Ethiopia yohereje mu kirere icyogajuru cya mbere

Yanditswe na Nkurunziza Ferdinand
Kuya 20 Ukuboza 2019 saa 07:35
Yasuwe :
0 0

Ethiopia yiyongereye ku bindi bihugu byo Munsi y’Ubutayu bwa Sahara birushaho guteza imbere gahunda y’ikoranabuhanga ryo mu kirere, hagamijwe kugera ku ntego z’iterambere byihaye no guteza imbere udushya muri siyansi, cyohereza icyogajuru cya mbere mu kirere.

Iki gikorwa cyabereye mu Bushinwa kuri uyu wa Gatanu; abayobozi bo mu nzego zo hejuru n’abaturage bateraniye ku Kigo cy’Ubushakashatsi n’Ubugenzuzi kiri ahitwa Entoto, muri Ethiopia, bareba amashusho y’ako kanya (Live broadcast) yoherezwaga avuye mu Kigo cy’Abashinwa gishinzwe kohereza ibyogajuru mu kirere.

Minisitiri w’Intebe wungirije wa Ethiopia, Demeke Mekonnen Hassen, abinyujije kuri televiziyo y’igihugu, yagize ati “Kohereza icyogajuru mu kirere bizaba umusingi w’amateka y’urugendo rugana ku bukungu bwa Ethiopia.”

Yagize ati “Ikirere ni ibiryo, ikirere ni uguhanga umurimo, igikoresho cy’ikoranabuhanga, ubusugire, kugabanya ubukene, ni buri kimwe cyose kuri Ethiopia kugira ngo igere ku iterambere rihuriweho kandi rirambye.”

Umuyobozi mukuru w’Ikigo cy’Ikoranabuhanga mu by’Ikirere muri Ethiopia, Solomon Belay, yabwiye Ibiro Ntaramakuru Reuters ko icyo cyogajuru cyakozwe n’inzobere zo mu Bushinwa zifatanyije n’izo muri Ethiopia, kandi ko u Bushinwa bwishyuye hafi miliyoni $6, muri miliyoni zisaga $7 zakoreshejwe.

Abayobozi bavuga ko icyogajuru cya Ethiopia kizajya kifashishwa mu kugenzura iteganyagihe n’ibimera.

Ibindi byogajuru umunani byohererejwe rimwe mu kirere n’icya Ethiopia, birimo n’icyakozwe mu mushinga w’ubufatanye hagati ya Brazil n’u Bushinwa, kizifashishwa mu kugenzura ibibera ku Isi ariko ku mpamvu zitari iza gisirikare.

Ibi bitanga ishusho y’ubufatanye bwagutse hagati y’ibihugu byombi, kimwe n’u Burusiya, u Buhinde na Afurika y’Epfo.

Icyogajuru cy’u Bushinwa na Brazil (CBERS-4A), kibaye icya gatandatu gikozwe mu mushinga w’ubufatanye hagati y’ibihugu byombi, watangiye mu 1988. Kizafasha Leta ya Brazil kugenzura ishyamba rya Amazon n’ihindagurika ry’ibihe muri icyo gihugu.

Ibihugu byinshi byo Munsi y’Ubutayu bwa Sahara biri gusiganwa mu guteza imbere gahunda z’ikoranabuhanga ryo mu kirere, mu rwego rwo kugera ku ntego byihaye mu iterambere no guhanga udushya muri siyansi.

Mu 2017, Umuryango wa Afurika Yunze Ubumwe wemeje itegeko rigenga guteza imbere ubumenyi bwo mu kirere muri Afurika; wemeza ko ubuhanga n’ikoranabuhanga byo mu kirere, bigomba guteza imbere ubukungu, bikanarengera umutungo kamere ku mugabane.

Muri Gashyantare 2019 ku bufatanye bwa Leta y’u Rwanda n’Ikigo Mpuzamahanga mu by’Itumanaho, OneWeb, hoherejwe mu isanzure icyogajuru cyiswe ‘Icyerekezo’,izina cyahawe n’abanyeshuri bo ku Rwunge rw’Amashuri rwitiriwe Mutagatifu Petero ku Nkombo, cyitezweho kugeza internet mu bice birimo iri shuri.

Muri Nzeri kandi icyogajuru cy’u Rwanda, RWASAT-1 cyoherejwe mu isanzure, gihagurukira muri Tanegashima Space Center mu Majyepfo y’u Buyapani.

Ethiopia yohereje mu kirere icyogajuru cya mbere

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza