Ibyo wamenya ku munya-Kenya Amina Mohammed ushobora kuyobora umuryango wa WTO

Yanditswe na Habimana James
Kuya 29 Gicurasi 2020 saa 08:45
Yasuwe :
0 0

Mu byumweru bike bishize, uwari Umuyobozi Mukuru w’Umuryango Mpuzamahanga w’Ubucuruzi (WTO), Roberto Azevêdo, yatangaje ko agiye kwegura kuri uyu mwanya, umunya-Kenya, Amina Mohamed niwe uhabwa amahirwe yo kumusimbura.

Roberto Azevêdo yatangaje ko azegura muri Kanama uyu mwaka, ni mu gihe manda ye yagombaga kugeza muri Kanama 2021. Nyuma yo kuvuga ko agiye kwegura, kugeza ubu hakurikiyeho gushaka ugomba kumusimbura.

Mu kiganiro aherutse kugirana na Financial Times, Amina Mohammed yavuze ko “Dukeneye umuntu ufite ubumenyi bukomeye, uwo muntu akaba yiteguye gufasha impande zitandukanye ariko anafite ubunararibonye bwa politike bwo gufasha abandi, ariko na none aramutse ari umunyafurika by’umwihariko ari umugore, ndatekereza ko byaba akarusho.”

Uyu muryango w’ubucuruzi washinzwe mu 1995, ugizwe n’ibihugu binyamuryango 164. Uyu niwo muryango ukomeye mu by’ubucuruzi ku Isi aho ufite icyicaro mu Busuwisi.

Amina Mohamed uhabwa aya mahirwe ni muntu ki?

Mohamed yavutse tariki 5 Ukwakira 1961 mu gace ka Kakamega muri Kenya afite ubunararibonye bukomeye nk’umudipolomate.

Nyuma yo kwiga ibijyanye n’amategeko muri Kaminuza ya Kyiv muri Ukraine, Mohamed yagiye muri Kenya aba Umunyamategeko kuva mu 1985.

Yamaze igihe kinini ari Umudipolomate muri guverinoma aho yari ahagarariye iki gihugu i Genève mu Busuwisi no mu Kanama ka Loni gashinzwe amahoro n’umutekano ku Isi.
Hagati ya 2000 na 2006, Mohamed yabaye Ambasaderi anayobora Komisiyo Nyafurika ishinzwe uburenganzira bwa muntu muri WTO.

Niwe wabaye umugore wa mbere wayoboye inama nkuru ya WTO iherereye i Genève mu Busuwusi mu 2005. Igihe kinini yamaze muri Guverinoma ya Kenya, ni aho yabaye Minisitiri w’Ububanyi n’Amahanga kuva muri Gicurasi 2013 kugeza muri Gashyantare 2018.

Ku butegetsi bwa Mwai Kibaki, Mohamed yabaye Umuyobozi Mukuru wungirije mu Ishami ry’Umuryango w’Abibumbye ryita ku bidukikije, UNEP, mu 2011.

Iyi si yo nshuro ya mbere Mohamed agiye gufashwa n’igihugu cye kuba yayobora WTO kuko yari mu bakandida batsinzwe na Roberto Azevêdo mu 2013.

Mu 2017, Guverinoma ya Kenya yari yatanze Mohamed nk’umukandida wo gusimbura Nkosazana Dlamini Zuma ku mwanya wo kuba Perezida wa Komisiyo ya Afurika Yunze Ubumwe. Yaje gutsindwa n’umunya-Tchad, Moussa Faki Mahamat.

Hari amakuru avuga ko mbere y’uko Azevêdo yegura, u Bwongereza bwari bwasabye ko Amina Mohamed yasimbura Umunyamabanga Mukuru w’Umuryango w’Ibihugu bikoresha ururimi rw’Icyongereza, Commonwealth, Patricia Scotland.

Jeune Afrique ivuga ko Amina Mohamed ariwe uhabwa amahirwe yo kuyobora WTO, gusa ngo hagendewe ku bibazo bihari harimo n’icyorezo cya Coronavirus, hari byinshi biteye urujijo ku muntu ushobora gusimbura Azevêdo.

Kugeza ubu uyu muryango uri mu bibazo bikomeye kubera ibibazo by’ubucuruzi biri hagati ya Leta Zunze Ubumwe za Ameirka n’u Bushinwa.

Kuva mu 2017, Perezida Donald Trump yakunze kuvuga ko igihugu cye kizawuvamo kuko awushinja kutabanira neza Amerika ahubwo ukabogamira ku Bushinwa.

Abasesenguzi bavuga ko uyu ari umwanya mwiza ko uyu muryango wayoborwa n’Umunyafurika ku nshuro ya mbere.

Amina Mohammed ni umwe mu bahabwa amahirwe yo kuyobora Umuryango Mpuzamahanga mu by'Ubucuruzi, WTO

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .