00:00:00 IGIHE NETWORK KN KINYARWANDA EN ENGLISH FR FRANCAIS

Yaba yarahishwe amateka ye? Uko umwuzukuru wa Kabuga yavukiye ishyanga kubera kwanga gushyingira mu Batutsi

Yanditswe na Mwene Ndabarasa
Kuya 20 Ukwakira 2022 saa 12:47
Yasuwe :

Ubwanditsi: Ibikubiye muri iyi nyandiko ni ibitekerezo bwite bw’umwanditsi.

Ubwo Kabuga Félicien yafatwaga, nyuma y’iminsi mike hasohotse amashusho agaragaza umwana w’umukobwa witwa Stacy Elodie wavugaga ko ari umwuzukuru we, avuga ko Sekuru yafashwe agafungwa azira imitungo ye.

Uwo mwana uvuga ko yize amategeko, ntabwo ari muto ku buryo atamenya amateka ye, ngo amenye ko sekuru ubyara nyina ari inyuma y’umugambi wa Jenoside wari ugamije kurimbura Abatutsi, barimo sekuru ubyara se n’umuryango we mugari.

Uyu mukobwa wakuriye mu muryango wamaze imyaka isaga 25 uhisha sekuru washakishwaga uruhindu kubera uruhare rwe muri Jenoside yakorewe Abatutsi, akwiye gufungura amaso aho kurengera abajenosideri bo kwa nyina, agashakira n’ubutabera abo mu muryango wa se warimbuwe muri Jenoside yakorewe Abatutsi.

Ashobora kuba atazi amateka ye, yarayahishwe cyangwa se ayirengagiza nkana, ariko reka tuyamwibutse: Stacy Elodie yavutse kuri Séraphine Kabuga Uwimana, umukobwa wa Kabuga Félicien, naho se ni Jacques Shamukiga, umuhungu w’umunyemari w’Umututsi Charles Shamukiga wishwe mu masaha ya mbere ya Jenoside, kuko yishwe n’abajepe tariki ya 7 Mata 1994.

Uyu Shamukiga yishwe aciwe umutwe ku itegeko rya Agatha Habyarimana, ndetse nta wigeze amenya irengero rye.

Shamukiga na bagenzi be nibo babashije gushyiraho ishuri APACOPE (Association des Parents pour la Contribution à la Promotion de l’Education) ku Muhima, akaba yari afite n’ikigo cy’ubwubatsi cyitwaga "Un toit à toi".

Yari na consul wa Luxembourg wabyatse muri 1982, ariko kubera ubwoko bwe, babimuhaye nyuma y’imyaka itandatu muri 1988.

Jacques na Séraphine bakundanye bahujwe n’umuhungu w’umunyemari Mironko, haciye igihe gito amutera inda.

Icyo gihe Jacques yigaga ku ishuri rya se, APACOPE, naho Séraphine yigaga kuri College St André. Ababyeyi barabiganiriye bemeza ko abana bazabana, bagakora ubukwe. Imyiteguro yarakomeje.

Ubukwe bwapfuye hasigaye iminsi ibiri, nyuma y’uko abantu bibajije ngo koko Kabuga ashyingiye mu Batutsi? Ubwo twari mu mwaka wa 1990.

Tubibutse ko Kabuga yashyingiye abakobwa be babiri Uwamariya Kabuga na Mukanziza Kabuga abahungu babiri ba Perezida Habyarimana, aribo Jean Pierre Habyarimana na León Habyarimana. Kabuga Félicien yabyaye abana bose hamwe 13.

Abahungu babiri ba Habyarimana bakibona ubutumire bahise banga ubukwe. Séraphine na Jacques bahisemo guhunga, dore ko bari abana bakiri bato, biga mu mwaka wa kane.

Séraphine yafashe amafaranga ibihumbi ijana (ubu mu gaciro yikubye inshuro zirenga icumi) na Jacques afata imodoka berekeza i Cyangugu aho Shamukiga yari afite ibikorwa by’ubwubatsi.

Gushaka kujya i Cyangugu bumvaga bibahesha amahoro, kuko hariyo abahungu babiri ba Shamukiga, aribo Christophe na Consolateur.

Seraphine akibura i Kigali, Shamukiga yahise atumizwa ku biro bya jandarumori (Gendarmerie) ngo asobanure aho umukobwa wa Kabuga ari, kandi na we atazi uko byagenze.

Abahungu ba Shamukiga bakibakubita amaso bati ’bigenze bite ko twari twiteguye kuza mu bukwe muri Weekend’? Jacques yasubije bakuru be ko ubukwe bwapfuye, ahubwo bahunze.

Nk’abantu bakuru, abahungu ba Shamukiga babonye ko bibakoraho. Bahise babambutsa babajyana i Bukavu muri Hotel yitwa BODEGA.

Kabuga amaze kumenya ko bari i Cyangugu yahise ajyana n’abasirikari bo mu mutwe warindaga Habyarimana, ashyikira kwa Perefe wa Cyangugu André Kalimbangabo.

Bahise bafata mukuru wa Jacques ariwe Christophe baba baramufunze, hanyuma Consolateur ajya kwerekana aho Jacques na Séraphine bari i Bukavu. Bahise bambuka bajya i Bukavu bafata Séraphine bamugarura i Kigali.

Séraphine yahise yurizwa indege ajyanwa mu Busuwisi, ndetse amakuru avuga ko gahunda ari uko inda yagombaga gukurwamo.

Yakiriwe na Singaye Fabien wari ushinzwe gukurikirana imibereho y’impunzi z’Abatutsi mu Burayi, akora muri Ambasade y’u Rwanda mu Busuwisi, umugore we akaba yari umukobwa wa Kabuga.

Séraphine amaze kubyara Tracy Elodie yagarutse mu Rwanda, ajya kurangiriza amashuri ye muri Lycée De Kigali, kandi ntiyongera kubonana na Jacques dore ko umwuka utari mwiza kuko intambara yo kubohora u Rwanda yari yaratangiye.

Nyuma Séraphine yabyaranye n’umuhungu wa Zigiranyirazo, hanyuma ashakana na Libanje Antoine watwaraga indege, wahaye Bruguière ubuhamya ko u Rwanda nta missile rwagiraga.

Aya mateka nyagaruye kugira ngo Stacy Elodie amenye ko yakuze. Ibitekerezo yakuriyemo bitandukanye n’ukuri kuri hanze.

Hari filime mbarankuru narebye yitwa ’Hitler’s Children’, aho abana n’abuzukuru b’Aba-Nazi bakuru bavugaga uburyo bakuze babwirwa n’ababyeyi ko ibivugwa kuri radiyo na televiziyo ku banazi atari byo, ndetse bakabuzwa kubireba.

Abana b’abajenosideri bo mu Rwanda nabo bakuriye mu mateka apfobejwe, cyane cyane ababa hanze y’igihugu.

Stacy Elodie ubu ufite imyaka 31, ni mukuru bihagije ku buryo yamenya ukuri ku mateka yabaye mu Rwanda, by’umwihariko mu muryango wa se.

Guhitamo gushyigikira uruhande rwa sekuru ubyara nyina, rwateye inkunga umugambi warimbuye umuryango wo kwa sekuru ubyara se, ntacyo bizamufasha. Akwiye kumenya ukuri, agahitamo igikwiye.

Kabuga afite umuryango w'abantu benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .