Ibihugu bya EAC bigiye gushyiraho ingamba zihuriweho zo kuzamura ubukerarugendo nyuma ya Coronavirus

Yanditswe na Habimana James
Kuya 24 Kamena 2020 saa 01:35
Yasuwe :
0 0

Umuryango wa Afurika y’Iburasirazuba, EAC, uvuga ko abanyamuryango bawo bazashyiraho uburyo buhuriweho buzafasha kongera kuzahura ubukerarugendo nyuma y’ihungabana bwatewe n’icyorezo cya coronavirus.

Urugaga rw’Abikorera mu Muryango wa Afurika y’Iburasirazuba, East African Business Council, EABC) rwagaragaje muri Mata ko urwego rw’ubukerarugendo mu karere ruzahura n’ibihombo bikomeye kubera guhagarika ibikorwa mu kwirinda icyorezo cya Covid-19.

EACB igaragaza ko muri EAC nibura miliyari eshanu z’amadolari yagombaga kwinjizwa n’ubukerarugendo azagabanyuka mu 2020 kubera icyo cyorezo, mu gihe abakerarugendo bagera kuri miliyoni 6.2 bagombaga kuza gusura akarere bashobora kugabanyuka.

Guhera muri Werurwe uyu mwaka nibwo ibikorwa by’ubukerarugendo byatangiye guhagarara muri EAC hirindwa ikwirakwizwa rya Coronavirus. Nk’ibikorwa by’amahoteli n’amapariki byarahagaze hafi ya hose.

Umunyamabanga wa EAC, ushinzwe Imari n’Ubutegetsi, Bazivamo Christophe, yavuze ko uyu muryango wifatanyije na za guverinoma ndetse n’inganda mu rwego rwo koroshya no guhuza amavugururwa ajyanye no kuzahura urwego rw’ubukerarugendo.

Yagize ati "Turimo guhuza politiki n’ingamba zo kuzamura iterambere ry’urwego rw’ubukerarugendo kuko ibikorwa byarwo byahagaze kuva muri Werurwe uyu mwaka ubwo akarere kashyiragaho ingamba zo guhagarika ingendo zo mu kirere mu kwirinda ikwirakwira rya COVID-19.”

Bazivamo yatangaje ko ibihugu bigize EAC biteganya ko 60% by’abakerarugendo bazagabanuka muri Nyakanga 2020.

Avuga ko gutakaza amafaranga avuye mu bukerarugendo muri aka karere byagize uruhare mu ihagarikwa akazi, mu gihe nyamara hashyirwaga mu bikorwa imishinga igamije kubungabunga inyamaswa zinjiza amafaranga ku baturage.

Avuga ko "Habaye igabanuka rya 19% mu ngendo z’ubukerarugendo mu karere kose kubera COVID-19, ndetse habaho no guhagarika ibikorwa byo gushaka amacumbi bishingiye ku bukerarugendo, ibi nabyo byagabanyije ibijyanye no kurinda amoko atandukanye y’ibidukikije."

Avuga ko 17% by’abakerarugendo b’abanyamahanga aribo baza muri Afurika y’Iburasirazuba gusura ahantu nyaburanga, kuba badahari kubera icyorezo cyibasiye isi yose byatumye havuka ibibazo bitandukanye.

Agaragaza ko izi ngamba za nyuma ya COVID-19, zinagamije kurushaho gukoresha ikoranabuhanga.

Umuyobozi muri RDB ushinzwe pariki z’igihugu, Eugène Mutangana, avuga ko u Rwanda rushyigikiye gahunda y’akarere yo gushyiraho ikoranabuhanga, ndetse n’abikorera bakagaragaramo mu kuzamura ubukungu bw’ubukerarugendo.

Avuga ko ingamba zo kongera ubukerarugendo mu karere zigomba kwibanda ku kuzamura ubufatanye bwa Leta n’abikorera ku giti cyabo, guhuza ikoranabuhanga no gukuraho imisoro kugira ngo isoko ry’imbere mu bihugu ryiyongere.

Kugeza ubu urwego rushinzwe Iterambere mu Rwanda (RDB), rwashyizeho amabwiriza agenga ibikorwa byo kongera gufungura ibijyanye n’ubukerarugendo hagamijwe kuzahura ubukungu bwahungabanyijwe na Coronavirus.

Ubukerarugendo kandi ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10% mu gihe na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera ku kigero cya 11% na 9% kuva mu 2008 kugera mu 2019.

Urwego rw'ubukerarugendo muri EAC ruri mu zahungabanyijwe na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .