Havumbuwe ibuye rya diamant rizagurishwa arenga miliyari 17 Frw

Yanditswe na Ndahayo Emmanuel
Kuya 24 Kanama 2020 saa 08:43
Yasuwe :
0 0

Ikigo Gem Diamonds Ltd. gicukura amabuye ya diamant mu gihugu cya Lesotho, kimwe mu bifite ubu butunzi ku bwinshi ku Isi, cyavumbuye ibuye rinini, rishobora kuzagurushwa arenga miliyari 17 Frw ku isoko.

Ni diamant ipima carat 442, yavumbuwe mu kirombe cya Letseng muri Lesotho. Carat ni igipimo gito bapimisha diamant.

Kubona ibuye ringana rityo ntibisanzwe, ndetse ryitezweho gukurura abashoramari banini bagura aya mabuye.

Uruganda rw’ubucuruzi bwa diamant rwashegeshwe bikomeye na Coronavirus, kuko inganda zikora imitako n’ibindi bikoresho zahagaritse ibikorwa ndetse igihugu cy’u Buhinde, gisanzwe ari isoko rinini cyane ry’amabuye y’agaciro, gifunga ibikorwa by’inganda nyinshi mu rwego rwo kwirinda ikwirakwira rya Coronavirus.

Ibi byatumye ibigo bicuruza diamant nyinshi nka De Beers na Alrosa PJSC y’Abarusiya bigabanya ingano ya diamant byacuruzaga.

Ikirombe cya Letseng kizwi cyane mu kugira amabuye meza cyane y’agaciro, ndetse si ubwa mbere aka gace kavumbuwemo ibuye rihenze kuko no mu myaka ibiri ishize, havumbuwe diamant ipima carat 910, ifite agaciro k’arenga miliyari 38 Frw.

Umuyobozi wa Gem Diamonds Ltd, Clifford Elphick, yavuze ko “kuvumbura diamant ifite carat 442, rimwe muri diamant nini zivumbuwe uyu mwaka, ni ibirushaho kwerekana ubushobozi bw’ikirombe cya Letseng ndetse n’ubwa Gem diamonds bwo gukomeza gushaka diamant nini kandi zifite agaciro”.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .