Ibihanzwe amaso ku kwinjira kwa RDC muri EAC

Yanditswe na Iradukunda Serge
Kuya 15 Kamena 2019 saa 04:35
Yasuwe :
0 0

Repubulika Iharanira Demokarasi ya Congo iherutse gusaba kwinjira mu muryango w’ibihugu bya Afurika y’Iburasirazuba (EAC), akaba ari intambwe yo kwagura imbibi z’uyu muryango zikagera ku Nyanja ya Atlantique.

Uku gusaba kwinjira muri uyu muryango kuje gukurikira ibiganiro byagiye biba hagati ya Felix Tshisekedi, uyobora iki gihugu na mugenzi we Kagame Paul, Perezida w’u Rwanda, unayoboye uyu muryango wa EAC.

Amakuru ava mu biganiro byabaye mbere y’uko iki gihugu gisaba kwinjira muri uyu muryango mu buryo bweruye, ni uko abakuru b’ibihugu bigize EAC, bategerezanyije amatsiko kwinjira kwa Congo muri uyu muryango.

RDC yasabye kwinjira muri uyu muryango ku wa 8 Kamena, mu ibaruwa yandikiye umuyobozi wa EAC, Perezida Kagame. Ivuga ko impamvu yasabye kuwinjiramo ari ukwiyongera kw’amasezerano y’ubucuruzi igirana n’ibihugu bigize uyu muryango.

Perezida Kagame yagejeje iki cyifuzo cya Congo mu bunyamabanga bw’uyu muryango, kugira ngo gishyirwe muri gahunda y’ibizigwa mu nama y’abakuru b’ibihugu biwugize izaba mu Ugushyingo, aho nibasanga yujuje ibisabwa ibihugu bizatorera umwanzuro.

Inyungu zazanwa na RDC muri EAC

Kwinjira kwa RDC muri EAC birafatwa nk’impinduka ikomeye cyane kuko ari igihugu gikize ku mutungo kamere ndetse kikaba gifite isoko ry’abaturage benshi bangana na miliyoni 81.

Nk’uko The East African yabisesenguye, Repubulika Iharanira Demokarasi ya Congo nicyo gihugu cya mbere ku Isi gicukura amabuye yo mu bwoko bwa cobalt, yifashishwa mu gukora bateri z’imodoka, kikaba igihugu cya mbere muri Afurika gifite umuringa.

Hejuru y’ibyo Congo ibonekamo andi mabuye y’agaciro nka Zahabu, Diamant, ubutare bwa Uranium, Coltan biyigira kimwe mu bihugu bikungahaye ku mutungo kamere ku isi.

Igihugu cya Congo kandi gifite uruzi rwa Congo, uru ruzi rutuma congo iba igihugu kigira umusaruro mwinshi ukomoka mu buhinzi kubera ubutaka bwera buri mu bibaya by’uru ruzi.

Ibi byose byatuma yinjiye muri uyu muryango wabasha kwihaza mu bijyanye n’amabuye y’agaciro ndetse n’ibikomoka mu buhinzi.

Mutesi Patience umuyobozi wa Trade Mark East Africa mu Rwanda, yakiriye neza ubusabe bwa Congo avuga ko ari amahirwe ku bakora ubucuruzi.

Congo ifite abaturage bangana na miliyoni 81, barenda kungana na kimwe cya kabiri cy’abaturage bose b’ibihugu bigize EAC, iri n’isoko rikomeye.

Imibare ya Banki nkuru y’igihugu (BNR) igaragaza ko mu mwaka wa 2018 mu u Rwanda rwohereje ibicuruzwa muri Congo bifite agaciro ka miliyoni 456.8 z’amadolari mu gihe rwakuyeyo ibicuruzwa bifite agaciro ka miliyoni 11.2 z’amadolari.

Uganda yohereje muri Congo ibicuruzwa muri Congo bifite agaciro k’Amadorali miliyoni 398 mu gihe yakuyeyo ibicuruzwa bifite agaciro k’Amadorali miliyoni 2.5.

Imibare ya Banki ya Tanzania yo yerekana ko muri 2017 iki gihugu cyohereje muri Congo ibicuruzwa muri Congo bifite agaciro k’Amadorali miliyoni 153 mu gihe cyakuyeyo ibicuruzwa bifite agaciro ka miliyoni imwe y’Amadorali.

Nubwo ibi byerekana ko EAC izunguka umunsi Congo yinjiye muri uyu muryango, iki gihugu kiracyafite ibibazo birimo icyorezo cya Ebola kimaze kwica abarenga 1,200 guhera umwaka ushize, n’ikibazo cy’imitwe yitwaje intwaro cyane cyane mu gace k’uburasirazuba cyatumye abarenga miliyoni 4.5 bahunga.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza