USA: Havutse imyigaragambyo nyuma y’urupfu rw’umwirabura rwatewe n’umupolisi (Amafoto)

Yanditswe na Habimana James
Kuya 27 Gicurasi 2020 saa 01:48
Yasuwe :
0 0

Abapolisi bane bo mu Mujyi wa Minnesota muri Leta Zunze Ubumwe za Amerika, birukanwe mu kazi nyuma yo kugaragara umwe muri bo w’umuzungu, anigisha ivi umugabo w’imwirabura witwa George Floyd, bikamuviramo gupfa.

Polisi ya Minnesota ivuga ko Floyd w’imyaka 46 wakoraga mu barinda umutekano mu nzu icuruza amafunguro, bamukekagaho gukoresha inyandiko mpimbano.

Ibitangazamakuru hirya no hino ku Isi bigaragaza uyu mugabo yatsindagiwe hasi n’umupolisi w’umuzungu amushinze ivi ku ijosi, undi agataka avuga ko arimo kubura umwuka.

George Floyd yumvikana agira ati “Sinshobora guhumeka, mbabarira ndimo kunanirwa guhumeka.”

Uyu mupolisi akomeza kumushikamira ku buryo adaha agaciro ibyo avuga. Yaje gupfa nyuma yo kujyanwa kwa muganga. Hahise haduka imyigaragambyo ikomeye muri uyu Mujyi, isaba ko abagize uruhare muri uru rupfu bafatwa bagahanwa.

Umuyobozi wa Polisi muri Minessota, Medaria Arradondo, yabwiye itangazamakuru ko aba bapolisi bane bamaze kwirukanwa mu kazi, ndetse Ibiro bishinzwe Ubugenzacyaha, FBI, byatangiye iperereza.

Umuyobozi w’uyu mujyi, Jacob Frey, na we yemeje ko aba bapolisi birukanwe, avuga ko aricyo cyemezo cyiza cyagombaga gufatwa.

Polisi muri aka gace ivuga ko “Nyuma yo kubona amakuru ko Floyd akoresha impapuro mpimbano, nibwo abapolisi bamukurikiranye, avuye mu modoka yagerageje kurwanya inzego z’umutekano nazo zimushyira hasi, ariko yaje gupfa kubera ibikomere yatewe.”

Polisi ivuga ko uyu mugabo yajyanwe kwa muganga aba ariho agwa nyuma y’igihe gito.

Umuyobozi w’uyu Mujyi yavuze ko “Kuba umwirabura muri Amerika ntibivuze ko ugomba kwicwa, uyu mupolisi ntabwo yagaragaje ubumuntu, mbisabiye imbabazi.”

Joe Biden uzahangana na Perezida Donald Trump mu matora y’umukuru w’igihugu, yavuze ko uyu mugabo agomba guhabwa ubutabera, ashima ko aba bapolisi birukanwe.

Amakuru avuga ko mu mwaka ushize, abantu 1000 aribo bishwe barashwe na Polisi, abirabura bakaba aribo bicwa ku rwego rwo hejuru.

Abantu bahise birara mu mihanda basaba ko Floyd ahabwa ubutabera
Imyigaragambyo yahise iba myinshi
Nyuma yo kujyanwa kwa muganga, George Floyd yahise apfa
Floyd yabwiye uyu mupolisi ko arimo kubura umwuka, amwima amatwi
Urupfu rwa George Floyd rwashavuje Abanyamerika benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .