00:00:00 IGIHE NETWORK KN KINYARWANDA EN ENGLISH FR FRANCAIS

Uko ihanurwa ry’indege ya Habyarimana ryateye Kagame igishyika cyo kugenda mu ya Gen Dallaire

Yanditswe na Musangwa Arthur
Kuya 2 June 2022 saa 12:39
Yasuwe :

Mu mugoroba w’itariki 6 Mata 1994, ni bwo indege y’uwari Perezida w’u Rwanda, Habyarimana Juvénal wari kumwe n’abantu 11 bavanye mu rugendo i Dar es Salaam muri Tanzania yahanuwe, bikurikirwa n’ishyirwa mu bikorwa ry’umugambi wa Jenoside yakorewe Abatutsi wari umaze igihe utegurwa.

Kugeza ubu ihanurwa ry’iyi ndege riracyateza urujijo ahanini biturutse no ku kuba ibimenyetso byose byashoboraga gutuma haboneka umucyo byagiye biburirwa irengero mu buryo budasobanutse, by’umwihariko agasanduku k’umukara [black box cyangwa boîte noire] kazwiho kubika amakuru y’ingenzi y’ibibera mu ndege.

Indege ya Habyarimana yahanuwe mu gihe Leta y’u Rwanda yari imaze igihe iri mu mishyikirano n’Ingabo zahoze ari iza RPA ndetse zaramaze no kohereza muri CND abasirikare 600 bari bacungiye umutekano abanyepolitike ba FPR bagombaga kujya muri Guverinoma ihuriweho.

Nyuma y’ihanurwa ry’iyi ndege, kuwa 7 Mata 1994 Abatutsi batangiye kwicwa hirya no hino cyane cyane mu Mujyi wa Kigali, ibi byatumye RPA ihagarika imishyikirano ahubwo itangira urugamba rwo guhagarika Jenoside.

Mu gitabo ‘The Conversation with President Kagame’, Perezida Paul Kagame wari uyoboye ingabo za RPA icyo gihe yavuze ko yamenye amakuru y’urupfu rwa Habyarimana amusanze ku Mulindi aho yari arimo areba imikino y’Igikombe cya Afurika.

Ati “Twarebaga umukino w’umupira w’amaguru, twarebaga umukino ugeze hagati umwe mu bo twakoranaga araza ambwira ko hari amakuru amfitiye avuye mu ngabo zacu.”

Perezida Kagame yakomeje avuga ko akimara kumenya ayo makuru yumvise ko hari ikibazo gikomeye kigiye kuvuka.

Ati “Icyanje mu bitekerezo ni uko icyo cyari ikimenyetso cy’ibibazo, ndetse ko iryo hanurwa ry’indege rishobora kubyara ikintu cyashoboraga kutugiraho ingaruka z’ako kanya.”

Yakomeje avuga ko nubwo ubutasi bwa RPA bwari bumaze igihe bubona amakuru ko hari gutegurwa Jenoside, icyo gihe atahise atekereza ko ari yo igiye gukurikiraho.

Kagame yavuze ko mu minsi mike yakurikiyeho batangiye kwakira amakuru ko Abatutsi batangiye guhigwa no kwicwa, ari nacyo cyatumye Ingabo 600 zari muri CND zihabwa itegeko ryo gutangira gutabara no guhagarika Jenoside.

Yanze kujya muri Kajugujugu ya Gen Dallaire

Nyuma y’umunsi umwe Jenoside itangiye, kuwa 8 Mata 1994 Gen Roméo Dallaire wari ukuriye ingabo z’Umuryango w’Abibumbye zari mu butumwa mu Rwanda (UNAMIR) yafashe kajugujugu ajya ku Mulindi kugira ngo agirane ibiganiro na Maj. Paul Kagame wari uyoboye urugamba rwo kubohora igihugu.

Kagame yavuze ko icyo gihe Dallaire yamusabye ko bajyana i Kigali kugira ngo agirane ibiganiro n’ubutegetsi bwari bwatangiye gushyira mu bikorwa Jenoside.

Ati “Roméo Dallaire yaje kundeba ahagana ku itariki 8 Mata. Yansabye kunjyana i Kigali kugira ngo ngirane ibiganiro n’urundi ruhande. Yari yazanye kajugujugu, namubwiye ko kugenda muri kajugujugu ari ugushyira ubuzima bwe mu kaga, kuko yashoboraga kuraswa byoroshye, mu kunsubiza ambwira ko ntakwiye guhangayika kuko yazanye kajugujugu ebyiri.”

Kagame yakomeje avuga ko bitari gukunda ko ajyana na Dallaire mu ndege nyuma y’ibyari bimaze kuba ku ya Habyarimana. Ati “Nta hantu nari kujyana nawe, bari bahanuye indege ya Habyarimana, kuki kajugujugu y’Umuryango w’Abibumbye yo itari guhanurwa.”

Iki gihe Perezida Kagame yabwiye Dallaire ko niba ari kuganira n’ubuyobozi bw’u Rwanda bukaba bwemera guhagarika ubwicanyi no gusubiza ibintu mu buryo nawe yamwitegaho ko azasaba ingabo za RPA gusubira inyuma.

Kagame ngo yamubajije umuntu uri kuyobora igihugu n’uwari inyuma y’ibiri gukorwa, Dallaire mu kumusubiza amubwira ko nawe ibintu byamurenze atabifiteho ububasha.

Perezida Kagame yavuze ko RPA itigeze igambirira gukuraho Habyarimana, ahubwo ko yashakaga guhindura uburyo igihugu cyari kiyobowe mu buryo rusange.

Ati “Ntabwo twari tugambiriye gukuraho Habyarimana nk’umuntu ku giti cye. Twashakaga gukuraho ubuyobozi bwarimo na Habyarimana ariko ntabwo twigeze twumva ko kwibanda ku muntu umwe ari ingenzi mu gukuraho ubuyobozi. Nta kintu na kimwe yaba mu bikorwa, ibitekerezo ndetse n’ibyavuzwe kigaragaza ko Habyarimana ariwe twari twibanzeho, twari dutumbereye uburyo bw’imiyoborere bwose.”

Raporo ya Komisiyo Duclert yashyizweho na Perezida Emmanuel Macron, iherutse kugaragaza ko indege ya Habyarimana ikimara guhanurwa, hari umusirikare w’Umufaransa woherejwe aho yaguye ngo akore iperereza ku cyatumye ihanuka.

Raporo ivuga ko kuwa 6 Mata 1994 saa tatu n’igice z’ijoro, Colonel Jean Jacques Maurin wari umujyanama w’Umugaba Mukuru w’Ingabo z’u Rwanda yahawe amabwiriza aturutse i Paris yo gukora iperereza ku cyateye impanuka.

Raporo ivuga ko umusirikare wa mbere wageze aho indege yaguye, nta nyandiko zigaragaza ibyo yahabonye.

Mu 1998, u Bufaransa bwashyizeho Komisiyo y’Abadepite yo kwiga ku ruhare rw’icyo gihugu muri Jenoside yakorewe Abatutsi. Mu bahamagajwe n’abadepite, harimo n’uwo musirikare wageze bwa mbere aho indege yaguye.

Uwo musirikare yavuze ko yagiye aho indege ya Habyarimana yaguye agiye gushaka agasanduku k’umukara akaza kubivamo ubwo Lieutenant-Colonel Maurin yamubwiraga ko iyo ndege nta gasanduku yagiraga. Raporo ivuga ko hari abandi bantu batanze ubuhamya mu 1998 bavuze ko nta gasanduku iyo ndege yagiraga.

Raporo ya Komisiyo Duclert yerekana ko hari umwe mu basirikare bashinzwe ubutasi w’u Bubiligi (ari nabo barindaga Ikibuga cy’Indege cya Kanombe), ngo wavuze ko yabonye ako gasanduku mu ndege yahungishije umuryango wa Habyarimana nyuma gato y’itangira rya Jenoside muri Mata 1994.

Perezida Kagame yanze kujya mu ndege ya Gen Roméo Dallaire kubera impungenge z'uko yashobora guhanurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .