Afurika y’Epfo: Abagore bahatiwe kwifungisha burundu

Yanditswe na Twarabanye Venuste
Kuya 25 Gashyantare 2020 saa 11:47
Yasuwe :
0 0

Muri Afurika y’Epfo byahishuwe ko hari abagore bafite Virusi itera Sida bagiye bafatiranwa bari ku nda bagasabwa gusinya urupapuro rwemeza ko bifungishije kubyara burundu ku bushake kandi nyamara bikozwe ku gahato batagishijwe inama.

Ubwo yashyiraga ahagaragara ubushakashatsi yakoze kuri icyo kibazo, Komisiyo y’Uburinganire muri Afurika y’Epfo yatangaje ko ibitaro bya leta byangije agaciro k’umugore bafungwa urubyaro ku ngufu mu buryo bwa kinyamanswa n’iyicarubozo.

Iyo komisiyo yabitangaje nyuma y’ubushakashatsi bw’imyaka itanu ku bibazo 48 yagejejweho n’imiryango ibiri itari iya leta iharanira uburenganzira bwa muntu.

Bwagaragaje ko hari abaganga b’ibitaro bimwe na bimwe bafataga abagore bagiye kubagwa igihe bakiri mu buribwe, bakabategeka kwemera kwifungisha burundu bababwira ko nibatabyemera batazababyaza. Abo baganga ngo bababwiraga ko abafite Virusi itera Sida batagomba kubyara kandi ko bashobora gupfa bashatse kubyara undi mwana.

Raporo y’ubushakashatsi igira iti “Hari aho abagore bari ku bise bahabwaga urupapuro buzuza bakababwira ko batababyaza kugeza barusinye.”

Iyo komisiyo yavuze ko byagoranye kurangiza ubwo bushakashatsi kubera ko izo nyandiko abo babyeyi buzuzaga zaburiwe irengero.

Umuyobozi w’iyo komisiyo, Tamara Mathebula, yagize ati “Ntabwo tuzi uburyo iki kibazo cyakwirakwiye muri Afurika y’Epfo ariko twizeye ko iperereza ryacu rizafungura ikurikiranwa ry’ibyo bibazo bitaramenyekana mu buryo bwuzuye.”

Minisitiri w’Ubuzima muri Afurika y’Epfo, Zwelini Mkhize, yahise asaba Mathebula kugirana inama yihuse yo kuganira kuri iyo raporo.

Ubwo bushakashatsi ntabwo bugaragaza impamvu abaganga biyemeje kunyuranya n’amahame abagenga bakiyemeza gufunga abagore urubyaro ku ngufu.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .