Ako gahenge kagombaga gutangira kubahirizwa ku wa 4 Kanama 2024, kemerejwe mu nama yahuje aba Minisitiri b’ububanyi ba Repubulika Iharanira Demokarasi ya Congo n’u Rwanda ku buhuza bwa Angola.

Inama y’Igihugu y’Abepisikopi ya Congo mu itangazo bashyize hanze rigenewe Abanyamakuru, bavuze ko bashimira ibihugu byombi ku ntambwe ntoya bateye ku kuzahura umubano, no gushakira amahoro u Burasirazuba bwa RDC.

Bagize bati “Turashima intambwe ntoya ibi bihugu byateye yo gusaba agahenge ku mpande zihanganye mu Burasirazuba bwa Repubulika ya Congo, ariko si ubwa mbere ibi bibaye ariko byagiye biherera mu mpapuro gusa. Turasaba ko kuri iyi nshuro byakubahirizwa.”

Bakomeje basaba ubufatanye ku miryango mpuzamahanga kugira ngo igire uruhare mu gutuma ako gahenge kubahirizwa.

Aba bepisikopi bagaraje ko intambara yo mu Burasirazuba bwa Congo itigeze ihabwa agaciro kimwe nk’intambara yo muri Ukraine n’izindi zihangayikishije Isi, nyamara ikaba igira ingaruka ku baturage benshi.

Gusa bavuga ko aka gahenge karamutse kubahirijwe byaba intandaro yo gutuma mu Burasirazuba bwa Congo, hashobora kugaruka amahoro abaturage bakongera kubaho batuje.

Abasenyeri Gatolika muri RDC basabye ko agahenge kasabwe gakwiriye kubahiriza