Uruzinduko rw’abo bagore bombi rugamije kureba ibibazo abagore bagihura na byo mu iterambere mu bukungu, no mu kubongerera ubushobozi, ndetse no mu burezi bw’abana b’abakobwa.

Dr. Jill Biden na Amb. Russell bazahera uruzinduko rwabo muri Korea, bajye muri Vietnam na Laos kuva kuwa 16 kugeza kuwa 22 Nyakanga. Bazahita bakomereza muri Kenya, aho bazanitabira inama mpuzamahanga ku kwihangira imirimo (Global Entrepreneurship Summit), aho hazaba hari umunsi umwe uzibanda ku kwihangira imirimo kw’abagore.

Muri Kenya, Amb.Russell azahura nab a rwiyemezamirimo b’abagore, abashoramari n’abagize imiryango itari iya Leta, baganire ku buryo bwo kongerera ubushobozi abagore, hanagaragazwe imbogamizi zabo mu gutangira no guteza imbere imishinga y’Ubushabitsi (Business).

Amb.Russell azasoreza uruzinduko rwe mu Rwanda ku matariki ya 26 na 27 Nyakanga, aho azasura ihuriro ryiswe “WiSci Girls Steam Camp Rwanda 2015”, rizaba rihuje abakobwa 120 baturutse mu bihugu 8 bya Afurika, hagamijwe gukangurira abari n’abategarugori gusobanukirwa byimbitse ibijyanye n’ubumenyi (Science).

Iryo huriro riterwa inkunga n’ishami rya Leta Zunze Ubumwe za Amerika rishinzwe ububanyi n’amahanga, rizamara ibyumweru bitatu, rikaba ari igice kimwe mu bigize gahunda “Let Girls Learn initiative” ya Michelle Obama, Madamu wa Perezida wa USA.