Umuryango w’Africa y’Uburasirazuba niwo wari watangaje ko ugize Perezida Museveni umuhuza mu biganiro hagati ya Nkurunziza n’abadashaka ko yiyamamariza Manda ya gatatu nka Perezida w’Uburundi.

Ibi bihugu kandi byari byasabye ko amatora ateganyijwe tariki ya 15 Nyakanga 2015 yakwigizwayo ibyumweru bibiri kugirango Museveni abone umwanya wo kwiga kuri iki kibazo neza.

Frederic Bamvuginyumvira, umuyobozi wungirije w’ishyaka riharanira Demukarasi (Front for Democracy in Burundi) avuga ko Museveni nta cyizere atanga ku nshingano yahawe, kuko na we ubwe amaze imyaka myinshi ku butegetsi.

Ati “Museveni yagiye ku butegetsi mu mwaka wa 1986, yakumvisha Perezida gute ko kurekura ubutegetsi ari byiza?”

Bamvuginyumvira avuga ko kwambura abantu intwaro na byo bizafata igihe kirenga ibyumweru bibiri, ati “Bizafata imyaka n’imyaka kubambura intwaro, murumva bazazishyira hasi mu buryo bworoshye?”

Iyi ibaye inshuro ya kabiri amashyaka atavuga rumwe na Leta yanga umuhuza kuko ubwa mbere banze Said Djennit agasimbuzwa Bathily nawe wanzwe na Leta.

Ikindi abatavuga rumwe na Leta badashaka ni uko amatora yazaba ku italiki ya 30 Nyakanga ahubwo bagashaka ko aba ku italiki yari yaragenwe mbere ariyo 15, Nyakanga uyu mwaka.

[email protected]