00:00:00 IGIHE NETWORK KN KINYARWANDA EN ENGLISH FR FRANCAIS

Congo yongeye kwiha amenyo y’abasetsi

Yanditswe na Musangwa Arthur
Kuya 18 Mutarama 2023 saa 11:29
Yasuwe :

Guverinoma ya Repubulika Iharanira Demokarasi ya Congo (RDC), yongeye kwiha amenyo y’abasetsi isabira u Rwanda ibihano, inavuga ko M23 yanze kubahiriza imyanzuro ya Luanda irimo kurekura ibice yari yafashe nyamara yarashyikirije ingabo za EAC agace ka Kibumba na Rumangabo izuba riva.

Mu itangazo ryashyizweho umukono na Visi Perezida akaba na Minisitiri w’Ububanyi n’Amahanga, Christophe Lutundula, RDC yavuze ko M23 yanze kubahiriza umwanzuro wa Luanda wo kuwa 23 Ugushyingo 2022, wo kuba abarwanyi bayo bavuye mu birindiro byabo bitarenze ku wa 15 Mutarama 2023.

Inama y’Abakuru b’Ibihugu yabereye i Luanda muri Angola ndetse n’iy’Abagaba b’Ingabo zo mu Karere yabereye i Bujumbura ku wa 8 Ugushyingo 2022, zemeje ko abarwanyi ba M23 bava mu duce bigaruriye tugasigara tugenzurwa n’ingabo z’akarere zoherejwe muri iki gihugu.

Congo yashinje M23 ko ikigaragara mu bice bya Kibumba na Rumangabo ndetse yateye na Masisi. Yashinje kandi M23 n’ingabo z’u Rwanda kwica abasivili 227 i Kishishe na Pambo mu ijoro ryo kuwa 29 rishyira uwa 30 Ugushyingo 2022.

Muri iri tangazo, Congo yasabiye abayobozi b’u Rwanda n’aba M23 ibihano kuko batubahirije ibyo bemeye i Luanda. RDC kandi yaciye amarenga yo kwirwanaho kuko M23 n’u Rwanda batubahirije ibyo basabwe na Luanda, ikazabikora nk’inshingano yo kurengera ubusugire bw’igihugu n’umutekano w’abaturage.

RDC iri mu bwihebe

Iri tangazo rya RDC rije mu gihe RDC iri mu bihe by’akaga byo gusaza imigeri kubera impamvu z’uko Loni ifite raporo ivuga ko imvugo z’urwango zatumye hatangirwa Jenoside y’Abatutsi b’abanye-Congo. Amashusho n’ubuhamya birahari kandi birashimangira ubu bwicanyi.

RDC kandi iri kwirengagiza ko imyanzuro ya Luanda yayisabye guhagarika ubufatanye na FDRL, ibyo ntabyo yakoze ahubwo nyuma y’iyi myanzuro FDLR yavuze ko ishyigikiye imikorere ya FARDC na Guverinoma ya Congo kandi ntawigeze ayinyomoza.

Umusesenguzi mu bya politiki, amategeko akaba n’umunyamakuru, Gatabazi Tite, asobanura ko ibi byerekana ko FARDC ikomeje ubufatanye bw’akadasohoka na FDLR, ikaba ifite ipfunwe n’ikimwaro byo kuba ntacyo yakoze ku myanzuro ya Luanda.

Ati “Ibi bibazo birayugarije ndetse amahanga ari kuyotsa igitutu cyo gukorana na FDLR ndetse no gukora Jenoside y’Abatutsi b’abanye-Congo”.

RDC irabeshyera M23 ko itavuye mu bice yafashe ndetse ikabeshya n’amahanga kandi azi ukuri. M23 yakoranye inama na FARDC, Monusco, indorerezi, Ingabo za EAC i Kibumba, kuwa 14 Ukuboza 2022, nyuma gato y’iyi nama, M23 yafashe icyemezo cyo gusubiza agace ka Kibumba.

Byakozwe ku manywa y’ihangu ingabo za EAC zishyikirizwa Kibumba ku mugaragaro, bucyeye bwaho M23 izinga utwangushye iragenda.

Mu minsi mike yakurikiyeho M23 yatanze ikigo cya gisirikare cya Rumangabo, igishyikiriza ingabo za EAC. Raporo zagaragaje ko M23 iri kubahiriza ibyasabwe na Luanda bituma itumizwa n’umuhuza Uhuru Kenyatta kuwa 12 Mutarama 2023.

Gatabazi ati “Kubona Bertrand Bisimwa na bagenzi be bakirwa na Kenyatta, aya ni amanota n’igitego cya dipolomasi kuri M23, bitewe no kubahiriza imyanzuro ya Luanda. Kuva uwo munsi, imvugo ya Kinshasa irimo uburakari no kwiheba”.

Kuki RDC iri kwibasira ingabo za EAC?

Nyuma yo kwibasira ingabo za Monusco, ubu Kinshasa yahinduye umuvuno yadukiriye ingabo za EAC. Uyu munsi kuri Goma insoresore zahawe udufaranga zikozanyaho na polisi, ubwo zakoraga imyigaragambyo yo kwamagana ingabo za EAC.

Izi ngabo zirazira ko Tshisekedi yumvise nabi icyemezo cyo kohereza ingabo za EAC aho yifuzaga ko zijya kurwanya M23 nyamara icyemezo ari uko ziba ingabo zo kujya hagati mu guhagarika imirwano.

Ubwo yari kuri France 24 Tshisekedi yicinye icyara avuga ko ingabo za Kenya zizinjirira Bunagana, zihita zirwana na M23. Icyo gihe icyicaro cya M23 cyari Bunagana. Izi ngabo zinjiriye Ishasha, iki kintu cyateye ipfunwe Leta ya Congo.

Leta ya Congo yakomeje kumvisha ko aka M23 kashobotse kuko haje ingabo zije kubarwanya bituma umugaba w’ingabo za EAC asobanura ko baje kuba ingabo zo kujya hagati zigahosha amakimbirane atari ukurwana. Congo yakomeje kubahatiriza kurwana baranga kuko si zo nshingano bahawe.

Gatabazi avuga ko Congo yashatse gutwerera M23 ibyabereye Kishishe, ariko uko iminsi igenda yicuma ni ko ukuri kugenda kugaragara kukanyomoza ibyo guverinoma ya RDC yavuze. Ibi bikaba bidashimishije ab’i Kinshasa.

Umunyamategeko akaba n’umugishwanama muri politiki, Gatete Nyiringabo Ruhumuliza uherutse i Kishishe muri Repubulika Iharanira Demokarasi ya Congo, yasobanuye ko nta mwana cyangwa umugore wapfuye ndetse nta nzu yatwitswe muri ako gace nk’uko bivugwa.

Ati “Mu by’ukuri, nta mwana n’umwe wigeze upfa i Kishishe, nta mugore n’umwe, ibiganiro turabifite byose […] Twageze i Kishishe, dusanga nta mwana wigeze apfa, nta mugore wigeze apfa, nta nzu yigeze itwikwa. Amazu yose aracyahari, nta muntu wigeze ashimutwa, nta muntu wigeze afatwa ku ngufu […] abantu baragenda bakagaruka ni urujya n’uruza.”

Gatabazi avuga ko Congo yananiwe kwemeza amahanga aho bigaragaza ko aho yacururije ikinyoma bitari gufata.

Ati “Uko iminsi ishira amahanga aragenda abona ubufatanye bwa FARDC, FDLR, Nyatura na Mai Mai. Raporo ziragenda zerekana ko iriya mitwe yica abaturage, igatwika, igafata ku ngufu abaturage n’andi mabi”.

Ku bijyanye n’igisirikare, bimaze kugaragara ko FARDC itazatsinda M23 kuko inayitsinda yifatanyije n’abandi. Kuri dipolomasi, RDC yataye ibaba kubona yita M23 umutwe w’iterabwoba kandi bakakirwa n’umunyacyubahiro nka Uhuru Kenyatta nk’umuhuza.

Niba Kenyatta yarakiriye Bisimwa na bagenzi be, birashoboka ko n’i Luanda batumizwa na Lorenco, ibyo bigatuma babona amahirwe yo gusobanura impamvu ituma barwana, bakerekana ko Leta ya Congo yishe amasezerano yose ndetse n’ibyo irimo gukora.

Kuba u Rwanda rwakomojweho, nta kidasanzwe kirimo kuko Tshisekedi yakomeje kwegeka ibibazo bya Congo byose ku Rwanda nk’aho rugomba kubazwa ruswa yamunze igihugu, kunyereza umutungo mu nzego zose, serivisi mbi, ubuke bw’ibikorwaremezo, umutekano muke n’ibindi.

Ibyo Congo yakoze ni ugusaza imigeri. Iri tangazo rikaba rituma Tshisekedi yiha amenyo y’abasetsi.

Tshisekedi akomeje kubura ayo acira n'ayo amira

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .