Burundi: Abandi bantu 11 banduye Coronavirus

Yanditswe na Twarabanye Venuste
Kuya 11 Kamena 2020 saa 10:32
Yasuwe :
0 0

Guverinoma y’u Burundi yatangaje ko hagaragaye abantu 11 banduye Coronavirus, isaba Abarundi kugira ituze bagakurikiza amabwiriza yo kwirinda.

Hagati y’itariki ya 8 n’iya 10 Kamena 2020 nibwo Guverinoma y’u Burundi yakoze igenzura ryo kureba niba abantu 37 bari barwaye Coronavirus barayikize. Hanasuzumwa ibipimo by’abantu batandatu batabarijwe n’ibitaro bya Kira na Bumerek n’abantu 42 bahuye na bo.

Itangazo ryashyizwe hanze na Minisiteri y’Ubuzima muri icyo gihugu rivuga ko abarwayi 16 muri 37 bari basanzwe barwaye bakize ndetse basubiye mu miryango yabo, abandi 21 bari kwitabwaho kandi ubuzima bwabo bumeze neza.

Cyakora mu batabarijwe n’ibitaro bane baranduye naho muri 42 bahuye na bo hasangwamo barindwi banduye bose hamwe bagera kuri 11.

Itangazo rivuga ko ibikorwa byo gutahura abahuye n’abo barwayi bikomeje. Minisiteri y’Ubuzima yahamagariye Abarundi kugira ituze ariko bakubahiriza amabwiriza yo kwirinda COVID-19.

Ku wa Gatatu w’iki cyumweru nibwo umugore wa Pierre Nkurunziza, Denise Bucumi Nkurunziza na we byavuzwe ko arwaye Coronavirus, yasubiye mu gihugu cye avuye aho yari arwariye i Nairobi muri Kenya ariko nta makuru aratangazwa ku buzima bwe.

Umurwayi wa mbere wa Coronavirus byemejwe ko yagaragaye mu Burundi ku wa 31 Werurwe 2020. Muri rusange abantu 94 bamaze kwandura Coronavirus mu Burundi, umwe yaramuhitanye naho 45 bamaze kuyikira.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .