00:00:00 IGIHE NETWORK KN KINYARWANDA EN ENGLISH FR FRANCAIS

Ese koko Umwami watwaraga u Rwanda yavukanaga imbuto?

Yanditswe na Nsanzabera Jean de Dieu
Kuya 30 August 2022 saa 07:04
Yasuwe :

Kuva u Rwanda rwabaho mu myaka 931 ishize (1091-2022) rwatwawe n’abami bazwi neza bagera kuri 28 n’Abagabekazi 27 ( Kuko Kanjogera yabaye Umugabekazi w’abami 2). Ni ukuvuga kuva kuri Gihanga wabaye intango yarwo, kugeza kuri Ndahindurwa wabaye indengo y’ingoma ya cyami mu Rwanda. Abanyarwanda bose bamye bazi neza ko umwami avukana imbuto nk’ikimenyetso kigaragaza ko ari we muzungura wa se ku ngoma.

Ibijyanye no kuvukana imbuto byaravuzwe kenshi mu bataturamateka, ndetse birigishwa mu mashuri yisumbuye na za Kminuza, n’abaminuje muri yo bemeza ko koko umwami yavukanaga imbuto.

Aho ingoma ya cyami izunguriwe na Repubulika, ndetse na mbere y’uko yari igihari cyane cyane mu ntango z’ikinyejana cya 20, abantu bagumanye amakenga bibaza ni ba kwari ukuri ko umwami avukana imbuto. Benshi bakabona ko ari ubucakura bwakoreshwaga kugira ngo habeho abiharira ubugenga bw’igihugu, ko nta wa bubambura kubera akarusho kaba karavutse mu muryango wabo ko kuvukana imbuto.

Imvano y’izo mbuto ni iyihe?

Gihanga, ni we mwami wahanze igihugu cy’i Gasabo ari na cyo cyabaye inkomoko y’u Rwanda. U Rwanda yaruhanganye imbuto 5 n’amatungo 5, nk’intango y’ubuhinzi n’ubworozi igihugu gishya yari amaze guhanga kizaheraho kiyubaka, kizabasha gushyikira umuvuduko Abasangwabutaka(Abasinga n’Abazigaba)bari bagezeho mu myaka iyingayinga 800 ( 300-1091) bari bamaze kuri ubu butaka bahanga ibihugu bya bo, mbere y’uko igihugu cy’i Gasabo gihangwa.

Izo mbuto ni zo zirimo: Uburo, Isogi, Inzuzi, Ibikoro n’Amasaka. Izo mbuto, ni zo bakunze kwita :” Imbuto za Gihanga”. Yaruhanganye kandi amatungo 5, ari yo: Inka, Intama, Ihene, Inkoko n’Inzuki. Aya matungo ni nayo bakunze kwita amatungo ya Gihanga. Yaba imbuto za Gihanga, yaba amatungo ya Gihanga, byose byifashishwaga mu mihango mikuru y’ibwami, irimo iy’iyimikabami, iy’umuganura n’iyindi. Ibyo byose byafatwaga nk’ibintu bizira ( Bitagatifu) bihabwa icyo cyubahiro nk’ibikuru mu Rwanda.

Iyimikabami, ishyingirwa ry’umwami n no gutoranya uzamuzungura, byose byagengwaga n’ubwiru bwabaga bugengwa n’Abiru, ariko na bo bakifashisha indagu. Bishatse kuvuga ko ubuyobozi bw’i Rwanda mu gihe cy’abami, bwashyiranwagaho amakenga menshi habanje kubaza abarebakure, bakabahanurira ahazazaza h’igihugu n’umugenga wa cyo. Aho rero, ni ho hashakwaga ikimenyetso nkemurampaka, gihamiriza rubanda uwo inzuzi zereye ko azatwara u Rwanda, akaragwa ingoma ya ba sekuruza. Aho ni ho bifashishaga za mbuto nkuru mu gihugu ( Uburo cyangwa se amasaka) nk’ikimenyetso cy’uwarazwe ingoma ya se.

Byakorwaga bite, ngo hazavuke umwami uzazungura se ku ngoma?

Mbere na mbere, Abiru-Bimitsi bo mu nzu y’Abatege bo kwa Nyabutege bwa Shango wo mu Basinga b’Abasangwabutaka, bari kumwe n’Umwiru wa Nyamweru wakomokaga mu muryango mugari w’Abakono bo kwa Mukono wa Ntandayera ya Mututsi, ari na bo bari bashinzwe ibanga ry’imisimburanire y’Abagabekazi ku ngoma y’u Rwanda, bose barangajwe imbere n’Umwiru Mukuru, ni bo bafataga iya mbere bakajya kuraguriza umugore w’ingabwa uzashyingirwa umwami akazakibyarira umuzungura. Uwo mugore yatoranywaga mu ibanga rikomeye, ku buryo byamenywaga n’Abiru gusa.

Nk’uko byagenwe na Gihanga, ubwo yahangaga umurongo mugari w’imitegekere y’u Rwanda, n’amahame azagenga ubwami bw’u Rwanda, na nyuma y’uko atakiriho, yagennye ko hari imiryango y’intoranywa igomba gotoranywamo umugore w’ingabwa uzashyingirwa umwami uriho, akamubyarira umuzungura. Uwo mugore w’ingabwa, ni we wabyariraga umwami igihugu, akanakibera umugabekazi, umuhungu we akakibera umugabe. Iyo miryango, ni yo bitaga: “ Ibibanda” mu mateka y’u Rwanda. Ibibanda bikaba bine ari byo: Abasinga, Abega, Abaha n’Abakono.

Iyo igihe cyageraga cy’uko umwami uzazungura se ku ngoma agejeje igihe cyo gushaka, Umwiru wa Nyamweru ( Yitwaga gutyo kuko yari afite umurwa we ku musozi wa Nyamweru wo mu Kagali ka Nyamweru ko mu Murenge wa Kanyinya wo mu Karere ka Nyarugenge), yahitaga agaragaza umuryango utahiwe gutanga Umugabekazi, noneho akaba ari wo bajya gutereza inzuzi ngo barebe niba habonekamo umwari waba umugore w’ingabwa.

Habaga n’ubwo umuryango wizimbaga ku ntebe y’Ubugabekazi, kuko ari ko indagu zabaga zabigennye, cyangwa hagakurikizwa ubuhangange wamaze kubaka, ku buryo utapfa gutsimburwa uko ubonye, ukamara igihe udasimburwa, ari na yo mpamvu uzasanga hari imiryango yatwaye ingoma nyinshi ari Abagabekazi. Iyo bamaraga gutoranya umuryango uramukiwe gutanga abagabekazi, noneho bakurikizagaho kuraguriza inzu yawo bashakishirizamo uwo mukobwa washyingirwa umwami.

Iyo bamaraga kubona inzu yerejwe n’indagu kuzavamo umugore w’ingabwa, bagasanga afite abakobwa benshi, nabwo bakoreshaga uburyo bwo kuragura kugira ngo bamenye uzaba umugore w’ibwami. Uwo zabaga zereye, ni we bajyanaga ibwami, bakamushyignira umuhungu uzazungura se ku ngoma, bakamushyikiriza umugore, bati: “Akira umugore w’ingabwa, ni we uzagabira igihugu ubuzima, uwo azibaruka azakibera umugabe, nawe akibere umugabekazi”.

Ni ukuvuga ko umugore w’ingabwa ari nawe wavagamo Umugabekazi, uzaba umugabekazi umwami ntiyawishakiraga ahubwo yamuhabwaga n’indagu, bikozwe n’Abiru. Mu mateka y’u Rwanda, nta bwo umwami yashakirwaga umugore ari uko yimitswe, kereka iyo ise yabaga yaratanze akiri umwana, bakarindira ko azakura ngo bamushakire umugore. Ubundi iyo yabaga yararazwe ingoma, yuzuzaga imyaka 20 bagahita bamushyingira, kugira ngo atangire ashake imbuto zimukomokaho zizahanganira igihugu.

Ese yavukanaga imbuto koko?

Ubundi imbuto mu Kinyarwanda bivuga:” Umugisha, isumbwe, ubutware”, kuvukana imbuto mu mateka y’u Rwanda, bivuga ko uwo mwana aba yavukanye umugisha n’isumbwe yarushije abandi bana b’ibwami wo kuragwa ingoma, akazazungure se.

Kugira ngo uwo mwana uzazungura se ku ngoma aboneke, n’ubundi hakoreshwaga uburyo bw’indagu, aho baragurizaga urubyaro rw’uwo mugore w’ingabwa watoranyijwe kuzaba umugabekazi w’u Rwanda, hagatoranywamo uzazungura se ku ngoma.

Hari ubwo inzuzi zereraga imfura, ubundi zikerera ubuheta, ubuheture cyangwa se umuhererezi, bona n’ubwo yabaga ataranavuka. Imiterere y’ubwami bw’u Rwanda nk’uko yahanzwe na Gihanga, igena ko umwami azungurwa n’umwana we w’umuhungu, nta mukobwa wari wemerewe kuragwa ingoma. Mu gushaka uzazungura umwami uriho ku ngoma, haragurizwaga abana b’abahungu gusa.

Iyo uwo mwana w’umuhungu werejwe kuzaba umuzungura wa se ku ngoma yavukaga, ibwami babaga babizi, maze bakegera nyina, bakamuterura bakamupfumbatiza impeke y’uburo cyangwa se y’ishaka.

Nk’uko bisanzwe bizwi, umwana wese, akivuka aza apfumbase ikiganza. Iyo rero umwana wo mu muryango w’ibwami warazwe ingoma yavukaga bamubumburaga ikiganza cy’iburyo bagashyiramo imwe muri za mbuto za Gihanga zahanganywe n’u Rwanda, nk’ikimenyetso ko ariwe wegukanye umugisha wo kuragwa ubwami mu bikomangoma byose byo mu gihugu. Bikavuga kandi ko ari we ufite ubuzima bwose bw’Abanyarwanda mu kiganza, ariwe uzabahanganira mu gupfa no gukira. N’ubwo mu muryango havuka abana cumi hategerezwaga kuvamo umwana umwe gusa uvukana imbuto. Bishaka gusobanura ko umwami ari umwe mu gihugu cyose.

Uyu mwana yavukanye imbuto iyo yabaga amaze kumenyekana ntiyarererwa hafi y’umwami. Icyabiteraga ni uko nta bami babiri babangikana, umwe yakenya undi ntabeho. Bahitaga bamujana kumurerera kure y’ibwami we na nyina akazakurirayo, ndetse we na nyina, bakanabaho mu buzima bugoye bw’intabwa, kugira ngo batangire kwiga ubuzima busa n’ubw’abo bazatwara.

Iyo yabaga amaze gukura ageze mu kigero cy’imyaka 20 se akiriho, baramuzanaga bakamwimika, bakamuha inyonga, ubundi agatangira kwimenyereza ingoma ategekana na se. Ariko iyo se yatanga atarageza kuri iyo myaka, bamwimikaga ikubagahu mbere y’uko batabariza se, kugira ngo igihugu kidasigara kitagira umugabe. Agahera ubwo atwarirwa ingoma na nyina nk’umugabekazi, yamara gukura, bakamushyikiriza inyonga ( Ibirango by’ubwami).

Ukuri ni ukuhe?

Dukurikije uko amateka abidutekerereza, umwana uzaba umwami akazaungura se ku ngoma y’u Rwanda yamenywa n’Abiru na nyina bonyine. Iyo uwo mwana yavukaga bahengera akivuka bagahita bamupfumbatiza imbuto mu ntoke nk’ikimenyetso nkempurampaka ko umwami yavutse, kugira ngo abantu nibaza kumureba bapfundure mu kiganza bazisangemo.

Ibyo na byo ntibyari bigoye kubyumva kuko atari umuntu uwo ari we wese washoboraga kwegera aho umugore w’ibwami yabyariye! N’ubundi wasangaga ari Umwami, Abatware, Abiru n’abandi banyamihango b’ibwami babibonaga, ubundi bakabisakaza muri rubanda, bakamenya ko u Rwanda rwabonye uzarugenga se atakiriho. Maze bikaguma mu mitima yabo, bikagirwa ibanga imyaka yose !

Aha bikaba bigaragaza ukuri kuzuye, ko nta mwana w’ibwami wavukanaga imbuto izi tuzi, ahubwo babivugaga nk’imvugo yo kuzimiza igaragaza ko hari umwana w’umwami wavukanye umugisha n’isumbwe ryo kuragwa ingoma, akarutishwa n’Imana ibindi Bikomangoma ( Abandi bana b’ibwami batagize umugisha wo kuragwa ingoma) byo mu gihugu, kuzatwara u Rwanda.

Mu rwego rwo kumugaragaza nk’uwarazwe ingoma, bamupfumbatizaga imbuto nkuru z’u Rwanda, nk’uko twabibonye haruguru ko zakoraga no mu mihango y’iyimikabami, ubundi buri wese uje gusura urwo ruhinja rwavutse, agapfundura ikiganza cye agasangamo ya mbuto, iyo nkuru ikaba kimomo hose ko umwami yavutse.

Imbuto z'uburo n'amasaka, ni zo zifashishwaga mu gutangaza ko Umwami yatse, aho bamupfumbatizaga impeke yazo mu kiganza cy'iburyo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .