Abantu 98% by’abahabwa ubutabazi bwihuse n’imbangukiragutabara ntibishyura

Yanditswe na Evariste Nsengimana
Kuya 16 Mutarama 2020 saa 07:50
Yasuwe :
0 0

Ishami rya Minisiteri y’Ubuzima rishinzwe kwita ku ndembe (SAMU), ryatangaje ko umubare munini w’abantu bahabwa ubutabazi bwihuse usanga nta bwishingizi bafite, byagera igihe cyo kwishyura ibyabatanzweho bavuzwa, bigatangwa n’abatarenga 2%.

Imyaka 11 irashize Guverinoma y’u Rwanda itangije ubutabazi bwihuse ku barembeye hanze y’ibitaro bafashwa n’abaganga bo muri serivisi z’Imbangukiragutabara rizwi nka SAMU.

Iri shami rikorera cyane cyane mu Mujyi wa Kigali no mu nkengero zayo, ariko no mu bindi bice by’igihugu rigakorana n’ibitaro bihakorera, rigaragaza ko umubare munini w’abantu ritabara ari ababa batabarijwe hifashishijwe umurongo w’ubuntu washyizweho wa 912.

Muri abo bantu bahabwa ubutabazi bwihuse akenshi 60% ni ababa bakomeretse bikabije aho abagiriye impanuka mu muhanda baba bari hagati ya 80-90%.

Uretse abo 60% baba bakomeretse hari n’abandi bangana 20% baba bafashwe bitunguranye n’indwara zo mu mubiri nka Diabète, umuvuduko w’amaraso n’izindi zikenera ubutabazi bwihuse.

Samu igaragaza ko abasigaye hagati ya 10-15% baba ari abagore bari kunda, bitegura kubyara mu gihe abasigaye bari munsi ya 4% baba ari abana bagize uburwayi butandukanye.

Umuyobozi wa SAMU, Dr Dushime Théophile, yabwiye IGIHE ko iyo imbangukiragurabara igeze ku murwayi icyihutirwa ari ugutabara umuntu urembye, ibyo kumwishyuza bikorwa nyuma ubuzima bwe bwarengewe.

Ati “Ntitubanza kuvuga ngo banza wishyure, iby’ubwishingizi biza nyuma wabanje kumenya ko ubuzima bwe butari mu kaga, nyuma nibwo tureba ngo runaka ari mu bwisungane mu kwivuza cyangwa afite ubundi bwishingizi. Abadafite rero ubwishingizi babarizwamo bagera kuri 50-55%.”

Mu bo iri shami rifasha usanga 40% bafite ubwisungane mu kwivuza buzwi nka mituelle de santé, 5% bakoresha ubwishingizi bw’ikigo cy’ubwiteganyirize bw’abakozi ‘RSSB’ naho ubundi busigaye bukaba munsi ya 5%.

Ni ikibazo gikomereye iri shami kuko akenshi aba bantu uretse kugezwa kwa muganga, banishyurirwa ibikoresho byose n’imiti byifashishwa mu kumuvura ariko bamara gukira hakishyura mbarwa.

Ati “Umuntu nk’uwo udafite ubwishingizi aba bagomba kwiyishyurira byose mu gihe abaye afite nka mituelle yari kwishyura 10%.Tuba dufite imibare y’ibyamutanzweho agomba kwishyura ariko abakira bakaza kwishyura ni bacye cyane, bari hagati ya 2-3%.”

Ibyo bisobanuye ko abandi bari hejuru ya 97% bahawe ubutabazi bwihuse batashyura ibyo batanzweho.

Dr Dushime asaba abantu kwitwaza ubwishingizi bw’ubuzima ahantu bagiye kugira ngo byorohe kubavuza, gutanga amakuru nyayo y’ahabereye impanuka, no guhamagara 912 mu gihe koko bakeneye ubutabazi kuko byagaragaye ko hari abahamagara nta kibazo kihabaye.

SAMU igaragaza ko mu Ukuboza 2019 hatanzwe ubutabazi bw’ibanze ku bantu 597 batangwaho miliyoni zirenga 12.8 Frw ariko hishyuwe gusa ibihumbi 180 Frw.

Imibare y’Ishami ry’Umuryango w’Abibumbye ryita ku Buzima ku Isi (WHO) igaragaza ko imbangukiragutabara imwe yita ku bantu ibihumbi 200 mu mijyi n’ibihumbi 300 mu cyaro.

Umuyobozi wa SAMU, Dr Dushime Théophile yatangaje ko iyo imbangukiragurabara igeze ku murwayi icyihutirwa ari ugutabara umuntu urembye

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza