00:00:00 IGIHE NETWORK KN KINYARWANDA EN ENGLISH FR FRANCAIS

EAC yishyuye amafaranga yatumye Abanye-Congo bateza rwaserera i Nairobi

Yanditswe na Musangwa Arthur
Kuya 6 Ukuboza 2022 saa 03:51
Yasuwe :

Umuhuza mu bibazo by’Abanye-Congo, Uhuru Kenyatta, yemeje ko ubunyamabanga bw’Umuryango wa Afurika y’Iburasirazuba (EAC) bwishyuye amafaranga yasabwaga n’abahagarariye imitwe yitwaje intwaro iri mu biganiro i Nairobi, ikibazo cyatumye ibiganiro bisubikwa igitaraganya.

Mu gihe ibiganiro byari bimaze iminsi irindwi bihuje abanye-Congo byagombaga gusozwa kuri uyu wa Mbere nyuma ya saa sita, igikorwa cyimuriwe kuri uyu wa Kabiri kubera ko ibiganiro bitarangiye nk’uko byari byitezwe.

Ibintu bijya kumera nabi, abitabiriye ibiganiro by’umwihariko abayobozi b’imitwe yitwaje intwaro, babanje guhurira mu kibuga cya Safari Park Hotel, bemeranya kutitabira ikiganiro cyo gusoza iyi mishyikirano nyuma ya saa sita.

Amakuru yaje kujya hanze ni uko bamwe mu bitabiriye ibiganiro bavuze ko batahawe amafaranga bemererwa nk’insimburamubyizi (perdiem), mu gihe abandi bahawe $ 300 bakavuga ko ari intica ntikize.

Byatumye benshi mu bayobozi b’imitwe yitwaje intwaro bemeranya gusohoka ahaberaga inama, kubera ko basize imiryango yabo, bityo bakwiye guhabwa amafaranga afatika.

Kenyatta yaje kuvuga ati "Abateguye bino biganiro, tuzi ko dufite amafaranga ahagije kubera ko nanjye ndi mu bantu bashatse ayo mafaranga, kandi ntabwo ari ayabo, ni ayo gufasha kugarura amahoro mu banye-Congo. Ndashaka kwizera ko ejo muzaza, tubanze turangize ibyo bibazo mufite, ubundi twinjire muri gahunda yacu tubashe gusoza uko bikwiye."

Kuri uyu wa Kabiri mu gitondo, Kenyatta yaje kubwira itangazamakuru ko ibibazo byabonewe umuti.

Yagize ati "Uyu munsi babikemuye, ntabwo ari Leta ya Congo kubera ko ibi biganiro byateguwe n’Ubunyamabanga bw’Umuryango wa Afurika y’Iburasirazuba, ariko bwaje gukererwa gutanga ibikenewe ku bitabiriye ibiganiro, kandi ejo ni wo wari umunsi wa nyuma."

"Nabonye ibibazo byabaye hano kubera ko bamwe bavugaga ko bafite amadeni ya hoteli n’ibindi n’ibindi, ndarakara ndavuga ngo dusubike ibiganiro kugeza ubunyamabanga bwa bwa Afurika y’Uburasirazuba bwubahirije inshingano zabwo kuri aba bantu bitabiriye ibi biganiro."

Kenyatta yavuze ko kuri uyu wa Mbere ku mugoroba ndetse no mu gitondo cyo kuri uyu wa Kabiri, ubunyamabanga bwujuje ibyo bwasabwaga ku bitabirye ibiganiro bose, asaba ko ubutaha ibintu byajya bitegurwa hakiri kare.

Yavuze ko muri ibi biganiro hari intambwe yatewe ndetse hari ingingo bemeranyijeho zireba Leta ya Congo, kandi hazabaho gusohora itangazo rizakurikiranwa n’inzego bireba.

Yakomeje ati "Mfite icyizere ko nitwongera guhurira i Goma hagati ya Mutarama na Gashyantare tuzabasha kugaragaza intambwe zatewe ku byemeranyijwe hano, no kwemeza ingegabihe nshya ku ngingo zisaba igihe cyisumbuyeho."

Ubwo yasubikaga ibiganiro, Kenyatta yavuze ko abantu baba bamusuzuguye kuko atakiri umuyobozi, ariko ko agomba kubimenyesha ababakuriye.

Yageze aho aho avuga ko bitabaye ibyo, "njye nta kibazo mfite kuba nahaguruka nkabwira isi nzima kutongera guha amafaranga aba bantu niba batiteguye gutegura ibiganiro no kudufasha gukomeza mu buryo bwiza."

Kuri uyu wa Mbere Kenyatta yasubitse ibiganiro byahuzaga Abanye-Congo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .