00:00:00 IGIHE NETWORK KN KINYARWANDA EN ENGLISH FR FRANCAIS

Tariki ya 5 Kamena

Yanditswe na
Kuya 5 June 2022 saa 07:00
Yasuwe :

Tariki ya 5 Kamena buri mwaka, ni Umunsi Mpuzamahanga wo Kubungabunga Ibidukikije.

Bimwe mu byibukwa ku wa 5 Kamena:

1305: I Pérouse, Bertrand de Got yatorewe kuba Papa ku izina Clément V. Ni we wimuriye icyicaro gitagatifu i Avignon, hari ku wa 9 Werurwe 1309.

1409: Papa Grégoire XII yaregujwe.

1849: Danemark yatoye Itegeko Nshinga rigena Ingoma ya Cyami igomba kubayobora.

1862: U Bufaransa bwigaruriye Cochinchine.

1876: Ni bwo Sayyid Bargash, Sultan w’i Zanzibar yafunze iguriro ry’abacakara bakurwaga mu Karere ka Afurika y’Iburasirazuba, ariko cyane muri Tanzania. Aho iri guriro ryahoze, haje kubakwa Kiliziya nini y’Abangilikani.

1926: Robert Earl Hugues ni we wagaragaye nk’uwari ufite ibilo byinshi ku Isi. Ubwo yapimwaga uyu munsi, yasanganywe ibilo 486.

1947: General George Marshall w’Umunyamerika, yashyizeho gahunda yo gufasha u Burayi kongera kwisana no kwiyubaka nyuma y’Intambara ya Kabiri y’Isi. Iyi gahunda yahise imwitirirwa ‘‘Plan Marshall.’’

1967: Hatangiye intambara yiswe iy’Iminsi itandatu, hagati ya Israel n’ibihugu by’Abarabu. Abarwanyi b’impande zose bavuniye ibiti mu matwi, banga kwitabira umuhamagaro w’Umuryango w’Abibumbye wasabaga ko habaho agahenge, hagashakirwa umuti w’ibibazo mu mishyikirano.

Iyi ntambara yiswe iy’iminsi itandatu kuko Israel itashakaga gukandagira Umunsi w’Isabato (wa karindwi) bakiri ku rugamba. Umwe mu bakiriho bayirwanye ni General Ariel Sharon, wabaye Ministiri w’Intebe wa Israel . Amaze imyaka ine n’igice muri koma, ntiyumva ntabona, cyakora ngo aracyahumeka.

1975: Canal de Suez, yari yarafunzwe mu Gihe cy’Intambara y’iminsi itandatu (yavuzwe hejuru), yongeye gufungurwa bundi bushya.

1989: Icuruzwa ry’amahembe y’inzovu ryahagaritswe henshi ku Mugabane w’u Burayi, hagamijwe kubungabunga umutekano w’inzovu. Kuva uwo munsi ariko amahembe y’inzovu yarushijeho gushakishwa, kuko igiciro cyayo cyahise kizamuka cyane.

1995: Ni bwo imikino y’Igikombe cy’Isi cy’abagore ku nshuro ya gatatu, yatangijwe. Iyi mikino yabereye muri Suède.

2000: Ubudahangarwa bwa General Pinochet wigeze kuyobora Chile, bwakuweho n’Urukiko rw’Ubujurire rwa Santiago.

2010: Bwa mbere mu mateka y’u Rwanda, Umunsi mpuzamahanga wo kubungabunga Ibidukikije ku rwego rw’Isi, wizihirijwe mu Rwanda, uhurirana na gahunda yo kwita izina ingagi zari zimaze iminsi zivutse.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .