Abarwanyi b’ umutwe w’Intagondwa za Kiyisiramu wo muri Nigeria, Boko Haram bagabye igitero ku birindiro by’ingabo za Cameroun biri ahitwa i Kolofota ku wa kabiri abarenga 200 muri bo bahasiga ubuzima.

Minisitiri w’Itumanaho wa Cameroun Issa Tchiroma, yatangaje ko abarwanyi ba Boko Haram bari hagati ya 200 na 300 bishwe ariko hagapfa n’umusirikare umwe wa Cameroun abandi bane bagakomereka.

Abasirikare ba Cameroon

Yongeyeho ko abasirikare ba Cameroun bafashe intwaro za rutura, misile ndetse n’imbunda za Boko Haram.

Umwe mu batuye mu gace ka Kolofata yagize ati “hari mu ma saa 6:44 ubwo numvaga urusaku rw’amasasu ndyamye. Nafashe telefone mpamagara abandi, bose bambwira ko Boko Haram yateye ibirindiro bya gisirikare; bacakiranye n’ingabo ubwo bageragezaga kwinjira mu mujyi.”

Icyo gitero cyagabwe nyuma y’uko umukuru wa Boko Haram, Abubakar Shekau, abinyujije mu mashusho yagaragaye ku rubuga rwa Youtube, yaburiye Perezida wa Cameroun, Paul Biya ko igihugu ayoboye kigiye kwibasirwa n’ibitero.