RDC: Inyeshyamba za ADF zishe abaturage 54 bo mu Ntara ya Ituri

Yanditswe na Habimana James
Kuya 28 Gicurasi 2020 saa 04:06
Yasuwe :
0 0

Ingabo za Repubulika Iharanira Demokarasi ya Congo, zatangaje ko inyeshyamba z’umutwe wa ADF urwanya ubutegetsi bwa Uganda, zishe abaturage 54 mu Ntara ya Ituri.

Aba barwanyi bagabye ibitero mu gace ka Samboko, gaherereye mu bilometero 100 uvuye mu Mujyi wa Bunia.

Umutwe wa ADF urwanya ubutegetsi bwa Perezida wa Uganda, Yoweri Museveni, umaze igihe mu Burasirazuba bwa Congo kuva mu 1995 aho ushinjwa gukora ibikorwa by’ubwicanyi.

Al Jazeera itangaza ko aba barwanyi bishe abaturage bakoresheje imihoro basahura n’imitungo yabo.

Umuyobozi w’Umuryango utegamiye kuri leta muri aka gace, Gili Gotabo, yavuze ko “Kugeza ubu ahabereye ubu bwicanyi, abaturage bahunze kuko bafite ubwoba ko izi nyeshyamba zishobora kongera zikabagabaho ibitero.”

Imiryango itegamiye kuri leta muri Ituri itangaza ko izi nyeshyamba zimaze kwica abaturage barenga 400 guhera mu mwaka ushize, abandi bavanwa mu byabo.

Umuvugizi w’Ingabo muri Ituri, Jules Ngongo, yavuze ko ingabo za leta zoherejwe muri ako gace, aboneraho kwizeza abaturage ko umutekano uri bugaruke.

Amakuru avuga ko kuva mu mezi abiri ashize, abantu barenga ibihumbi 200 bamaze kuvanwa mu byabo muri Ituri kubera ibi bitero bya ADF.

Umuryango w’Abimbuye uvuga ko kuva mu 2017 abantu barenga 700 bamaze kwicirwa muri Ituri, ukaba kandi utangaza ko ibyaha bihakorerwa bifatwa nk’ibyaha byibasira inyokomuntu.

Mu kwezi gushize abandi bantu 22 bo mu gace ka Hema barishwe, inyeshyamba zo mu mutwe w’aba Lendu ukaba ariwo ushinjwa kubica.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .