Gambia: Yahya Jammeh yisubiyeho ahakana ibyavuye mu matora

Yanditswe na Deus Ntakirutimana
Kuya 10 Ukuboza 2016 saa 11:19
Yasuwe :
0 0

Yahya Jammeh yanze ibyavuye mu matora y’Umukuru w’Igihugu muri Gambia yari yegukanywe na Adama Barrow bari bahanganye.

Mu cyumweru gishize Komisiyo yigenga y’amatora muri Gambia yatangaje ko Adama Barrow ari we watsinze amatora ndetse Perezida Jammeh ahita atangariza kuri televiziyo y’igihugu ko yemera ibyayavuyemo.

Yagize ati “Watorewe kuba Perezida wa Gambia, ndakwifuriza amahirwe masa.”

Nyuma y’iminsi itanu, uyu Mukuru w’Igihugu yongeye gutangaza ko ayo matora atari yujuje ibisabwa asaba ko hakorwa andi aciye mu mucyo.

Ati “Nyuma y’iperereza ryakozwe, nafashe umwanzuro wo kudaha agaciro ibyavuye mu matora aheruka gukorwa. Ntegetse amatora meza aciye mu mucyo no mu bwisanzure, azemezwa na Komisiyo y’Igihugu yigenga kandi itinya Imana.”

Komisiyo y’amatora yatangaje ko Barrow yatowe n’abantu 263,515 akagira amajwi 45.5%, Perezida Jammeh atorwa na 212,099 agira amajwi 36.7%, umukandida wa gatatu Mama Kandeh, atorwa na 102,969 agira amajwi angana na 17.8%.

Ibihugu bitandukanye byamaganiye kure iryo jambo rye ryafashwe nko gupfobya ubushake bw’abanya-Gambia bitabiriye amatora bagahitamo umuyobozi ubabereye.

Umuvugizi wa Leta Zunze Ubumwe za Amerika, Mark Toner, yavuze ko ibyatangajwe na Jammeh bidakwiye kwemerwa kuko bihabanye n’ibyo abaturage ba Gambia bemera.

Akomeza avuga ko ari igikorwa kigamije guteza imvururu, gutesha agaciro amatora yaciye mu mucyo, gifite intumbero yo kugundira ubutegetsi.

Guverinoma ya Sénégal, igihugu gituranye na Gambia yamaganiye kure ibyatangajwe na Jammeh isaba ko habaho inama yihuse y’akanama ka Loni gashinzwe amahoro n’umutekano.

Minisitiri w’Ububanyi n’Amahanga wa Sénégal, Mankeur Ndiaye, akaba yabitangarije kuri televiziyo y’igihugu asaba Jammeh kubahiriza ibyavuye mu matora.

Barrow agomba kujya ku butegetsi muri Mutarama 2017.

Mai Ahmad Fatty, umuyobozi w’ikipe y’inzibacyuho yabwiye Ibiro Ntaramakuru by’Abongereza Reuters, ko barimo gushaka uburyo byazashyirwa mu bikorwa.

Gambia ni igihugu gito kurusha ibindi muri Afurika gituwe n’abaturage batageze kuri miliyoni ebyiri.

Jammeh avuga ko ibyavuye mu matora bitemewe, kuko imibare y’amajwi yahinduwe kugira ngo ibogamire kuri Adama Barrow bari bahanganye.

Umuvugizi w’Umuryango uharanira uburenganzira bwa muntu, Human Rights Watch, yavuze ko bagiye guhagurukira icyo kibazo.

Uwo muryango kandi wasabye imiryango Gambia ibarizwamo nka Ecowas n’umuryango mpuzamahanga ndetse n’uwa Afurika Yunze Ubumwe guhakana yivuye inyuma ibyatangajwe na Jammeh bigamije gutesha agaciro ubushake bw’abanyagihugu.

Human Rights Watch irega Leta ko mu gihe cy’amatora yatoteje abatavuga rumwe nayo mu buryo bwa bucece, ndetse n’abantu babiri baharanira uburenganzira bwa muntu bakicwira muri gereza yafungiwemo abandi benshi bangiwe kuvurwa no guhabwa ubufasha mu by’amategeko.

N’ubwo bivugwa ko hashobora kuba imvururu, mu murwa mukuru wa Gambia, Banjul hararangwa ituze mu mihanda itandukanye, abasirikare bashyize imifuka y’umucanga aho babona hashobora kubera imvururu.

Jammeh yari ku butegetsi amazeho imyaka 22, yagiyeho ahiritse ubwariho mu 1994.

Perezida Yahya Jammeh (iburyo) yahakanye ibyavuye mu matora yatsinzwemo na Adama Barrow bari bahanganye
Benshi mu baturage bishimiye itorwa rya Adama Barrow

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza