00:00:00 IGIHE NETWORK KN KINYARWANDA EN ENGLISH FR FRANCAIS

AIMS mu bufatanye bugamije kuzamura ubumenyi bw’Abanyafurika mu by’ikoranabuhanga

Yanditswe na Mugisha Christian
Kuya 15 June 2022 saa 01:39
Yasuwe :

Hatangijwe ubufatanye hagati y’Ikigo Nyafurika gishinzwe guteza imbere Ubumenyi bushingiye ku Mibare (AIMS-NEI) n’Ikigo cyo mu Budage gitanga ibizamini n’impamyabumenyi mu masomo atandukanye, Software Quality Institute (iSQI GmbH), bugamije guhugura urubyiruko rwo muri Afurika mu masomo atandukanye.

Binyuze muri ubu bufatanye, urubyiruko rutandukanye rwo ku Mugabane wa Afurika ruzahugurwa mu bijyanye n’ikoranabuhanga ndetse runahabwe impamyabumenyi zemewe ku rwego mpuzamahanga.

Ni icyemezo cyafashwe nyuma yo kubona ko mu 2030, imirimo igera kuri miliyoni 230 izaboneka icyo gihe izajya isaba kuba nibura umuntu afite ubumenyi mu bijyanye n’ikoranabuhanga.

Biteganyijwe ko muri iyi gahunda yiswe ‘4Africa Digital Skills’ hazibandwa ku guhugura abanyeshuri n’abarimu bo mu bigo bya AIMS-NEI mu Rwanda, Ghana, Cameroon, Senegal na Afurika y’Epfo.

Iyi gahunda igamije kuziba icyuho kikigaragara muri Afurika mu bijyanye n’ubumenyi abantu bafite mu gukoresha ikoranabuhanga.

Umuyobozi Mukuru wa iSQI, Stephan Goericke, yavuze ko ku bufatanye n’abandi bafatanyabikorwa bazageza urubyiruko rwo ku Mugabane wa Afurika kuri byinshi .

Yagize ati “Hamwe na AIMS NEI intego ni uguha ubumenyi bwihariye mu by’ikoranabuhanga abakunzi baryo haba mu Rwanda no muri Afurika muri rusange, kandi twizeye ko bizateza imbere umuco wo guhanga udushya, guhanga imirimo ndetse n’abakozi.”

Binyuze muri ubu bufatanye, iSQI izajya itanga ibizamini ku bigo byose bya AIMS-NEI n’amashami yayo.

Umuyobozi Mukuru wa AIMS-NEI, Lydie Hakizimana, yavuze ko ikoranabuhanga ari urufunguzo rw’inzira nshya yo kuzamura ubukungu mu buryo bwihuse.

Yagize ati “Rifasha guhanga udushya, guhanga imirimo no koroshya serivisi zimwe. Afurika ifite amahirwe yihariye yo gukoresha ikoranabuhanga mu iterambere no guhanga udushya.”

Yavuze ko ubu bufatanye bwa AIMS na iSQI buzaba igikoresho cyo kubaka ejo hazaza heza h’Umugabane wa Afurika.

Lydie Hakizimana yakomeje agira ati “Twishimiye ko tugiye kugira uruhare mu guha urubyiruko rwa Afurika ubumenyi bw’ikoranabuhanga bukenewe buzabafasha kuzaba abahanga udushya mu myaka izaza, babe ba rwiyemezamirimo ndetse n’abayobozi mu bukungu bw’Isi.”

Ikigo International Software Quality Institute (iSQI GmbH) kiza ku isonga mu gutanga ibizamini n’impamyabumenyi mpuzamahanga ku Isi, gifite icyicaro mu Budage n’amashami hirya no hino.

AIMS NEI igiye gukorana na iSQI mu guteza imbere ubumenyi mu by'ikoranabuhanga ku Mugabane wa Afurika
Abayobozi ba AIMS NEI na iSQI bashishikajwe n'iterambere ry'ikoranabuhanga mu rubyiruko rwa Afurika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .