko batabashije kubica mu 1998 ngo babamare, bakabateguza ko aya ari amahirwe yo kubamara abonetse, ni zimwe mu mvugo ziganje muri RDC.

Kwica, gutoteza no guhohotera biri kandi mu gisirikare cya leta ni nyuma y’aho mu minsi ishize bamwe mu bayobozi ba Congo cyane cyane mu gisirikare, batangarije ko bagiye gutangira guhiga bukware abitwa ibyitso by’u Rwanda bacengeye mu gisirikare cya FARDC.

Ingero ni nyinshi, hari Col Mushagalusha Birhuman Alias Tera Novo yarashwe na bagenzi mu gace ka Kibati muri Teritwari ya Nyiragongo bamukekaho gukorana n’umutwe wa M23 bahanganye mu ntambara.

Hanagaragaye amashusho agaragaza umusirikare wa FARDC ufite ipeti rya Lt. Colonel witwa Bageni akurubanwa yinjizwa nabi mu modoka ya polisi ashinjwa kuba asa n’Abatutsi. Uyu yaje kurekurwa nyuma yo kugenzura ko atari umututsi.

Ni Jenoside irimo gukorwa

Umushakashatsi kuri Jenoside Tom Ndahiro mu kiganiro yagiranye na IGIHE, yavuze ko ibiri kuba muri RDC ari Jenoside kuko idatangirana no kwica, ahubwo itangirana no kubiba urwango ku bazicwa.

Ati "Amagambo atoteza abantu runaka anaranga uko abo bantu baboneka, ikibaranga. Ikindi iyo ubona bikorwa, bafite icyizere ko ntacyo bari bubatware. Uvuze ikintu uzi ko ari icyaha kandi uri bukiryozwe ntiwabikora. Uwo muntu ubikora azi ko ashyigikiwe n’ubutegetsi kandi ni byo".

"Birerekeza kuri Jenoside kandi irimo iranakorwa buhoro ntabwo ari ukuvuga ngo izatangira, izakomeza ahubwo".

Amagambo abiba urwango muri RDC si mashya. Mu 1998 amagambo mabi yo kuvuga ngo nimuteme, mushake abantu bafite amazuru, mushake ibyonnyi, yavuzwe n’uwari Minisitiri w’Ububanyi n’amahanga wa RDC, Abdoulaye Yerodia Ndombasi. Yakurikiwe no gutwika abantu no kubajugunya mu migezi i Kinshasa n’ahandi.

Ndahiro avuga ko kubona umupolisi w’umuyobozi ahamagara abapolisi ayoboye akababwira ngo bazabwire abaturage babo gufata imihoro, ari ikimenyetso cy’uko bishyigikiwe.

Ati "Uriya mupolisi ubundi, iyo bitaba ibintu bishyigikiwe yari gufatwa ako kanya agafungwa agacibwa n’urubanza".

Muri iyi minsi ku mbuga nkoranyambaga hari amashusho menshi y’abayobozi n’abaturage barangira abandi aho babasanga ngo babagirire nabi. Ibi ni kimwe n’ibyo RTLM yakoze mu Rwanda, uretse ko ’biri ku mbuga nkoranyambaga, bikwira mu bantu benshi mu gihe gito’.

Ndahiro ati "Biriya ni byo byakorwaga na RTLM ngo genda kanaka uzamusanga aha n’aha, ageze aha ntabacike. Na leta ntihakana ko ibyo bintu bihari".

MONUSCO nifatanye na M23

Akanama k’umutekano ka Loni gaherutse kwamagana imvugo z’urwango zirimo gukoreshwa muri RDC. Gusa ku rundi ruhande hari abasanga kuba ibi bikorwa mu maso y’ingabo za Loni, Monusco, ari icyasha gikomeye cyane.

Ndahiro ati "Niba [Monusco] yaraje gucunga umutekano, nta kintu giteza umutekano muke nk’imvugo z’urwango, ziganisha ku rupfu, ku gutoteza abantu, gusahura amaduka yabo, ntabwo wavuga ngo [Monusco] hari icyo bamaze hariya, ntacyo.

Ndahiro asanga hakwiye kubaho guhana. Abayobozi bo muri Congo batagira icyo babikoraho kandi biba bareba bagatangira gukorwaho iperereza n’urukiko mpuzamahanga nk’uko barujyanyemo Jean Bosco Ntaganda.

Abayobozi b’Umuryango wa Afurika y’Iburasirazuba (EAC) n’Umuryango wa Afurika yunze Ubumwe (AU) bakwiye kwamagana biriya bintu bakarinda ko ’haba nk’ibyabaye mu Rwanda’.

Ndahiro asanga Akanama ka Loni k’umutekano gakwiye gufata ingamba, imwe mu nshingano za Monusco ikaba kurwanya imvugo z’urwango n’ibikorwa biziherekeza, byanashoboka igafatanya na M23 kurwana kuko yo ishobora kurwanya abo bantu.

Ati "Monusco nifatanye na M23 niba leta idashobora kubirwanya".


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .