Turi ku wa 1 Nyakanga 2026.

Kuri uyu munsi, Imyaka 64 irashize u Rwanda n’u Burundi bihawe n’u Bubiligi ubwigenge butavuzweho rumwe kuko nyuma byagaragaye ko bwari ubwigenge bucagase.

Ni umunsi kandi wahariwe injyana ya Reggae mu muziki, ukanaba umunsi mpuzamahanga wo gutebya abantu bakarangwa n’akanyamuneza.

Ibi ni bimwe mu byaranze uyu munsi mu mateka

2011: Perezida Kagame yahawe igihembo cyiswe Chello Foundation Humanitarian Award kubera imiyoborere myiza.

1903: Irushanwa ryo gusiganwa ku magare rizwi nka “Tour de France” ryakinwe ku nshuro ya mbere.

1980: "O Canada" yemejwe ku mugaragaro nk’indirimbo yubahiriza igihugu cya Canada.

2007: U Bwongereza bwashyizeho itegeko rikumira abantu kunywa itabi mu nyubako zihurirwamo n’abantu benshi.

2013: Croatia yabaye umunyamuryango wa 26 w’Umuryango w’Ubumwe bw’u Burayi.

Mu muziki

2009: Nyuma y’icyumweru kimwe Michael Jackson apfuye, indirimbo ze ziganje mu 10 zakunzwe kuri Billboard ku buryo hacurujwe kopi ibihumbi 415 za album ze kandi mu cyumweru cyabanjirije urupfu rwe hari hacurujwe kopi ibihumbi 10 gusa.

Abavutse

1961: Havutse Princess Diana wabaye umugore w’Umwami w’u Bwongereza Charles III.

1991: Lucas Vázquez, umunya-Espagne wamenyekanye mu Ikipe ya Real Madrid.

Abapfuye

2014: Gen Anatoly Mikhailovich Kornukov wabaye umupilote w’indege z’intambara mu gisirikare cya leta Zunze Ubumwe z’Abasoviyete, ndetse yanabaye umugaba w’Ingabo zirwanira mu kirere z’u Burusiya.

2005: Renaldo Benson umuhanzi w’umunyamerika mu Njyana ya R&B akaba n’umwanditsi w’indirimbo.