EAC yateye intambwe yo gushyiraho ifaranga rimwe

Yanditswe na David Eugène Marshall
Kuya 3 Ugushyingo 2018 saa 03:37
Yasuwe :
0 0

Umuryango wa Afurika y’Iburasirazuba wateye intambwe ikomeye iganisha ku ikoreshwa ry’ifaranga rimwe, ni nyuma y’uko Inteko Ishinga Amategeko y’uyu muryango (EALA), yemeje umushinga w’itegeko rishyiraho Ikigo gishinzwe Ibarurishamibare.

Muri iki cyumweru nibwo EALA yemeje umushinga wo mu 2017 w’itegeko rishyiraho ikigo gishinzwe ibarurishamibare cya EAC, aho utegereje kwemezwa n’Abakuru b’Ibihugu bitandatu bigize uyu muryango.

Iki kigo kigamije guhuza imibare y’ubukungu no kuyitangaza. Uyu mushinga ni inkingi ikomeye mu ishyirwa mu bikorwa rya politiki y’ifaranga rimwe muri EAC.

Itangazo rya EALA rivuga ko ‘ikigo cy’ibarurishamibare cya EAC kizaba gishinzwe iterambere, guhuza no gutangaza imibare y’Umuryango kugira ngo bikurikizwe mu gushyiraho ifaranga rimwe”.

Ibihugu bya EAC byasinye amasezerano yo gushyiraho ifaranga rimwe mu 2013. Aya masezerano ateganya ko hashyirwaho ibigo bizafasha mu kuyubahiriza. Birimo Ikigo gishinzwe Ibijyanye n’Ifaranga, Banki Nkuru ya Afurika y’Uburasirazuba byagombaga kujyaho mu 2015, Ikigo gishinzwe Ibarurishamibare kigomba kujyaho muri uyu mwaka.

Muri Gashyantare uyu mwaka nibwo Akanama k’Abaminisitiri kashyikirije EALA imishinga y’amategeko arimo uwo gushyiraho Ikigo gishinzwe ibijyanye n’Ifaranga ndetse n’umushinga w’Ikigo cy’Ibarurishamibare yo mu 2017. Iyi mishinga ni inkingi ikomeye mu ishyirwa mu bikorwa rya politiki y’ifaranga rimwe muri EAC.

Ikigo gishinzwe ifaranga rimwe rya EAC, kizaba gifite inshingano zo gutegura ibijyanye no gushyiraho iryo faranga. Nkuko ingingo ya 23 y’amasezerano ya EAC ashyiraho ifaranga rimwe abiteganya, umushinga w’itegeko ushyiraho iki kigo, witezweho kugaragaza ibijyanye n’imikorere yacyo, ubuyobozi bwacyo, ibijyanye no kugitera inkunga n’ibindi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza