00:00:00 IGIHE NETWORK KN KINYARWANDA EN ENGLISH FR FRANCAIS

Ethiopia: Abakozi ba Loni barashweho amasasu berekeza mu nkambi y’impunzi

Yanditswe na Tuyishimire Raymond
Kuya 9 Ukuboza 2020 saa 06:14
Yasuwe :
0 0

Ingabo za Ethiopia zarashe amasasu zinafunga abakozi b’Umuryango w’Abibumbye nyuma yo gutwara imodoka bakarenga ahashyizwe bariyeri mu Gace ka Tigray kari kuberamo imirwano.

Umuvugizi wa Leta, Redwan Hussein, yavuze ko iryo tsinda rya Loni ryanze kubahiriza amabwiriza yashyizweho, ababuza kugera muri ako gace.

Kuva ku wa 4 Ugushyingo 2020, ingabo za Leta ya Ethiopia zihanganye n’iz’Ishyaka rya Tigray People’s Liberation Front (TPLF).

Ubwo abakozi ba Loni baraswagaho ku Cyumweru barimo bagerageza gusura inkambi y’impunzi zikomoka muri Eritrea.

Izo mpunzi bivugwa zinjiriwe n’ingabo za Eritrea zambutse umupaka zikajya muri Tigray, zigafata bamwe zikabasubiza muri Eritrea. Gusa Leta ya Ethiopia n’iya Eritrea zihakana ko ingabo za Eritrea ziri muri Tigray mu gufasha TPLF kugera ku ntsinzi.

Loni yasabye Leta ya Ethiopia gushakira inzira abagiraneza kugira ngo babashe kugeza ibirimo ibiribwa n’imiti kuri miliyoni zirenga umunani zituye muri Tigray.

Umuvugizi wa Leta, Redwan, yabwiye Ibiro Ntaramakuru by’Abafaransa ko bamwe mu bakozi ba Loni bafunzwe, abandi baraswaho.

Yagize ati “Barenze kuri bariyeri ebyiri bagana mu turere batemerewe kujyamo kandi bari babujijwe kuhagana. Ubwo bari bagiye kurenga kuri bariyeri ya gatatu, barashweho, ubundi barafungwa.’’

Loni nta makuru iratanga ku byabaye ku bakozi bayo.

Agace ka Tigray kamaze iminsi ari isibaniro ry’intambara hagati y’ingabo za Leta n’izari zishyigikiye ubutegetsi bw’Ishyaka rya Tigray People’s Liberation Front (TPLF).

Muri Nzeri 2020, Ishyaka TPLF ryateguye amatora y’inzego z’ibanze muri Tigray, ibintu byarakaje ubutegetsi bwa Minisitiri w’Intebe, Abiy Ahmed kuko bihabanye n’umwanzuro wari wafashwe.

Tariki 4 Ugushyingo 2020, Ingabo za Ethiopia zatangije ibitero bigamije kwirukana TPLF ku butegetsi, ishinjwa ubugambanyi no gutera ibirindiro by’ingabo za Leta.

Kugeza ubu abarenga 40.000 bamaze kwambuka umupaka berekeza muri Sudani ndetse n’abandi benshi bashobora kuba baravuye mu byabo.

Umutekano warakajijwe cyane mu bice bitandukanye nyuma y'intambara hagati y'ingabo za Leta n'iz'agace ka Tigray

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .