Amashusho yafatiwe muri Mwenga agaragaza abaganga ba MSF bahetse imizigo kuri moto nyinshi, bambaye ‘gillets’ ziriho ibirango by’uyu muryango, bazengurutswe na Wazalendo bambaye impuzankano igisirikare cya RDC cyakoreshaga, bafite intwaro zirimo Machine Gun.

Wazalendo bumvikana bavuga Igiswahili basakuza, bagaragara mu mashusho basubiza inyuma abaganga ba MSF, bisa n’aho igikorwa cyari cyabajyanye kitakunze umunsi bahagarikwa.

Kuri uyu wa 5 Gicurasi 2026, ishami rya MSF muri RDC ryatangaje ko byabaye tariki ya 1 Gicurasi ubwo itsinda ry’abaganga bakorera muri uyu muryango bajyaga muri santere ya Mwenga, Kamituga na Kitutu gusuzuma uko ikibazo cy’ubutabazi gihagaze.

MSF yatangaje ko nubwo abaganga bayo basagariwe, ubu bameze neza kandi ko bakomeje ibikorwa by’ubutabazi muri Mwenga, bafatanyije n’ubuyobozi bwaho.

Uyu muryango waciye amarenga ko nyuma y’ibigaragara mu mashusho, abaganga bawo bashobora kuba baremerewe gukomeza urugendo, bakomereza muri santere ya Mwenga.

Wagize uti "Turi kuvugana n’abo bireba kugira ngo tumenye neza uko iki kibazo cyavutse no kugira ngo habeho ituze n’umutekano by’abantu bacu kandi banagaruke amahoro."

MSF yatangaje ko ari umuryango wigenga kandi utagira uruhande ubogamiraho, ufite inshingano y’ibanze yo guha ubuvuzi bwihuse abagizweho ingaruka n’intambara, ibyorezo, ibiza n’ababuze amahirwe y’ubuvuzi.

Uyu muryango watangaje ko uzakomeza gufasha abakeneye ubuvuzi muri Kivu y’Amajyepfo n’ahandi muri RDC kandi ko utazigera ubogamira ku ruhande urwo ari rwo rwose.

MSF yatangaje ko iri mu biganiro n'abo bireba kugira ngo isobanukirwe ibyabaye ku baganga bayo

Amashusho yagaragaje Wazalendo basubiza inyuma abaganga ba MSF