Uko Internet yifashishwa n’abahezanguni mu gutoza abana b’abazungu kwanga abirabura

Yanditswe na Sekamana Mathias
Kuya 19 Kanama 2019 saa 02:01
Yasuwe :
0 0

Umubyeyi w’abana batatu barimo abahungu babiri, usanzwe ari n’umwanditsi ukomeye muri Los Angeles witwa Joaner Schroeder, yagaragaje ko hari ubutumwa buca kuri Internet butuma ingimbi z’abazungu zigira urwango rukabije zigakura zishaka kurasa abantu cyane cyane abirabura.

Muri iki kinyejana umuntu wese ashobora gukoresha Internet akabona ikintu ashaka cyose, bigaragara ko ingimbi zo muri leta zunze ubumwe za Amerika zihurirayo na byinshi bizica mu mutwe.

Hari ibintu bitatu abahamijwe n’abakurikiranyweho kurasa abantu mu ruhame kwinshi kwabayeho muri iki gihugu bahuriyeho: Bose ni abazungu, bo mu myaka yo hasi kandi b’igitsina gabo.

Uwarashe abantu muri El Paso hagapfa 22 yari yashyize kuri Internet ubutumwa bw’urwango rushingiye ku irondaruhu.

Iperereza rya polisi kandi ryagaragaje ko uwarashe abantu muri Dayton mu masaha make nyuma ya El Paso nawe yakoreshejwe n’ingengabitekerezo yakuye kuri Internet.

Aya mahano n’ayandi yayabanjirije yazamuye impaka nyinshi zivuga k’uburyo imiryango ikwiye kurerera abana b’abazungu muri leta zunze ubumwe za Amerika.

Joaner ati “Twatangiye kubona ko harimo ikibazo mu mwaka washize cyangwa mbere yaho gato ubwo abana bacu batubazaga ibibazo byuzuyemo urwango nta guca ku ruhande.”

Yabwiye BBC ko yatangaye ubwo umwe mu bana be b’abahungu yamubazaga ngo “Kuki abirabura bigana imico yacu buri gihe ariko twe abazungu tudashobora kwigana imico yabo?”.

Ngo nibwo yamenye ko izindi ngimbi nkawe zijya zimuganiriza ku byerekeye ivangura rishingiye ku ruhu, baba bakuye kuri Internet.

Mu butumwa bwa Joaner buvuga uko abantu bakwiye kurera abana b’abahungu b’igitsina gabo muri Amerika, yashyize ku rukutwa rwa Twitter bukaza no kwiharira imbuga nkoranyambaga muri iki gihugu hafi umunsi wose, yavuze ko ababyeyi bakwiye kujya bamenya ibyo abana babo bakoresha imbuga nkoranyambaga zabo.

Ati"Ntabwo imikino yose igaragaza ko umwana wawe yishoye mu ngengabitekerezo mbi. Igikomeye ku babyeyi ni icyo ukwiye gutekereza wumvise umwana wawe azanye imikino irimo ivangura rishingiye ku ruhu, imibonano mpuzabitsina, kwanga abaryamana bahuje ibitsina n’ibindi, ukibaza niba azi ibyo avuga koko.”

Hari abandi bagaragaje ko hari ibyumba by’ibanga kuri Internet binyuzwamo ubutumwa bubwira abana b’abazungu ko bari hejuru y’abana b’abirabura, bukabashishikariza gukura babanga.

Impuguke zitandukanye zigenda zigaragaza ko nubwo imbuga nkoranyambaga na Internet muri rusange bitagira ingaruka ku bana b’abahungu b’abazungu gusa, ariko ngo kuzikoresha mu nzira zigamije gukwirakwiza ubutumwa bw’urwango muri Amerika ni ikintu gihari ku buryo bw’umwihariko.

Mu ntangiro z’uku kwezi ikinyamakuru The New York cyasohoye inyandiko igaragaza ko urubuga rwa YouTube rwafashije abatavuga rumwe na leta ya Brazil, binyuze mu kwereka abanya-Brazil konti zihariye ziriho ubutumwa burwanya leta.

Iki kinyamakuru cyanditse ko ingaruka zavuyemo ari uko ubwo butumwa bwakwiriye hirya no hino muri iki gihugu haba mu mashuri, mu rwego rw’ubuvuzi no muri politiki. Amatora yagiye kugera Perezida Jair Bolsonaro yaramaze kumenyekana binyuze kuri ubwo butumwa banyuzwaga kuri YouTube.

Kubera iki ari insoresore z’abazungu?

Raporo y’ikigo gishinzwe iperereza, FBI igaragaza ko 63% byo kurasa kwabayeho hagati ya 2000 na 2013, kwakozwe n’abazungu b’abana, abasore cyangwa abo mu myaka yo hagati.

Ikigereranyo kiri hejuru kuri 16% kigaragaza ko iryo raswa rishingiye ku ruhu ryakorewe abanyamerika bafite inkomoko muri Afurika.

Irindi perereza ryakozwe na Mother Jones naryo rigaragaza ibisa nk’ibi kuko hagati ya 1982 na 2019, abarashe abantu ni abana cyangwa abasore b’abazungu.

Muri Nyakanga uyu mwaka, umuyobozi wa FBI Christopher Wray yabwiye inteko ishinga amategeko ya Leta zunze ubumwe za Amerika ko ibikorwa by’iterabwoba hafi ya byose bikorwa imbere mu gihugu biba bishingiye ku myumvire y’abazungu bumva ko bari hejuru y’abandi bantu.

Umwalimu mu by’imibanire muri kaminuza ya leta ya Mississippi Prof Margaret Hagerman, yamaze imyaka ibiri yiga ku buryo imiryango y’abazungu iganiriza abana babo ku ivangura rishingiye ku ruhu.

Yavuze ko yatunguwe no gusanga ababyeyi benshi b’abazungu batekereza ko ntacyo abana babo bazi ku ivangura rishingiye ku ruhu.

Ati"Ubwo namaze igihe nganira n’abo bana umwe ku wundi, byagaragaye ko bazi ivangura, benshi bararigira cyane ndetse bazi ko batangana n’abirabura.”

Akomeza avuga ati “Abana biga ivangura rishingiye ku ruhu bamwe mu ngo iwabo, abandi benshi kuri Internet ku mbuga zibahuza bigishirizwamo kwanga abantu batari abazungu”

Avuga ko kurerera umwana mu gace gatuwe n’abazungu ku bwiganze, ukamujyana ku ishuri ryiganjemo abazungu, bishobora guha umwana ubutumwa runaka butari bwiza, bikazatuma atabasha guhangana n’ubutumwa bahura nabwo kuri Internet bubangisha abandi bantu.

Avuga kandi ko ababyeyi b’abazungu ubwabo batajya baganira ubwabo ku ivangura rishingiye ku ruhu, bityo bigatuma batajya banabiganirizaho abana babo ngo bababwire ko ari bi bi, ahubwo bagakurikiza ubutumwa abahezanguni b’abazungu babaha kuri muranddasi.

Hari kandi abana b’abirabura babajijwe bavuga ko babizi neza ko hari inkuta abana b’abazungu bahuriraho bagahabwa inyigisho zo kwanga abantu batari abazungu.

Schroeder avuga ko kugira ngo iki kibazo gikemuke burundu, bisaba ko ababyeyi b’abana b’abazungu babigiramo uruhare kuko ngo ibyo bumva kuri Internet byo kubihagarika bigoye mu gihe umwana wese ahora kuri Internet.

Ingimbi z'abazungu ngo zifite ibyumba kuri murandasi zigishirizwamo kwanga abirabura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza