00:00:00 IGIHE NETWORK KN KINYARWANDA EN ENGLISH FR FRANCAIS

Ibimenyetso simusiga by’ubwicanyi bwibasira Abatutsi b’Abanye-Congo

Yanditswe na Musangwa Arthur
Kuya 24 Mutarama 2023 saa 07:17
Yasuwe :

Ubwicanyi, iyicarubozo, gutotezwa, gucunaguzwa n’ibindi bikorwa bishengura ikiremwamuntu bikorerwa Abatutsi b’abanye-Congo, bikomeje gufata indi ntera ku rwego rw’aho kwitwa umututsi muri Repubulika Iharanira Demokarasi ya Congo (RDC), byahindutse icyaha kitababarirwa.

Amateka yerekana ko kwica Abatutsi b’abanye-Congo byahereye mu 1994 ubwo batangiraga kwibasirwa n’interahamwe na Ex-FAR bari bamaze gukora Jenoside mu Rwanda, bakabikomereza muri Congo bagamije gutsemba Umututsi batashakaga.

Kuva icyo gihe Abatutsi b’abanye-Congo bakomeje kwicwa urusorongo abandi barameneshwa bahungira mu bihugu birimo u Rwanda rucumbikiye abarenga ibihumbi 75.

Ni ubwicanyi bukorwa n’ingabo za FARDC ifatanyije n’imitwe nka FDLR, Mai Mai, Nyatura n’iyindi mitwe ifite ingengabitekerezo yuko ‘abatutsi ari bo bateza umutekano muke muri RDC’, ikabatotezwa ngo ni abanyarwanda nibasubire iwabo.

Ishami ry’Umuryango w’Abibumbye rishinzwe uburenganzira bwa muntu, muri Kamena 2020 ryatangaje ko mu mezi umunani yari ashize, muri RDC hapfuye abasivili bagera mu 1,300, biciwe mu bikorwa bitandukanye by’imitwe yitwaje intwaro.

Nko muri Kivu y’Amajyaruguru ahabarwaga ko hishwe abasivili nibura 514 hakoreshejwe intwaro gakondo nk’imihoro, amashoka ndetse n’imbunda, FARDC ubwayo yashinjwe ko yishe abasivili 59 na ho polisi yica 24.

Ubu bwicanyi bwakajije umurego guhera umwaka ushize ubwo umutwe wa M23 wuburaga imirwano uhanganyemo n’Ingabo za Congo. Abatutsi b’abanye-Congo baribasiwe, baricwa, abafite ibikorwa by’ubucuruzi biratwikwa, amatungo aratemagurwa n’ibindi bikorwa ndengakamere.

Ni ibikorwa byasembuwe n’imvugo z’urwango zihamagarira abantu kwica abandi zumvikana mu bayobozi mu rwego rwa politiki, igisirikare, polisi, sosiyete sivile, abihayimana n’abandi. Ibi byose bikerekana ko ari ikibazo giteye inkeke ku buryo hari abasanga ibiri kuba muri RDC ari ‘jenoside’ iri gukorwa.

Urugero ni aho ku wa 26 Gicurasi 2022, Umuyobozi Mukuru wa Polisi muri Kivu y’Amajyaruguru yabwiye abaturage ati “Mwumve neza; mubwire abahungu banyu, abagore ndetse n’abandi bose, ko mufite igikoresho gishobora kwica, kuko urugamba rwarose. Tugomba kwikiza aba banzi. Mugende mubwire inshuti zanyu zifate imihoro kuko urugamba rurarimbanyije.” ni ubutumwa bwakwirakwiriye ku mbuga nkoranyambaga.

Ntibyatinze amashusho ahamagarira urwango yakomeje kwiyongera, ndetse guhera ku wa 1 Kamena 2022, ibintu byari bimaze gufata indi ntera hatangira n’ibikorwa byo guhiga abantu runaka ababiri inyuma cyane ari ababarizwa mu ishyaka rya UDPS riri ku butegetsi.

Byageza aho abayoboke b’ishyaka rya UDPS muri Kinshasa, bahagarikaga imodoka bagahigamo abatutsi, inzego z’umutekano [abasirikare n’abapolisi] ziri aho zirebera.

Hari kandi amashusho yagaragaye abanye-Congo baririmba ngo ‘Felix fungura imiryango abanyarwanda basubira iwabo’.

Ku bibuka neza ibyakorwaga na radiyo RTLM muri Jenoside yakorewe Abatutsi, ni byo bikorwa muri RDC. Ibikorwa byo kuranga abatutsi aho baherereye ngo bicwe, byahawe intebe. Umuvugizi w’ishyaka rya Tshisekedi (UDPS), Jules Munyere, yagaragaye afite urutonde asoma ahari Abatutsi.

Ati “I Kitambo ahateganye n’ikigo cya Luano iruhande yo kwa Gen Konde hari abatutsi b’abanyarwanda, akomeza avuga ngo ‘iruhande rwa gare yo mu mujyi rwagati ahateganye na Ambasade ya Zambia…murebe izuru rirerire”

Izi mvugo z’urwango n’izindi nyinshi zashyize mu kaga ndengakamere Abatutsi b’abanye-Congo, baratotezwa, barakubitwa, imitungo yabo irasahurwa, inka ziratemwa, inzu ziratwikwa kugeza ubwo hari abishwe batwitswe cyangwa bagatemagurwa mu ruhame. Hari n’abishwe bararibwa muri Maniema.

Umwe mu mpunzi z’abanye-Congo ziba mu nkambi ya Mahama mu Karere ka Kirehe, aherutse kubwira IGIHE ko afite umuvandimwe wishwe urw’agashinyaguro abandi bakabica bakabarya.

Yagize ati “Mfite umuvandimwe wanjye n’uyu munsi ndabivuga nkumva mfite ikiniga. Baramutemye, bamutema igihanga cyo hejuru bagishyira ku ruhande bari bamuboshye, bamwishe urupfu rw’agashinyaguro. Usibye na we, hari abandi benshi b’abaturanyi banjye barabishe, hari n’abo bishe baranabarya, barabateka bararya…”.

Umunye-Congo witwa Caleb wari ufite mukuru we witwa Fidèle Ntayoberwa wiciwe i Kalima, mu ntara ya Maniema, ni umwe mu bahamya uko Abatutsi b’abanye-Congo bicwa.

Ati “Ntabwo imirambo yigeze iboneka, twagerageje kuvugana na Guverineri wa Maniema kugira igarurwe. Ubwo yagarukaga, yatubwiye ko imibiri yatwitse burundu ku buryo nta n’uburyo bwo kutwoherereza n’ivu”.

Abashyigikiye ubutegetsi bwa Tshisekedi bararuciye bararumira kuri ubu bwicanyi ahubwo bagahoza mu kanwa M23 n’ubufasha ihabwa n’u Rwanda.

Nyirabagoro Annonciata ni umwe mu bahamya b’ubwo bugizi bwa nabi bwibasiye Abatutsi mu bice bitandukanye bya Kivu y’Amajyaruguru, nyuma y’uko umugabo we na mukuru we bishwe bazira ko ari Abatutsi.

Mu kiganiro cyihariye na IGIHE, Nyirabagoro uri mu nkambi y’agateganyo ya Nkamira yavuze ko umugabo we na mukuru we bafashwe ku manywa y’ihangu, bikarangira bishwe ntibabashe kubona n’imirambo yabo.

Nyirabagoro Annonciata, umaze ibyumweru bibiri ninjiye muri iyi nkambi yagize ati “Babafatiye muri Rutshuru mu muhanda ugana Bishusha, barabakubise barabangiza, amakoti bari bambaye barayatwika, inkweto bari bambaye bazibavanamo.”

Yakomeje agira ati “Babanje kubakubita barabashorera babajyana muri Masisi, mu muhanda ugana ku isoko niho babanogereje. Bamaze kubakubita bahambira kuri moto barabirukansa umuhanda wose ugana kuri Monusco, bagenda batabaza bavuga ngo bajyanye M23.”

Aba basaza bamaze kubakubita, aho babajyanye umuryango wabo ntuhazi, icyakora waje guhabwa amakuru n’umuyobozi wa Mai Mai witwa Janvier Kairiri, ko bamaze kwicwa.

Uyu mukecuru avuga ko mbere y’uko umugabo we yicwa, hari n’abaturanyi be bishwe bose bazira kuba ari Abatutsi.

Ati “Bishe n’undi witwa Mupenzi, bishe n’undi mu Bwiza bamuca umutwe, igihimba barambika hariya. Bishe abakobwa babiri b’Abatutsikazi bari kuva i Mweso baza Kichanga. Bishe umukobwa witwa Cyaracyumu w’Umutsikazi. Ibintu nk’ibyo dusanga Leta ibifitemo uruhare kuko itabifitemo uruhare ntabwo yashora Nyatura na Mai Mai.”

Ibikorwa ni Jenoside

Imvugo z’urwango muri RDC zabibye amacakubiri mu baturage, ziba urukuta mu rugendo rw’amahoro. Ibi byose bishimangira uko leta yananiwe kubahiriza inshingano zayo.

Raporo ya Loni yo muri Kamena 2022, yagaragaje ko muri RDC hari ubwicanyi bushingiye ku bwoko bw’Abatutsi. Ushingiye ku mategeko mpuzamahanga akumira akanahana icyaha cya Jenoside, yemeje ko muri iki gihugu hari gukorwa Jenoside y’Abatutsi.

Umunye-Congo wo mu ntara ya Kasaï, Ludovic Kalengayi, akaba n’Umuhuzabikorwa w’Umuryango PMVS uharanira kurenganura abanye-Congo bakorerwa ivangura cyane cyane Abatutsi, yakoresheje inyigo igaragaza kuri Jenoside irimo gukorwa muri RDC.

Nyuma yaho yakoze inyandiko ayoherereza ubuyobozi, muri za ambasade, mu bigo bya Loni, mu banyamakuru n’ahandi ‘atabariza abatutsi b’Abanye-Congo’.

Kuwa 10 Ukuboza 2022, Ambasaderi w’u Rwanda muri Loni, Amb. Gatete Claver yabwiye uyu muryango ko muri Jenoside yakorewe Abatutsi habayeho guceceka kw’ibihugu n’uyu munsi bikaba byisubiramo ku bibera muri RDC.

Ati “Imvugo z’urwango ku banyarwanda n’abandi bavuga Ikinyarwanda muri Congo, kuri ubu zariyongereye nk’uko byatangajwe n’uwungirije Umunyamabanga mukuru wa Loni. Imvugo z’urwango ntizibangamira gusa imibanire myiza n’amahoro mu baturage ahubwo zishyira no mu kaga ubuzima bw’abantu”.

Amb. Gatete yakomeje avuga ko izi mvugo z’urwango zigamije kwishakira imbaraga mu bya politiki, zihembera ubwicanyi ku bavuga Ikinyarwanda.

Me Gasominari Jean Baptiste yemeza ko ibiri gukorwa muri RDC ari jenoside kuko ari ubwicanyi bwibasiye abantu bamwe kubera ubwoko bwabo.

Ati “Nibaza ko ku rwego rw’amategeko kubyita Jenoside ntabwo ari ugukabya ni jenoside kuko abicwa ntakindi kintu gituma bicwa ni ubwoko bwabo kandi iyo ubwicanyi bwibasiye abantu kubera ubwoko nibwo byitwa Jenoside”.

Akomeza avuga ko ubwo bwicanyi butaramaganwa n’ubutegetsi ku mugaragaro, bikaba bisobanuye ko bushyigikiwe n’ubutegetsi.

Ambasade y’u Budage muri RDC iherutse gukorera ubuvugizi abavuga Ikinyarwanda bo muri iki gihugu ku buryo ubwicanyi bamaze igihe bakorerwa buhagarara.

Ubutumwa bwanyujijwe kuri Twitter ya Ambasade y’u Budage bugira buti “Guhagarika imvugo zibiba urwango ndetse n’uguhigwa bukware bikorerwa abavuga Ikinyarwanda muri RDC. Nijeje Visi Perezida w’Icyubahiro Ruberwa ubufasha bwanjye kandi nifatanyije n’Abanyamulenge.”

Ibi birakurikira ibyatangajwe n’Intumwa idasanzwe y’Umunyamabanga Mukuru w’Umuryango w’Abibumbye, ishinzwe ibyo gukumira Jenoside, Alice Wairimu Nderitu, nyuma yo kugirira uruzinduko muri RDC. Yatanze impuruza ku bimenyetso biganisha kuri Jenoside biri gututumba.

Mu itangazo yashyize ahagaragara kuri uyu wa 30 Ugushyingo, yagize ati "Imvururu zihari ubu ni ikimenyetso cy’uko sosiyete ifite intege nke; ni icyerekana ko hakiri uburyo butuma urwango rwavuyemo Jenoside mu bihe byashize rukomeza guhererekanwa."

Ubugizi bwa nabi muri RDC ntiburi mu Burasirazuba bw’igihugu gusa, kuko Alice Wairimu Nderitu yagaragaje ko no mu Burengerazuba bw’igihugu ariko bimeze mu moko arimo aba-Suku, Mbala, Yansi, Songe, Luba, Kongo, Yaka na Teke.

Yavuze ko izo mvururu zahitanye ubuzima bw’abaturage abandi bagakomereka, inzu zirasenywa izindi ziratwikwa.

Loni igaragaza ko umuzi w’ubu bugizi bwa nabi n’urwango rushingiye ku moko byenyegejwe cyane muri RDC n’abasize bakoze Jenoside mu Rwanda, bagiye muri icyo gihugu bakarema imitwe ishingiye ku ngengabitekerezo ya Jenoside nka FDLR.

Igikomeje gutera impungenge ni uburyo ntawe urahanirwa ubwicanyi bukorerwa Abatutsi b’abanye-Congo, imvugo z’urwango n’ibindi bikorwa bishobora gukururira akaga RDC.

Ingabo za FARDC n'imitwe zikorana nayo barashinjwa kwica abanye-Congo bavuga Ikinyarwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .