Haravugwa umwuka mubi hagati ya Perezida Ndayishimiye na Minisitiri w’Intebe Bunyoni

Yanditswe na Musangwa Arthur
Kuya 16 Ukuboza 2020 saa 09:14
Yasuwe :
0 0

Haravugwa umwuka utari mwiza hagati ya Perezida mushya w’u Burundi, Evariste Ndayishimiye na Minisitiri we w’Intebe, Alain-Guillaume Bunyoni, abagabo bamaze igihe batumvikana haba mu buryo babona ibintu n’imikorere.

Amezi make nyuma yo gutorerwa kuyobora u Burundi, nibwo Perezida Ndayishimiye yahisemo Bunyoni wari Minisitiri w’Umutekano akaba umwe mu basirikare bakomeye kandi batinywa mu Burundi ngo amubere Minisitiri w’Intebe.

Ikinyamakuru Libre Belgique cyatangaje ko nubwo Ndayishimiye yabikoze, asanzwe atajya imbizi na Bunyoni haba mu myumvire n’imikorere. Yabikoreye kugira ngo yiyegereze umwanzi hafi kuko Bunyoni avuga rikijyana mu nzego z’umutekano z’u Burundi bityo kuba yakora icyabangamira Ndayishimiye byoroshye.

Bunyoni ni umwe mu bayobozi bakuru b’u Burundi bakozweho iperereza n’Urukiko Mpuzamahanga Mpanabyaha ku byaha byibasiye inyokomuntu bikekwa kuba byarakozwe mu 2015 ubwo Pierre Nkurunziza yiyamamarizaga manda ya gatatu. Yafatiwe kandi ibihano na Leta Zunze Ubumwe za Amerika, isura ye mu ruhando mpuzamahanga yarangiritse.

Icyakora ni umwe mu baherwe mu Burundi dore ko yagiye yigwizaho umutungo biciye mu buryo butandukanye. Libre Belgique ivuga ko ari we wemerewe kwinjiza ifumbire mvaruganda mu Burundi.

Nubwo Bunyoni akomeye, ashyigikiwe n’igipolisi gifite imyitozo mike ya gisirikare, gihembwa nabi ndetse cyagiye kivugwamo ibibazo bitandukanye by’imyitwarire mu gihe Ndayishimiye ashyigikiwe cyane n’igisirikare gihabwa imyitozo ikomeye n’ibikoresho bigezweho.

Kimwe mu byo bashingiraho bavuga ko umwuka utameze neza hagati y’abo bagabo bombi ni uburyo kuva Bunyoni yagirwa Minisitiri w’Intebe, hari ibyemezo bikomeye byagiye binanirana gufatwa kandi bikenewe.

Ingero ni nk’aho amezi atanu ashize nta banyamabanga bakuru n’abayobozi bakuru muri za Minisitere zitandukanye, mu gihe Ndayishimiye yari yijeje ko bigiye gukorwa vuba. Kubera ko abo bantu batarashyirwa mu myanya, bituma imyanzuro igezwa mu nama y’abaminisitiri ngo iganirweho ari mbarwa, bikadindiza ibikorwa bya Guverinoma.

Kudashyiraho abo bayobozi, bivugwa ko byatewe n’uwo mwuka mubi uri hagati ya Perezida na Minisitiri w’Intebe.

Ndayishimiye yahoze ari Umunyamabanga Mukuru w’ishyaka riri ku butegetsi CNDD-FDD. Nyuma yo kuba Perezida hagombaga kuba amatora y’ishyaka agasimburwa, nyamara umunsi wari watanzwe w’Inteko Rusange y’ishyaka ntabwo yabaye. Icyabiteye, havugwamo ubwumvikane buke hagati ya Ndayishimiye na Bunyoni ku muntu uzahabwa izo nshingano.

Ubucuruzi bwa magendu

Mu bindi bivugwaho kuzamura umwuka mubi hagati y’aba bagabo bombi harimo amakuru amaze iminsi atangazwa y’ubucuruzi butemewe bukorwa burimo n’ubw’abantu, kandi buhagarikiwe n’abayobozi bakuru mu nzego z’umutekano n’abazihozemo nka Bunyoni.

Kuri uyu wa Mbere tatriki 14 Ukuboza inkuru yabaye kimomo ko polisi yatahuye inzu mu Mujyi wa Bujumbura yari irimo abagore n’abakobwa basaga ijana bari bategerejwe kujyanwa kugurishwa mu bihugu by’Abarabu.

Aho babasanze ni mu nzu isanzwe nziza bavugaga ko bigishirizwamo guteka. Nta n’umwe wari ufite uburyo bw’itumanaho, ku buryo byari igikorwa giteguye neza.

Ubu bucuruzi ababizi neza bavuga ko busanzwe muri icyo gihugu aho abagore cyangwa abakobwa boherezwa muri ibyo bihugu bagakurwamo zimwe mu ngingo z’imibiri yabo zigacuruzwa, bagakoreshwa ubucakara bw’imibonano mpuzabitsina n’ibindi.

Umuryango utegamiye kuri Leta, Union for the Rebirth of the Nation (URN) watangaje ko ibyo ari ibikorwa bisanzwe bikorwa kandi bishyigikiwe na bamwe mu bakomeye mu gisirikare.

Si ibyo gusa kuko havugwa n’ubucuruzi butemewe bw’amabuye y’agaciro, magendu z’imyenda n’ibindi kandi byose bihagarikiwe n’abo bayobozi bakomeye mu nzego z’umutekano.

Mu bashyirwa mu majwi n’uyu muryango harimo Minisitiri w’Intebe Alain-Guillaume Bunyoni wahoze ari Minisitiri w’Umutekano, akaba umusirikare ukomeye kandi utinywa mu Burundi.

Umuyobozi Mukuru w’Urwego rw’Iperereza na Perezuda Ndayishimiye bivugwa ko batari bazi iby’ubwo bucuruzi kuko bwatangiye mbere ubwo CNDD-FDD yajyaga ku butegetsi, bukaba bwarakorwaga n’abayobozi bakuru mu nzego z’umutekano bari mu myanya itandukanye ubu.

Amakuru y’abo bagore bari bagiye koherezwa mu barabu, ngo yatanzwe n’umwe mu bakozi b’urwego rw’iperereza utari ubishyigikioye kandi ashaka kwizerwa mu biro bya Perezida. Bivugwa ko ashobora no kubihemberwa ubwo hazaba hizihizwa umunsi w’umurimo muri Gicurasi 2021.

Uretse ubwo bucuruzi kandi, hashize iminsi hafatwa imyenda ya caguwa yinjizwaga mu gihugu mu buryo bwa magendu ivuye muri Repubulika Iharanira Demokarasi ya Congo.

Ni ubucuruzi URN ivuga ko bushobora guteza umwiryane hagati y’abayobozi bakuru mu nzego z’umutekano bungukiraga muri ubu bucuruzi n’abari kubagendaho babangiriza ubucuruzi kuko bamaze igihe babukora ntacyo bishisha ku butegetsi bwa Perezida Pierre Nkurunziza.

Umwuka mubi rero ushobora kuzamuka hagati y’uruhande rwa Perezida Ndayishimiye ugikeneye kugira isura nziza mu baturage n’uruhande rwa Bunyoni n’ibindi bikomerezwa mu nzego z’umutekano byari bimaze igihe bikora ubwo bucuruzi butemewe.

Bivugwa ko Bunyoni (ubumoso) amaze igihe atavuga rumwe na Perezida Ndayishimiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .