00:00:00 IGIHE NETWORK KN KINYARWANDA EN ENGLISH FR FRANCAIS

Hagaragaye ubwoko bushya bwa Covid-19

Yanditswe na Bukuru JC
Kuya 25 Ugushyingo 2021 saa 05:45
Yasuwe :
0 0

Abahanga mu by’indwara z’ibyorezo muri Afurika y’Epfo batangaje ko bari kwiga imiterere y’ubwoko bushya bwa Covid-19 bwagaragaye muri icyo gihugu, bivugwa ko bufite ubushobozi buhambaye bwo kwihinduranya, ku buryo bishoboka ko inkingo ziri kwifashishwa mu kurwanya iki cyorezo ntacyo zamara kuri ubu bwoko bushya.

Ubu bwoko bwagaragaye bwa mbere muri Botswana, ahagaragaye abantu batatu, buza kongera kugaragara muri Afurika y’Epfo na Hong Kong, ku mugenzi wari uvuye muri Afurika y’Epfo.

Abahanga ntibaramenya neza imiterere n’imyitwarire y’ubu bwoko bushya bwitwa B.1.1.529, uretse ko icyamaze kugaragara ari uko bufite ubushobozi bwo kwihindura ku kigero cyo hejuru.

Dr Tom Peacock, Umuhanga mu ndwara z’Ibyorezo muri Kaminuza ya Londre yatanze umuburo kuri ubu bwoko bushya bwa Covid-19 bukirimo kwigwa, avuga ko “Kuva bufite ubushobozi buhambaye bwo kwihinduranya byerekana ko buteye impungenge…bukwiye gukurikiranwa mu buryo bwose bushoboka.”

Icyakora yasabye abantu kudacika intege mu gihe igenzura ku miterere y’ubu bwoko bushya rikomeje, avuga ko wasanga hari igihe ubushobozi bwabwo bwo gutuma umuntu aremba buri hasi, ati “Reka twizere ko ari uko bimeze.”

Bivugwa ko abantu 100 bamaze gusangwamo ubu bwoko bushya bukiri gukorwaho ubushakashatsi, ndetse ntiburahabwa izina nk’uko tuzi Delta n’andi moko.

Abahanga mu by’Ubuzima bakomeje kuvuga ko mu gihe Umugabane wa Afurika udahawe uburyo bwo gukingira abaturage bawo, bishobora kuzarangira ubaye indiri y’amoko mashya ya Covid-19, ashobora kuza akaze ku buryo iby’inkingo bitayakanga.

Kugeza ubu Abanyafurika 6.6% ni bo bonyine bamaze guhabwa inkingo za Covid-19 mu buryo bwuzuye, mu gihe mu nkingo miliyoni 403 uyu Mugabane wahawe, izigera kuri 55% ari zo zimaze gutangwa gusa, bitewe no kubura ibikoresho bihagije byo kwifashisha mu bikorwa by’ikingira.

Abahanga mu by'indwara z'ibyorezo bahangayikishije n'ubwoko bushya bwa Covid-19 bwagaragaye muri Afurika y'Epfo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .