Centrafrique: MINUSCA yamaganye ibitero imitwe yitwaje intwaro yagabye muri Damara na Bangassou

Yanditswe na Iradukunda Serge
Kuya 3 Mutarama 2021 saa 09:15
Yasuwe :
0 0

Ingabo z’Umuryango w’Abibumbye ziri mu butumwa bwo kubungabunga amahoro muri Centrafrique (MINUSCA) zamaganye ibitero imitwe yitwaje intwaro yagabye mu Mijyi ya Damara na Bangassou ku wa Gatandatu no kuri iki Cyumweru.

Ahagana saa Kumi z’igitondo zo ku wa Gatandatu, mu Majyaruguru y’Umurwa Mukuru, Bangui habereye igitero cyagabwe n’Umutwe w’abarwanyi begamiye kuri François Bozizé wahoze ari perezida mu gace ka Damara kari mu bilometero 76 uvuye i Bangui. Uyu mujyi ni nawo Perezida Faustin-Archange Touadéra avukamo.

Abasirikare ba Centrafrique [FACA] bahise batsinsura abo barwanyi ndetse ingabo za Loni nyinshi zoherezwa muri ako gace n’utugakikije gukaza uburinzi. Muri iki gitero haguye abarwanyi umunani.

Igitero cy’imitwe yitwaje intwaro nk’iki kuri iki Cyumweru kandi cyagabwe mu Mujyi wa Bangassou, aho abarwanyi bateye ikigo cya gisirikare cya FACA.

Mu kanya nk’ako guhumbya, Ingabo za MINUSCA zahise zitabara ngo zirinde abasivili no gukora amarondo yo gukaza umutekano.

Izi ngabo zakijije umwanzi abasirikare babiri ba FACA bakomeretse mu gihe uko kurasana kwaguyemo abarwanyi batanu.

Ibi bitero byose byakomwe mu nkokora n’Ingabo za Centrafrique zifatanyije n’iziri mu butumwa bwa MINUSCA ndetse n’izoherejwe muri iki gihugu zirimo n’Umutwe w’abasirikare bihariye b’u Rwanda.

Mu itangazo MINUSCA yashyize hanze kuri uyu wa 3 Mutarama 2021 yavuze ko “Yamagana bikomeye ibitero byagabwe n’imitwe yitwaje intwaro mu Mujyi wa Damara (uri muri Perefegitura ya Ombella-M’Poko) n’uwa Bangassou.’’

MINUSCA yashyize mu majwi UPC, MPC, 3R, FPRC, Anti-Balakas na François Bozizé nk’abagize uruhare mu bitero n’ingaruka byagize ku baturage.

Ibi bitero byabaye bikurikira imvururu zakunze kurangwa mu Burengerazuba, zatumye benshi bava mu byabo ndetse abakeneye inkunga baratambamirwa, ntiyabageraho.

Intumwa yihariye y’Umunyamabanga wa Loni akaba n’Umuyobozi wa MINUSCA, Mankeur Ndiaye, yavuze ko ‘ibi bitero bigamije kwihimura kubera umugambi w’iyi mitwe wo guhungabanya imigendekere myiza y’amatora wakomwe mu nkokora n’ingabo ziri muri Centrafrique’.

Yijeje ko MINUSCA izakomeza guhagarara ku nshingano zo kurinda abasivili n’abayobozi.

Nubwo nta mibare iratangazwa y’abaguye muri ibi bitero umunyamakuru wa IGIHE uri muri Centrafrique amakuru yabashije kubona avuga ko abagize iyi mitwe 30 bahise bapfa mu gihe abasirikare babiri ba Centrafrique nabo babiguyemo.

MINUSCA yamaganye ibitero imitwe y'itwaje intwaro yagabye muri Damara na Bangassou muri Centrafrique

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .