Umwanditsi w’Urukiko Mpuzamahanga Mpanabyaha, John Hocking, kuwa Kabiri, tariki ya 4 Nzeri 2012, yongeye gutangaza ko icyemezo cya nyuma cy’ahazoherezwa burundu ububiko bw’impapuro z’imanza z’Urukiko Mpuzamahanga Mpanabyaha rwashyiriweho u Rwanda TPIR (Tribunal Pénal International pour le Rwanda) kizafatwa n’Akanama gashinzwe amahoro ka Loni.

Amakuru dukesha Ibiro Ntaramakuru “ Hirondelle” avuga ko mu ntangiriro z’ukwezi kwa Nyakanga 2012, Martin Ngoga Umushinjacyaha Mukuru w’u Rwanda yari yatangarije ibi biro ko u Rwanda rwiteguye guhagurukira icyo kibazo cy’aho ubwo bubiko bw’impapuro buzoherezwa burundu, ruvuga ko ari uburenganzira karemano bwarwo bwo kubutunga.

Ku bijyanye n’ibihano byatanzwe, John Hoking avuga ko abagororwa 19 b’Abanyarwanda ubu bafungiwe mu gihugu cya Mali babayeho mu mutekano n’ubwo bwose havugwa imvururu muri icyo gihugu, Loni ifite inshingano zo kurinda umutekano wabo nk’uko bikwiye.

Abagororwa b’Abanyarwanda bafungiwe mu Murwa Mukuru wa Mali ariwo Bamako, mu gihe inyeshyamba zirwanya Leta ziri mu majyaruguru y’icyo gihugu. Abandi bagororwa 14 bafungiwe muri Bénin.